المنفى_الغريب

CH/ 13

- بلاتي أزاهية عقلي غير على قد الحال .. وانت قلتي 3 ديال الحوايج مهمين فخطرة ...شرحيهم ليا عافاك
- مانقدرش نشرحهم ليك ب3 .. اختاري وحدة ؟؟
- الأولي كاتعلق بعائلتي التانية بغالي التالتة بهاد دار .. غانختار عائلتي
- باك جابك باش لهنا .. باش مايلقاكش عادل
- (طاحو ليا لما فركابي) عادل ؟؟ هه كضحكي معايا ياك أزاهية .. مايمكنش عادل ؟؟ راه إلى لقاني غايصفيها ليا .. واش كاتعرفي عادل راه هو شيطان بعينيه
- اه .. عارفاه
- (تنفست مزيان غير باش نتهدن ) واخا .. واش هو كيقلب عليا دابا ؟
- اه
- (بغضب) الحقير .. الله ينتقم منو
- دمرتي ليه حياتو .. وهو جاي ناوي يرد ليك صرفك .. وماحدكي ساكنة فهاد دار مغايلقاكش
- أوف كن غير مت فهاديك الحادتة ومانعاودش نشوف وجهو .. أنا داك نهار ماقصدتش ندير فيه ديك الحالة ولكن هو لي جبدني ويستاهل صراحة
- دنيا ؟؟ بنتي تابعينك غير المصايب الله يكون معاك
قالت هضرتها ودخلات .. أما أنا صافي تكوفرت تبلوكيت.. ملي كانتخيل وجه عادل .. عادل لي مكان مخلي حد فتيقارو وانا لي حديتهم ليه ... قطع حبل أفكاري سي غالي
- بنت شارفة ؟؟
- نعام أمول دار شارفة
- علاش خرجتو وبديتو كاتهضرو انت وياها ؟؟؟
- حيت مكاينينش برا لكاميرات
- وعلاش كنتو كاتهضرو ؟
- عليك
- وأش كنتو كاتقولو ؟
- شارفة قالت ليا مانبقاش نتيق فيك ومانفتحش ليك قلبي ... علاش ؟
- قلبك محطة ...ألمكلخة .. بغيتي تعرفي ؟؟؟
- اه
- حيت موتك غاتكون على يدي
- ههه لا ماجيتيش فيها ... حيت كااااين لي غايقتلني .. أما انت بلا ماتوسخ غير جلس تفرج
- بصاح شكون ؟؟
- إلى قلت ليك مغايبقاش التشويق .. خليها سيربرايز
دخلت وخليتو كايتجمد فالبرد .. وانا البرودة شاداني من راس .. ماعرفت دابا مناش نخاف واش من غالي ولا زاهية وجنونها ولا كارلو ولا البير الملعون ولا شيطان ديال عادل .. صافي أنا حياتي غادة لهاوية ... مشـــيــــــــت فيها بالمعقول

· · 
طلع صباح نهار جديد وانا عيني مشافتش النعاس .. تصافطت مع زاهية وتا الباهية مشات معاها غابزز مع ماساخياش برخيص قصدت لغالي هاد الأخير لي تاهو مشا المدينة قال عندو شي غرض وأخيرا بقيت أنا فدار بوحدي .. كن كان عقلي هاني كن ضربتها بشي نعسة .. ولكن منين غايجيني الهنا ونعاس .. درت كرسي حدا شرجم وجلست كنتفرج فشتا لي كطيح خفيفة شحال كان كايعجبني نلعب فيها ملي كنت صغيرة تال داك نهار لي بحال البارح قبل 16 عام .. كنت ساكنة فدار جدي وكانت عندي 8 سنين .. كان فصل الشتاء وكانت يومين وشتا مكتقطعش ..