اغصان تتحرى البليل

تكملة

السلام عليكم

اغصان تتحرى البليل
تكملة الجزء الثامن

سمعنا الباب انفتح..باوعت هالة من الشباك..
اجه احمد..ابقي تغدي ويانا وهو يوصلج مدام ابوي
ماكو..
لا امي وحدها عفتها ..حجيت واريد امشي..فات احمد
للمطبخ ..باوع وابتسامته شكت حلكه..اكول
ريحة البيت اليوم عنبر وعود..
شلونج يالغالية..
اهلا ..حجيت درت وجهي بدون اهتمام..

يلا انا رايحة حبيبة دربالج ع روحج..
وين رايحة ماتروحين الا تتغدين..
مشكور يلا الله وياكم..
يلا انا اوصلج..
انا اروح بيتنا هذا هو ومو اول مرة اروح واجي
وحدي..حجيت وافتريت ع هالة بوستها وطلعت..

طلعت من بيتهم راجعة للبيت ..امشي وافكر بسالفة
ابوي المالها حل ومحد شادلها راس..
قريب اوصل للبيت لاكتني مرة ..تمشي ووياها
ولد عمره تقريباً ١٢ سنة بس هو طويل..
بس شافتني وكفت وابستمت..الله يساعدج يمه..
ويساعدج حجية..
خو مابيج شي تبينين ضايجة..
لا الحمدلله بس تعبانة راجعة من الدوام..اجاوب
وانا مستغربة منين تعرفني..

ابتسمت وهي تتفحصني بنظراتها..انت بتمن يمه..
ضحكت بداخلي كلت بس تعرف بت منو تشرد..
انا بت ابو فيض ..
يا فدوة لطولج يمه تداومين بالمدرسة؟
اي خالة..
عندي هذا الزغير ابن ابني ماتدرسينه وشتامرين
ماقصر وياج..
الولد خجل وبقى يباوع من جوا لجوا..
لحظة فكرت بيها صدك ليش ماادرسه واطلع
مصرف يفيدنا..

اي خالة بس وين بيتكم انتو يعني من المنطقة؟
اي ذاك وينه بيتنا..امج تعرفنا بيت ابو مكي..
خوش خالة تفضلي العصر يمنا ونتفق..
يابعد كلبي وشكد تامرين..
مو مشكلة بالاول اشوف جدولي واتفرغ اله وبعدين
نتفاهم..
خوش حبيبة العصر يمكم انا..
كل الهلا بيج من رخصتج..
مرخوصة يمه..

كملت طريقي وانا مرتاحة لهاي الخطوة..
حتى لو ينطوني ٢٥ الف نعمة وابوس ايدي وجه وكفه..
بس لازم ارتب وقتي حتى مايأثر عليه..
وصلت للبيت ودخلت..فتت للمطبخ فتحت الجدور لكيت
امي مسوية تمن ومركة اجنحة على بتيتة ..
بطني وجعتني من الجوع..دخلت وانا اصيح عليها..
يمه جوعانة..

لكيتها متمددة بالهول وتسبح بيديها..ها يمه اجيتي..
اي شلونه ظهرج؟؟
كامت وهي لازمة ظهرها..اهون يمه اهون..خل اصب
ناكلنا لكمة اليوم سويتلج مركة اجنحة ..
اي شفت عاشت ايدج اروح ابدل واجي..
دخلت للغرفة ابدل واحس كلبي ممرود عليها..
امي نسخة الاصلية مالت هالة ..بس الفرق هالة
رغم خوفه وضعفها مجازفة ومرات تسوي الشي ماتفكر
بالعواقب..امي لا ..تحسب العواقب قبل التصرف ولهذا
متراجعة دوم وماتخطي خطوة..

خلصت وطلعت للهول..لكيتها صابة الصينية وكاعدة
تنتظر..
كعدت تغديت وياها وشكد استذوقت بالاكل..
صار شكد ماضايكة الدجاج ..وتمنيت هالة يمنا
وتاكل..صح هناك تاكل وتكول كلشي موجود..
بس نو بيدي شنو اكل اشتهي الها..