اغصان تتحرى البليل

35

مساء الخير
كل عام وانتو بخير بمولد الانسانية وسيدها ..ومولاي وشفيعي
واميري وامير العالمين(عليه السلام)

اغصان تتحرى البليل
الجزء الخامس والثلاثون

طلعت اركض للهول..امي طايحة ومرت
عمي تضرب بخدودها..شبيييها شنوو صار..
حجيت وانا اهز بامي واحركها ..عرفتها
نوبة السكر..
لبست عباتي ولبستها ..خابرت ع باسل ..
جاوبني جان جاي بالطريق..بقيت افتر
والوب..مرت عمي تباوعلي وتستغفر..
اخر شي سالتها..شنو الصار تخربطت فجأة؟؟

اي اي يمه بسرعة داخت وطاحت..الله يساعدها
ويعين كلبها..كد ماتفكر شتريد تصير..
قبل لا اجاوبها اندك الباب..فتحته دخل باسل..
حضن امي وشالها ونزلها..مرت عمي بقت
وي همام وانا رحت وي امي..جانت المستشفى
حيل قريبة بسرعة وصلنا..

اخذوها وكعدت انتظرها مثل كل مرة..باسل
راح وي الاطباء وانا كاعدة وادعي..بكل نوبة
تجيها تاخذ من عمري مأخذ..كلش اخاف من التفكير
بفقدانها..
بعد وقت وتفكير وقلق..فاقت ودخلني باسل
يمها ..وكدرت اكعد يمها
واحاجيها..وسالتها عن سبب مرضها كالت
هيج بلا سبب..رغم اعرف اكو سبب بس ماكدر
الح عليها..وباسل نبهني مااطوخ بالسؤال
حتى لا اذكرها وترجع تتخربط..

تحسنت شوية وطلعناها..بس طول الطريق
صافنة ومالها خلك..
وصلنا وصعدناها انا وباسل ..تلكتها مرت
عمي اخذتها من باسل وصلتها للغرفة..
وباسل شال همام يبوس بي..تجي وياي صديقي..
يبوس بي ويسولف ويا..

باوعلي وابتسم..راح اخذه وياي شوية
دربالج عليها وخابريني اذا ردتي شي..
ماشي ..
شبيج..؟
شكراً باسل..مشكور هواي ..
ههه ماحب الرسميات انا ..حجه وكرص خدي
خفيف واخذ همام وطلع..

رحت للغرفة لكيت مرت عمي تعصر بأمي..
تقربت يمها وبقيت اعصر براسها..شلونج هسه
ماماتي..
الحمدلله نعمة ..وليدج وينه لا تعوفينه بحده..
اخذه باسل لا تخافين عليه..
بعد عيني هالباسل الله يچفي شر الجن والانس..
امين حبيبة..

مرت عمي كامت وعدل عبايتها ..يلا انا ترخصوني
وعدج العافية خية..ترديني ابقى يمج ؟
لا خالة ماتقصرين بس شلون تطلعين وكت
عشا..
قابل جاية اجربجن انا انتن الحبيبات وكعدتجن
ماتنمل..بس اخيج توة دكلي كال انا بالباب ..
لعد لا تكطعين بينا تعاي فد يوم من الصبح ..
اي اي دام اندليت البيت اجي ..هلا بيج بكل وكت..

نزلت ونزلت وياها اوصلها للباب..بقت توصي
بيه ع باسل وامي وهم كالت شنو ردتي
بس خابريني وانا اجيج..
تشكرت منها وراحت..سديت الباب ودخلت
جوا..

سويت لامي شوربة اكلت شوية وشربت علاجها
ونامت..
وباسل ماله خبر ادري بي ينسى روحه وي همام..
عفتهم براحتهم..اخذتلي ملابس ورحت
للحمام ..نسيت روحي جوا الماي ..استرخيت
للأخير..
خلصت وطلعت..