#
#في_الغرفه_التاسعه٥٧
#زينب_الموسوي
السلام عليكم
( ياارحم الراحمين ) الكتابه قبل القراءه رجاءاً
🍂🍂🍂🍂🍂🍂🍂🍂🍂🍂
#محطات
—————-
زهراء
فزيت من نوم طويل ... دفعني اله نزول المطر الفجر .. تململت بفراشي
...و باوعت على نرجس متلفلفه بالطانيه .. وفاتحه الكصايب وخصل من شعرها. لازكه على وجهها وعرگانه ... جسيت حرارة خدها بشفتي وتاكدت حرارتها انخفضت شويه ...
تناوشت كلاص مي وخليت ايدي جوى راسها وشلته
( نرجس گعودي اشوربي مي ...)
عيونها نص مفتوحه وشربتها المي ورجعت تمددت وهي تناشغ بلا وعي تمددت يمها وايديه تمسد على شعرها ...
واحجيله عن خطاءها
( نرجوسه .. بعدج زعلانه .. )
مو بحسابي تجاوب فرحت اكمل كلامي برأفه
( انتي غلطانه شلون تروحين تلعبين بيت ناس متعرفيهم وبدون متخبرين امي .. وتخلينا نهبط عليج وخطيه امي رادت تموت من الخوف )
حررت نفسه من البطانيه وطلعت الكلمات بضخامه وتقليد لملكه ولهجتها الجنوبيه وهي تلهث
( جا ماالعب .. اظل بالحوش اقرا واكتب والدگاگ عليه .. ومهدي يلعب طوبه ويروح للروضه واني لا )
استدارت عليه واني اضحك باوعتني بنظرات متاججه غضب
وركضت تجر بيدة الباب حتى تطلع ... وحذرتها
( تعالي لمكانج ترى اخابر علي هسه اخليه يجي يبسطج )
بقت تباوعني بعناد اطفال وكعدت يم الباب ... ولامه رجليها وايديها على خدها
وگفت وسفطت البطانيات
( اسويلج بيض حتى تشربين خافض حراره )
هزت راسه واثنت لغدها بالموافقه ..
ولحگتني للمطبخ تتاكد اطبق شروطها بالبيض .. الطماطه اللاچحه بالطاوه وراس البصل المحروك والدهن. اليغطي البيض والملح الزايد .. خليته بالصينيه
وگعدت تاكل .. ويه گعدت جدو
توجه للحمام .. ورجع صبح علينا
( صبحجن الله بالخير جدي شلونها نرجوسه بعدهي مصخنه ).
( والله جدو بعد عدها شوية حراره . كلت تاكول واشربها علاج )
ناوشته صحن الجبن الابيض
التتخصص بيه فضيله وعلمتني عليه خطوه خطوه مثل ماعلمتني الروبه المنزليه
گعد جدو يم نرجس .. وسالني
( اليوم صايمه جدي )؟
( بلي جدو صايمه اقضي عن المرحوم .. ومدام شتى والنهار قصير )
ناوشته الچاي وطلعت من المطبخ .. حاسه بنعاس يزيد عندي ويه استمرار المطر ...
... ورجعت لفراشي .. تمددت وعيني على السكف والمروحه واگفه فوك راسي ...
.. ذكرتني باياد .. ونزلت دموعي عليه .. چان مخنوگ بالدنيا والغطى مايطيقه ... فكيف يطيق القبر وضيقه ..
شهگت بالبچي وغمضت عيوني بقوه ودعيت من اعماقي
( يارب تعفو عنه وتخفف عنه ضيق قبره وتجعله عندك من المظلومين وتشمله بعطفك ونعيمك )
مسحت دموعي ودرت وجهي بسرعه لجانب الحايط واني اسمع صوت امي ... فاذا اكتشفت بكائي عليه .. تلومني
وتحلفني ماابچي ...
اتصورتها جايه تسال على نرجس وماتدخل بهذي السرعه
عليه .. الا انها اقتحمت غرفتي
وهي تندهني
( يوم زهوره .. ابوج اجى من الجبهه ويريد يشوفج )
أنت تقرأ
#في_الغرفه_التاسعه
Romanceقصه اجتماعيه حقيقيه لعائله عراقيه لااحب ان اختصر مضمونها واترك للقاريء معرفة المضمون
