المنفى_الغريب

Untitled Part 6

جا نهار جديد ولكن مافيه تا جديد .. بديتو بتخمال فشي بيوتة وبصدفة لقيت واحد شقف ديال مرايا .. تخلعت ملي شفت الوجه المعكوس فيه .. كان وجهي مشا منو لون بحال شي شبحة مرعبة فمي باقي عوج بتصرفيقا ديال لبارح أما عيني الملكومة حمرة ودايرة عليها الخضورية (راية المغرب مقلوبة) أما العين الأخرى دايرة عليها زروقة بكترة سهير والخلعة .. وواحد سخانة نايضة ليا ففمك كملات لي ناقص .. وااع على حالة تقول كنبات فبوخرارب يعععع .. ماعرفت دابا شكون لي جنون هما ولا أنا.. ومع داك الماكلة المسوسة راني غادة فطريق للإلتحاق بالجيش ديالهم ... درت شقف ديال المرايا فجيبي تا نديه لبيتي.. وداز نهار ممل ولكن ليل كانت حاجة تانية خالص وبدا ملي سمعنا دقان فالباب كان فقيه دوار وشي رجال .. أنا ملي شفتهم أول فكرة طاحت ليا فبالي إلى ما رجموش زاهية هاد ليلة غايبيتوها فعكاشة مايحيدهاش ليها طبيب .. ولكن تصمدت زاهية هي طبيب هاد ليلة شي مرأة فدوار كتولد والقابلة ديالهم مسافرة وزاهية هي لي غاترومبلاصيها .. عييت مانرغب فيها ديني معاها ولكن بنت الهم حلفات عليا لا عتبت الباب لا نجبد ليها شي بلا بحال كي موالفة .. تفو على زهر كلشي عارف مصايبي .. ركبات معاهم فوق الحمار حاشكم ومشات .. أودي أودي مايوصلو عند المرأة تايلقاو ولدها كيتزوج .. ولكن هذا هو الإسعاف ديال المغرب .. رجعت كانكمل فصوبة لي كنت كانشرب ساليتها وزدت كملت زلافة زاهية وانا كنفكر فهاد دري لي أول وجه غايشوف فدنيا هو ديالها .. حياتو كي غاتكوووون .. كن عرف مسكين كن لوا عليه الحبل سري ولا لعيشة بإهانة زاهية هي لي ولدّاتك .. قاطع أفكاري دقان ديال لباب 100فالمائة .. زاهية زلقات بها الحمارة .. حليت الباب وانا حابسة ضحكة .. لا يصليها معايا شي جن من أتباعها .. ولكن كان ما لم يكن في الحسبان جن مسيف على شكل راجل مفورمي وطويل وملامحو غريبة كان لابس واحد المونطو طويل فلحل .. وأنا باقا حالة فمي وكانسكانيه دفعني ودخل كايغوت
- فين هي داك الشارفة الهارفة ؟؟
- شنو ؟ شكون ؟
رديت الباب بزربة وتبعتو وهو كان شااااعل باين طالعة ليه الغوريلا لراس
- مانعرف لجدها أش سميتها .. عيطي ليها داااابا تحضر قدامي
- ولكن راها مكايناش دابا
- آآه نسيت شواافات من درجة القائد يكونو دابا كايحفرو فالقبور بحالها .. شوف كي ردات دار كيشي زريبة الله يتبعها البلا .. أح كون نشدها نخلي فيها غير لي نسيت ... ولكن إلى بقات فيها راني بحالها .. شكون انت بعدا؟؟
بغيت نجاوب ولكن هو بحالا سارط كسيييطة سلامة .. ولكن عجبني فزاهية حسيت بضميري هو لي مجسد فيه برد ليا غدادي .. هدا باينة غير من طولتو ماشي جن عادي .. غايكون ملك جنون ولا عفريت
- غاتكوني غي بنتها لي جايباها من الخلا .. أصلا تقول شارفة قبل 10 عشر سنين
لا لا هدا زاد فيه زيادة على نعتي ببنت زاهية أستغفر الله .. مشبهني بيها وفرق العمر 10 سنين .. يالاه بغيت نرد عليه .. وهو يشنق عليا من الكول ديال طريكو تا حسيت برجليا مابقاوش قايسين الأرض
- ياكما تكوني انت هي شارفة .. ودرتي شي تشيطين ورجعتي صغيرة
- وراك زدتي فيه أبنادم .. أأ قصدت جن
- جن ؟؟
- على انت ماشي جن ؟
زاد زير على الكول وزاد بعدني على الأرض
- أنا بهاد طولة وزين والفورمة رديتيني جن ألمونيكة ديال عشرة دريال والله ليوم تان ...
تحبسات فيه الهضرة ملي جمعت معاه بواحد ركلة واواحد العضة حسيت بدمو فسناني .. يخخ .. طلق مني بقوة الألم ..جيت مكسلة فالأرض يخ ومع سقطة كانت مفاجئة جيت على رجلي و تلوات ليا
- وملي ماشي جن لاش مقفزني وعاطياك الخاطر .. لبعلوك لاخور بحالك بحالها الله يغرق لجد بوكم شقف
تحنى عندي وجر ليا شعري
- مزال ماتولدات بنت المرا لي تهز عليا رجلها وتحل عليا فمها ... وانتي يابنت شارفة درتيهم بجوج فدقة وحدة والله لا دوزتها ليك
- دار ليك و دوز ليك غير بالما القاطع ان شاء الله يا وجه الويل .. أش كاتحسب فراسك .. دمدومة .. وكاكاتك غير مرأة بعد ماخنازيتي فكرشها تسع شهور ... طلق من شعري قبل مانتسيف على مك · · · 
بقا غير حال فمو من صدمة باين عليه عمرو تسب بهاد طريقة المروعة .. وأنا عاد مزايدة فيه
- وابنادم واش كنهضر مع حيط طلق .. يسحابك راسك راجل وانت هاز دراعك المفشوشين على امرأة .. راه سيادك مبينين دراعهم فطوب والمرطوب وحادرين راس
- وليني راكي واحد سليطة لسان مامنكش جوج ... أش بان ليك نتخاطرو إلى بقا هاد لسان كيتحرك مور ماتشرق الشمش
- (ويلي ميمتي فاش حطيت راسي علاش ناوي هاد المصيبة ولكن عزة نفس ولساني طويل أكبر مصيبة مايحبسش ولو على جتتو) أهاه علاش مابغيتي ؟؟
- لي بغيتي انتي ؟ أش قلتي
- متافقين
أويلي أ لساني حبس واش ماشفتيش عيني وحنكي كي ولاو.. باغي نترزا تا فيك ... أش هاد زعامة لي جاتني أنا مستحيل مستحيل نقول هاد الهضرة و نلوح راسي العافية .. وهو ولد الحرام وجه الإجرام جبد واحد الموس ماااااضي من جيبو كايتجمع طلقو باحتراف قدام عيني
- يالاه دابا غاتخرجي لسانك بلخاطر .. ولا نبدا من وجهك هو لول
- لا ماعندنا لاش نطولو .. هاك ها لساني
- وااا جبهااا عندك .. انتي أول ضحية ساهلة ولسانها شايط عليها
- ودابا بلا هضرة خاوية وبدا تقطاع راني مامساليا ش وعندي مايدار
- اهاه ماطلبيتي غير الموجود ياااا بسم الله · · ·