اغصان تتحرى البليل

١٢

مساء الخير

اغصان تتحرى البليل
الجزء الثاني عشر

فتحت الباب..امي تدك على راسها وتبجي بحركة..
ابوي وراها ومغطي وجهه بيده..
بس شافتني امي عاطت..ولج راحت اخيييتج..راحت الحنينة..
وي عيطتها طاحت بالكاع..
كلشي بذاك اليوم اتذكره ومحفور براسي..مااكدر انسى
منه شي..

سمعت حجيها واحس احد كفخني راشدي مامتوقعته..
احساسي مثل الكاعد بحضن امه وينضرب..هي شي
مامتوقع..ركضت الها وانا بلا حجاب واهز بيها..صافنة
بين حلم وبين واقع..هي هي الصدمة هاي...

هزيتها حيل...ولج يمه شبيييج..واسمع اصوات الناس التمت..
دفعني ابوي عن امي وحطها بالسيارة ..
وانا ام دعاء جابتلي عباية حطتها فوك راسي ودفعتني
للسيارة وسدت الباب وراحت صعدت كدام...
حاجت ابوي وهي تبجي..
اسرع خوية اسرررع...

دارت وجهه عليه وانا حاطة امي بحضني واباوع
باستغراب..
عاطت بيه وهي تنحب..ولج يمه عيييطي احجيي
لا تتخبلييين وج يمه بعدج شابة مو زين علييج..
حجايتها بعدج شابة فززتني..اختي اختي الشابة وراحت..
راحت بلا مااودعها..

صرخت صرخة ذاناتي انفتحت احسها...اول مرة تنزل
دمعتي من سنة واكثر يمكن...ولج هاااالة
الموووت مو الج لااااااا...
عاط ابوي بيه..سكتي امج تخربطت لا تموووت..هذا
قدرنا بوية شنسويي شبيدنا..حجه وهو يبجي..
مو قدرنا لااااا...هذا صنع ايدك..السبب منك ومن احمد
الله ينتقم منكم...
فقدت كمت اغلط واصيح واسب وابجي بحركة
كلب والطم على وجهي...

وصلنا للمستشفى وانا اركض وي امي والعباية سارحة
من راسي وام دعاء تعدلها وتبجي..
اخذو امي للطوارئ لان نوبة سكر اجتها..وانا بالكاع
كاعدة وابجي مثل الطفل وانشغ..احس هالة كاعدة بعيوني
كل لحظة وياها استرجعها وانحب...

ابوي مدري وين راح ..بس ام دعاء تجرني لحضنها
وادفعها ..فقدت كلشي حلو..وفقدت اختي الاقرب الي من
النفس..
الفطيرة الي عمرها ماحقدت على احد..بحجاية وحدة
ترضى ..مارادتها الدنيا بيها وطردتها..لان الدنيا ماتريد
النظيف كلب..
كلبها تظيف لدرجة حست راح تروح..واجت شافتني
وسولفت وياي وجنها صدك تدري هاي اخر
كعدة تجمعنا بالدنيا...

بقيت ساعات وانا اون واردد وي روحي..
الى اجه ابوي يمشي ومدنك..
تقرب وكف يمنا..حجه بانكسار..كومي لهفة
كومي وي اختج انطونا الجثة..
كمت بسرعة وعثرت ولزمت بالحايط..وينها ويين..
امشي بوية..حجه ومشى كدامي مدنك..
ام دعاء لزمتني كالت يمه ماكدر اعوف امج ولا اكدر
اعوفج..

حجيت وانا انحب ..خالة ابقي وياها انا اروح وي
اختي ..
باست ايدي وبجت..قوي روحج يمه هذا المكتوب
حبيبة..
هزيت راسي ودموعي تصب..جريت ايدي منها
ومشيت ورا ابوي..
اباوع اطلعنا من المستشفى ..سالته وانا اجر نفس..
وينها وين رايحين..
فتح السيارة وجاوبني ..للمغيسل بوية..