You, Me and the Torn Love Letter ꞁ ✓ [PUBLISHED UNDER BOOKLAT PUBLISHING CORP.]

t e n | Deep Sea Diving

PINANDILATAN NI CASS si Ansel matapos nitong sabihin ang plano nito ngayong araw. Taliwas sa kahapon, hindi siya ginising nito kaagad. Sa halip, nag-paluto lang ito ng pang-agahan at iyon na ang nagisingan niya. Napabuga siya ng hangin.

"Alam kong para na akong sirang plaka sa kakatanong pero wala ka ba talagang planong patayin ako o gusto mo lang talaga ng kasamang maki-try sa mga extreme activities mo?" Baling niya rito habang nasa kalagitnaan ito nang pagsesepilyo.

Tinignan siya nito bago tinapos muna ang ginagawa. Napahalukipkip siya habang matamang tinitignan ito. Bukod kasi sa may fear of heights siya, mayroon din siyang fear of the deep. Fascinated naman siya sa konsepto nang pag-de-deep sea diving ngunit inaatake na naman siya ng mga masasamang premonition. At of course, gusto niya rin niyang ma-try ang kayaking, ngunit nakita niya sa picture ang naturang aktibidad at mukhang aatakihin na talaga siya sa puso.

Liningon na siya ni Ansel at nakangiti na naman ang mokong. Akala siguro nito ay tatablan na naman siya ng karisma nito. Ngunit, sorry na lang ito at sanay na siya. What with seeing him half-naked twice and being so unbelievably close with him for what seemed like a few days shy from when she knew him in College. Kaya syempre naka-build up na siya ng ammunition dito at hindi na tatalab ang pa-cute nito.

"Hmm," usal nito, halatang nahalata na hindi siya nag-react sa ginawa nito. "Ikaw naman, hindi ka naman namatay sa past activities natin ah. Advance ka mag-isip, Caz."

"Malay mo. May mga namamatay kaya sa aksidente."

Napailing lang ito at nanatiling nakangiti. "Just, don't worry about it, alright? Or gusto mo bang maiwan rito?"

At mag-alala rito kung hindi man ito makabalik? No thanks. "Bakit naman ako magpapaiwan? Baka maalala ng mga ipis na may nakalimutan pa silang idulog sa'yo, bumalik pa sila ng wala sa oras."

Natutuwang inakbayan siya nito at naramdaman na naman niya ang kakaibang nerbyos nang maglapat ang katawan nila. Immunity pala, ah, nakakalokang sabi ng lohikal na parte ng kanyang utak. Sinansala niya ang boses na iyon at sinubukang hindi na lang pansinin.

"That's why I like you, Caz. Tara na?"

"Fine."

Nang naroroon na sila, gusto na namang mag-back out ni Cass. Hindi na siya nag-aksaya ng panahon na sabihin agad iyon sa binata. Sinubukan nitong kunin ulit ang mga kamay niya ngunit prepared siya kaya napahalukipkip siya. Mahirap na, baka kahit may immunity siya ay matamaan pa rin siya ng karisma nito.

Nanatiling nakangiti ang binata kahit napansin nito ang tahasan niyang pag-iwas sa physical contact. "Ayaw mo bang makita ang mga dolphin nang malapitan o makita ang mga coral reefs?"

"Syempre gusto ko... may aquarium naman."

"Ayaw mo ng close-up? Iyong pwede mo silang hawakan?"

"May program naman sa Subic na pwede kang lumangoy kasama ang dolphin."

Matamang tinignan siya nito, mukhang sinusubukan nitong alamin kung seryoso ba siya sa pag-ayaw o hindi.

"Sige na nga," sabi nito. "Hindi na kita pipilitin. Basta kung hindi ako makabalik, tawagan mo agad si Greta at sabihin mong mahal na mahal ko siya at sila Mama at Papa."

He sounded serious as he turned and asked one of the staff to suit him up. Gulat na tinitigan niya lang ito at lumingon naman ito para ngitian siya. "Ay, ito pala, pa-picture," inabot nito ang phone nito sa kanya at napapailing na kinuha niya naman iyon para picturan ito. "Alam mo na... kung sakaling hindi ako makabalik. At least, may last na token ako sa mga admirers ko."

"Oh my God," naiinis na sabi niya sabay tabi dito at nakipag-selfie. Hindi naman ito nag-atubiling akbayan siya at nag-peace sign pa ang mokong. Napapailing na ibinalik niya ang phone nito. "Ikaw, Ansel, masasakal na kita."