ونهار تالت وخا كانت كطيح ولكن كانت بحال ليوم خفيفة .. جدي ماخلانيش نخرج ولكن واش كانت تقدر شي حاجة توقف قدام دنيا .. اعتابرتو بحال تحدي وهربت من دار .. صحاباتي تاهما مخلاوهمش واليديهم يخرجو .. لداكشي ما كان قدامي غير دراري نلعب معاهم .. كنا كنلعبو كورة والأرض كانت مغيسة رجعات حالتنا حالة ولي زاد كمل علينا هو ملي شفنا شيطان ديال عادل جاي... شيطان لي لكلب لي يطيح بين يديه يصفيها ليه والحمار لي يشوفو يرد ليه ظهرو رطب من كرشو .. ولخنشة ديال زرع لي يقشعها يشتتها فدوار كان مكيخلي لا صغير لا كبير وخا كان فعمرو غير 14 عام ولكن لي كيشفع ليه عند ناس دوار هو باه لي تاهو حاصل معاه عندو نفوذ وعندو نص فالأراضي ديال المنطقة .. حنا ملي شفناه هربنا حيت مقادين على صداع .. ولكن هو كان كي شي ديب جايع وشايف القطيع هارب .. وضعيف فينا هو لي حصل بين يديه كان أنس أصغر واحد فينا ... شدو المجرم وبدا كايضرب فيه بركالي وأنس كيبكي ويرغب فيه .. دراري كلهم كملو لهريب إلا أنا ماقدرش نشوفو كايتعدا عليه ومشيت عندو وغير شافني تا أنا جمع معايا بنص ... وحيت غروري ماخلانيش نستسلم نضت وبديت نقمش ونعض فيه وبقينا فمشادات باليدين .. وماحسيناش براسنا وصلنا للحافة وماحسيت براسي تا دفعتو وفرمشة عين مابقاش ليه الأتر .. كان طاح لتحت ملي طليت لقيتو كان جاي على وجهو ودم كايسيل منو .. بديت كندور فجنابي تالفة وهو يبان ليا أنس هارب وبحركة للاإرادية تا أنا تبعتو هاربة .. ومن داك نهار وأنا هاربة وهما كيقلبو عليا من بعد ماولدهم تشلل ووجهو كلو تشوه ... لي سمعتو عليه زاد فشرو وبالخصوص ملي ماقبلات تا وحدة تزوج بيه وتولد الخليفة ديال عائلتهم العريقة .... هههههه صراحة غزيت فيه يستاهل كتر .. ناس دوار ولاو كايحتارموني وديما كايصيفطو ليا سلام ...حيت حديتهم ليه وكن تزوج كن ولد شي وحش كتر منو ... ولكن ناري إلى مشا تالقاني والله مايرحمني ححححح كنتصور كيفاش غايقتلني إلى لقاني بحال والو يربطني فشي كرسي ويغمض ليا عيني باش مايخرجوش ويصعقني بضو .. ولا يربطني مع شي طنوبيل ويبقى يشطب بيا الأرض آآآآه ماعرفت أش غايدير · · · 
دوزت نهار كاملو بوحدي وأنا خايفة من خيالي ... وبدا ظلام كايغطي سما .. وانا كنتعشى درت واحد طاجين فاعل تارك .. وانا نسمع صوت ديال طنوبيل برا وكارلو كيغوت .. مشيت كنطير باش نتلقى لسي غالي بالمعيور .. ولكن ملي خرجت مالقيت تا حد .. مشيت تال باب سور ومابان ليا تاحاجة بديت كنطل ووالو .. شوية شوية وهو يبان لي البير مضوي ... بديت كندور فراسي
- هههه ديروها بيا ..قديـــــــــــــــــــمة أوا خا نشوف ماشي غير ضو نشوف العافية شاعلة فيك ومي كطفي فيها والله لا قربت ليك ياالبير الملعون .. يالله
هزيت كتفي ودخلت لدار وسورتت لباب مزياااان بحالا ناقصني غير هو .. صراحة فيا الفضول تجاهو وبالخصوص ملي قالت ليا زاهية بلي هو قلب هاد دار .. ولكن مانساش بلي قالت ليا بعدي منو وانا خايفة على حياتي .. باقا ما شفت ماتشوفت .. رجعت لدار كملت عشايا بلا تفكير ومشيت نعس مع لبارح كاع مانعست وليوم فيا لموت ديال نعاس .. حطيت راسي على المخدة وشديت طيارة ... ضرباتني الفيقة فنصاصات ديال ليل والله ماعرفت شحال فساعة وشكوووون فكر فيها .. وانا لاقية راسي مقابلة مع البير وهو محلول وانا باغا نتلاح فيه
