اغصان تتحرى البليل

٢٤

مساء الخير

اغصان تتحرى البليل
الجزء الرابع والعشرون

احس دمي نشف من شفت ابوي بهذا المنظر!!
رمشت مامصدكة..رجفة لزمتني خلتني مااكدر
اتزن ورجليه ماتن..
حجه صفوان بغضب وصوت هامس..صعديي
قبل لا يشوفج ويفرها عليج صعدي..

دنكت راسي..فتح صفوان الباب ودخلني بسرعة..
كعدت بالسيارة صافنة..بعدني مامستوعبة..
باوعت على ابوي  لف روحه بالقمصلة ومد ايده بجيبه..
اباوعله واكول لا اكيد مو هو ..
لا اكيد انا مشتبهة..بس اذا مشتبهة صفوان
ليش يكلي صعدي بسرعة!؟
ليش ماخلاني التفتت!؟؟ليش يكلي قبل لا يشوفج؟
يمكن قصده احد يعرفني !!ههه..ضحكي ع روحج
بعد لهفة ضحكييييي...

تقربت يم الباب ولزكت بي..مثل اليريد
يشبكله احد..اليريد حضن يرتمي
بي..كورت نفسي وغمضت عيني..اريد اسافر بالزمن..
اريد امشي فد عشرين سنة ليكدام..
اشوف همام زلمة معتمد ع نفسه..اشوف..اشوف
روحي وييييين.....!؟؟؟!؟

بقيت مغمضة عيوني ودموعي تصب..دماغي
لهسه مامستوعب شي..
حسيت السيارة وكفت..فتحت عيوني..واكفة
السيارة كدام بيتنا..
قبل لا انزل حجه صفوان..لهفة دربالج ع نفسج
بابا وسلمي ع الاهل..
يوصل..حجيتها بيأس ونزلت..

مشيت للباب اجر برجليه جر..فتحته
ودخلت..ماجاي اكدر الزم دمعتي..وامي..اخاف
على امي تسمع وماينطيني كلبي احجي الشفته
صعبة ..صعبة وماتنوصف..صفوان اتمنى
بعد مااحط عيني بعينه لان شافه..

وبعد ماادري منو من الناس التعرفنا شايفه او
ناس المنطقة..عندي لو ميتة لو هو ذابحني بايده
مااتأذى مثل هالاذية..
كلشي يهون الا عزة نفس الانسان وكرامته..
شلون يقبلها يمد ايده للناس وهو عنده فلوس
الدنيا..ايجارات وتقاعد وماااعنده مسؤولية
جبيرة..احنا كلنا اربع نفرااات..ليش ليش هيج
لييش...

مسحت عيوني وغسلت بالمغسلة البرا ودخلت..
سلمت ع امي وركضت للحمام وانا اضحك
جذب..بس حتى لا تشك..
همام لحكني كتله هسه اطلع..
دخلت للحمام وطاحت دموعي..غسلت وجهي
وجريت نفس ..
فتحت الباب وطلعت وانا اتصنع الابتسامة..

شلت همام وكعدت ..حاجتني امي بابتسامة..
يمه باجر عداد سجى ..خابري صاحبتج كليلها
ماترحين تدرسينها حتى نروح ..
يوو خطية عكب امتحان عدها تريدني اروحلها
من وكت..
خوش جا غيبي من الكلية وروحي درسيها..
مادري الصبح اشوف ..اروح اصلي هسه..

مشى الوقت وصارت بالعشرة ونص يلا اجه
ابوي..صح ادري بي ماشافني ..بس صار
عندي قلق..
جنت نايمة بغرفتي ومطفية الضوا..همام
نايم يمي ..
انفتح الباب ..غمضت عيوني ..بقى شوية
واكف احس بي..تالي سده ع النص وراح..
وهذا طبعه كل مايجي من برا ..لازم يفتح الباب
يباوع ويروح..

بقيت مغمضة ودموعي تنزل احسها حاارة..
نومتي طارت ودمرني الارق..عقلي تعب من التفكير
وتداخلت الاحداث كلها براسي..بقيت
لحد ماسمعت اذان الفجر..انا على فد دمعة
وشهكة صامتة..