#في_الغرفه_التاسعه

#في_الغرفه_التاسعه٢٣
#زينب_الموسوي

السلام عليكم
💚💚💚💚💚💚💚
#غشاء

______________
سهام

الشتى باخر ايامه وبعده برده
مثل حيل الحديثه ..
يبدي بالوجه .. ويدخل للجسم ويتسرب للعظم ..

صوت الملايه تقرا بقصيده
كلماتها مابيها معنى .. ولاتطيح دمعه ..
وباوع على النسوان وادور بوجهن على الدموع .. ومالكيت
هالدموع الا على وجه

العلويه مدين باوعت بتمعن .. شلون غطاها السواد .. ودموعها حفرت بالخد مجرى بگد حسرتها ..
حسرة الام على الضنى مايشبها حسره .. من ماتت كوثر من يومين واني اجي للعزى ويخوني الجلد اقترب منها واعازيها

بنتها ارتاحت ... وتركت وراها ام واب ماتركوا عياده دكتور الا وذرفوا بيها دمعه .. ولامستشفى ماشاف شوغتهم ولا صيدليه ماحست برجفة اديهم
...عمرها خمس سنين ...
ومعزتها عند الام تفوق الالاف السنين ...
فرغ مكان بصفها
واخذته وگعدت يمها .. وبوست خدها

( البقيه بحياتج علويه شدي حيلج .. والموت راحه الها.. الله يصبرج )

رمشها مازال يقطر دموع ... رفعته عليه .. وعنت عليها مواقف وذكريات ابتدتها بعتب
( ام حسين ليش هيج .. ماجيتي من وديت عليج .. ردتج تبريني الذمه يمكن الله يمد بعمر ابنيتي وميراويني شوغتها )

( حقج اذا عتبتي علويه انتي تدرين بظروفي صار اربع سنين
احبل بداية السنه واجيب بنهايتها احبل
والملا مريضه ومالي غير الله ..
وداعتج باريتج الذمه واني داخله بختج وبخت اهلج .. علويه هذا قدر عليج وعلى السيد كون تصبرين عليه وتحمدين الله وتشكريه ... على ولدياتج وراعي بيتج )

سندت راسها على ايدها وبجت
وهي تشتكي
( اخ يالندم لو يرجع ميت جان رجعها .. ندمانه على كل حجايه وفعل سويته هاي عاقبة اعمالي بس بنتي مالها ذنب
الهبها الجزع واجرى دموعها وتركت كلماتي للمواساة

( الراح راح .. والدنيا طويله
وباب الغفران مفتوح دوم .. لاتظلين ندمانه على ايام مضت وتخسرين ايام جايه .. ترحمي لبنتج وصلي واندعي بالصبر )

تقدمت نسوان وبعدها نسوان
تعزيها .. واستمع لحجيها ليدور حول الندم والشاره ....
تسحبت من بين جموع النسوان الماليات بيتها ... وطلعت فتت بعگد بيت ام مصطفى .. اشوف العمال البناء يغسلون اديهم
برميل مي جبير هدومهم جص
همست بداخلي ( الحمد لله بيتها وصل للبياض .. كون الليله ماتمطر )
وگفت بسد دكان الفرع اشتري العصريه( لجيش بريطانيا) مثل مايسميهم سيد حكيم ... اخذت المصاص والحلقوم وطلعت .. وعاينت على البيت شفت مصطفى واگف بصف سيارته السوده ساده الشارع .. ويتحاسب ويه المقاول .. اجتي عيني على علو البيت ودنك الطارمه تشبه بيت الساده. حتى المطبخ نفس لون السيراميك ...
الضافه فتاح للمطبخنا
وحتى المقاول نفسه الرمم بيتنا
الصيف الفات