- هييييييييييييييييييي مــــــــــــــــــــي .. لا لا لا لا لا لا لا أنا غير كنحلم مايمكنش نكون وصلت لهنا وانا ناعسة وبالحفى من لفوق
رجعت خطوى لور وشي صوت كايجي من لبير كايعيط ليا ... لا أنا صافي احماقيت ضرت بغيت نجري لدار ..ولكن بانو ليا واحد جوج رجال خارجين منها ..من لباسهم وطريقة مشيتهم كان باين على واحد السيد ولاخور لخادم واخا كانو بعاد ولكن هضرتكم كنسمعها
- ملي تولد مراتك راك عارف أش غادير
- أه أسيدي كن هاني لولد غايكون ولدكم وحنا وجهنا ماتبقاوش تشوفوه .. ولكن أسيدي ماتنساش داكشي لي تافقنا عليه
- لولد فيدنا ولفلوس فيدكم
- مايكون غير خاطرك أسيدي
داك رجال اختافاو .. وختفى ظلام معاهم ..وبحالا طلع نهار جديد .. وهاد المرة خرجات امرأة آية فالجمال من دار كانت كرشها لفمها وهازة جوج سطولة وجايا للبير تسقي .. وبحالا كاع مكاتشوفني أما أنا لارجليا قادرين يتحركو ولا لساني قادر ينطق بحالي بحال شي شجرة ولا حجرة ... بدات كاتعمر فسطولة وهي تجي عندها واحد القطة بدات كاتحك ليها وكاتدلعها وعطاتها تشرب
- الباهية واش هاد العطش كاملو فيك تقول فاطرة بالملحة .. صافي خليني نمشي قبل مايبداي يغوتو
- زاااااهية فينــــــــــــــــك
- ها ماقالت شوافة .. يالاه نخليك
هزات سطولة عامرين ومشات كتجري لدار.. ولكن ماوصلاتش الباب .. ماعرفتش مالها وقفات واقلة شدها لوجع ...طلقات سطولة للأرض وتبعاتهم هي .. وبدات كتغوت لربي لي خلقها .. جا عندها داك الخدام كيجري ودخلها لدار ... وأنا باقا مصدومة من لي كنشوفو هاديك المرأة زوينة هي زاهية وكانت حاااملة أش هادشي ياربي .. وذني كان كايجي ليها صوت غواتها بحالا كنت معاها لداخل ومن بعد شوية بديت كنسمع صوت صبي صغير .. ومن بعد سبع ليالي بان ليا واحد راجل خارج هو ومراتو وهازين دري وزاهية شادة ليهم فرجليهم كاترغبهم وتغوت ''ولدي غالي " وداك الخدام كيجر فزاهية تاحيدها من طريقهم .. وركبو فطنوبيل ومشاو .. أما زاهية ناضت بدات كضرب فداك الخدام وكتغوت عليه وتبكي .. أماهو باش يبعدها ويسكتها عطاها بواحد تصرفيقة طيحاتها للأرض وجا راسها على واحد الحجرة .. خلاتها تقطع الحس ومن وجه الخدام المرعوب بان ليا تقطع ليها تا نبض .. من بعد نص ساعة وهو غادي جاي وكيفكر هزها وجابها لبير حلو و رماها فيه ومشا كيجري لدار جمع حوايجو وخرج وغبر ليه الأتر .. أما أنا صدمة خلات فمي غير محلول .. أش هادشي لي كانشوف ...ولي زاد طيحي مني نص هو شي يد تحطات على كتفي
- بنت شارفة
- آآآآآآآآآآآآآآآآآآآآآآآآآآآآآآآ
- شكاديري فهاد الوقت حدا البير
مارديتش عليه .. بديت كنشوفو مضبب تا مابقيتش كانشوفو كاع · ·