1. Close to... You (မင်းနဲ့နီးဖို့) Completed

P 26

"ဂူထဲ၀င်ကြည့်ကြမလား အကို"

လက်မောင်းပေါ်ကို လက်လေးလာတင်ပြီး အတွင်းထဲကို ငေးကာ ပြောလာသူကြောင့် ခွဲခြားလည်း ဂူအတွင်းကို လိုက်ကြည့်မိသည်။

အိတ်ထဲက ဓာတ်မီးကိုထုတ်၍ ကလေးကို နွမ်းခါးဆီပေးလိုက်ပြီး နှစ်ယောက်သား ဂူအတွင်းသို့ ၀င်လာသည်။ အတွင်းကို ရောက်လေလေ မပီပြင်သော အကူအညီ တောင်းခံသံများပိုကြားလာရသည်။

မှောင်မည်းနေသော လမ်းတွင် ဓာတ်မီးတစ်လက်သာ ပါတာကြောင့် သတိထားလျှောက်နေစဉ် ရုတ်တရက် ခွဲခြားက နွမ်းခါး၏ ပခုံးကို လှမ်းဆွဲလိုက်သည်။ နွမ်းခါးလန့်သွားပြီး အရှေ့ကို သေချာကြည့်တော့ ခါးလောက်မြင့်မည့် ချောက်တစ်ခုကိုတွေ့ရသည်။ ချောက်ဟုဆိုသော်လည်း အောက်သို့နိမ့်ဆင်း သွားခြင်းမဟုတ်ပဲ လမ်းဖောက်ထားသည့် သဏ္ဍာန်တူသည်။

"ကိုယ်အရင်ဆင်းမယ်"

ပြောလည်းပြောရင်း ခွဲခြားက သွက်လက်စွာခုန်ဆင်းသည်။ နွမ်းခါးက အနီးသို့သွားကာ ကလေးကို လှမ်းပေးဖို့ ထိုင်လိုက်ချိန်တွင် ခွဲခြားက ခါးမှ ချီမကာ ကလေးရော လူရော ပွေ့ချလိုက်လေသည်။

"အထဲက ပိုအေးလာပြီ လူတွေက ပိတ်မိနေတာထင်တယ်"

"အင်း မြန်မြန်သွားကြည့်ပြီး ပြန်ထွက်ရအောင် ကလေးက အအေးဒဏ်မခံနိုင်ဘူး"

ခွဲခြားက နွမ်းခါး၏ ပခုံးကနေ‌ဖေးမ ကာ ခပ်သွက်သွက်လျှောက်လိုက်ချိန်တွင် ပါးလွှာသော ရေခဲသား မျက်နှာပြင်ကို တွေ့ရသည်။ ထိုအပေါ်မှ သတိထားလျှောက်နေစဉ် အောက်ဘက်မှာ လက်ဝါးတစ်ခု ရေခဲကြမ်းပြင်‌ကို လာရိုက်သည်။ အသံတွေက အောက်ဘက်က လာမှန်း သတိထားမိတော့ ရေခဲသားပြင်ပေါ်ကနေ နွမ်းခါးကို မြန်မြန်ဖယ်လိုက်ပြီး လွတ်ရာတွင် ထားလိုက်သည်။

"အောက်မှာ လူရှိလား"

ခွဲခြားက ကြမ်းပြင်ကို ဒူးထောက်၍ နားကပ်ကာ ‌နားထောင်တော့

"မြန်မြန်လေး ကယ်ပေးပါ ဒီမှာ အေးလို့သေတော့မယ်"

အသံတစ်ခုက အောက်ဘက်မှ အော်လိုက်တော့ အထဲတွင် လူရှိနေတာ သေချာသွားသည်။ ခွဲခြားက ရေခဲသားကြမ်းပြင်ကို ခွဲရန် အသုံးချနိုင်မည့် အရာတစ်ခုကို ဘေးပတ်လည်တွင် ရှာရဝောာ့သည်။