Marrying Mr. Billionaire (COMPLETED)

Chapter 3

Chapter 3

"Sabi na, eh, palpak!" inis na asik ni mais girl sabay dabog.

Nausukan niya pa ang mukha ko ng usok ng sigarilyo niya. Bastos talaga! Tinakpan ko agad ang ilong ko.

Hindi ko naman sila masisisi. Talagang napalpak ako kasi nagulat ako. Hindi ko naman alam na ang bahay pala na iyon ay bahay ng ex-boyfriend ko na si Ashton. At nagulat ako kasi naroon ang mukha ko! Sino ba naman ang hindi magulat?

"Alis na nga tayo! Baka tatawag na iyon ng police! Bad trip!" ani red girl.

Agad kong inayos ang aking sarili at akmang aalis na sana nang bigla akong nilapitan ni Mais girl at kinuwelyuhan ako.

"Ikaw!" aniya. "Umayos ka, ah? Huwag kang magpapahuli! Buwisit na gabing ito!" Binitiwan niya agad ang kuwelyo ko at binangga pa ang balikat ko nang umalis.

Napapikit ako dahil tumalsik ang laway niya sa akin. Hindi ko maiwasan ang mandiri. Nang minulat ko ang mata ko, narinig ko ang pagharurot ng mga motor.

Bumuntonghininga ako at binalingan si Boboy na ngayon ay malungkot na. Hindi dapat ako ma-guilty. Pinahamak niya ako!

Lumapit siya sa akin at mahinang tinapik ang balikat ko.

"Huwag kang magpapahuli," mahina niyang sambit sa akin bago siya umalis na bagsak ang balikat.

Huminga ako nang malalim at saka tumalikod na rin paalis sa lugar.

***

Nasa kwarta na ako ngayon, nakasandal sa headrest ng kama. Kagat-kagat ko ang kuko ko habang may iniisip. Alas dos na ng madaling-araw at hindi pa rin maalis sa isip ko ang nangyari kanina.

After two years, nagkita ulit kami ni Ashton. Hindi ko akalain na makikita ko siya ulit at sobrang laki ng ipinagbago niya. Mula sa physical na anyo hanggang sa pag-uugali. Matagal na siyang walang puwang sa puso ko since we broke up two years ago too. At ngayong nagkita kami ulit, hindi ko alam kung ano ang mararamdaman ko. Siguro kahihiyan? Kasi siya, successful at ako, wala pa ring direksyon sa buhay.

Good for him.

Bumuntonghininga ako at akmang hihiga na sana sa kama nang biglang bumukas ang pinto ng kuwarto ko na agad kong ikinaupo ng maayos. Napakurap-kurap ako nang nakita ko si Ate na dumungaw sa may pinto. She was smiling. Mukhang may magandang nangyari sa lakad niya ngayon.

"Puwede ba akong pumasok?" tanong niya habang ang isang kamay ay nakakapit na sa pintuan.

Kinagat ko ang ibabang labi ko at saka tumango. Inayos ko ang pag-upo ko at nilagay ang unan sa hita ko.

"Kat," tawag niya nang nakalapit. Umupo siya sa kama at ngumiti sa akin. "May buyer na ng lupa."

Tamad akong tumango at saka nag-iwas ng tingin.

Ate, ibenta mo na ang lupa na iyan! Ikaw na ang bahala! Hindi na ako mangingialam diyan! Nang dahil sa pangingialam ko sa desisyon mo, nakita ko ulit ang lalaking ayaw ko na makita!

"Okay lang ba sa iyo?" mahina niyang pagkatanong.

Hilaw akong ngumiti at saka siya binalingan. "Oo naman, Ate. Naisip ko na tama ka rin naman pala. Wala na si Papa at sa iyo naman nakapangalan ang lupa. At tama ka sa parte na madali nating mababayaran si Aling Marites kapag ibenta ang lupa."

At hindi na rin ako gagawa ng katangahan sa buhay.

Malungkot siyang ngumiti sa akin. Nang gumawi ang tingin ko sa mata niya, malungkot din ito. Sinundan ko siya ng tingin nang tumayo siya para lumapit sa akin. Nagulat ako nang niyakap niya ako. Bigla tuloy akong nakaramdam ng kaginhawaan sa yakap niya. Akmang pipikit na sana ako para damhin ang kanyang yakap nang bigla niya akong kinurot sa tagiliran.