اغصان تتحرى البليل

٩

مساء الخير

اغصان تتحرى البليل
الجزء التاسع

تراجعت ليورا شوية..واحمد منتجي ع الباب
ورافع حاجبه..اجه وكت الحساب واريد حصتي..
شديت ع البسمار وخليته بين اصابعي..حجيت بكل
هدوء..حساب شنو؟؟وماتخاف تطلع هالة لو امك يشوفونا؟؟
لاا محد هنا ..امي عد بيت اخوي واختج بالدوام..
اممم يعني مضبط وضعك!
اي تصدكين من الصبح لهسة ماكدرت اكعد من حماسي
وانا انتظرج!

يوو وليش هالحماس بلة يالمهتلف..
تقدم عليه ونظراته تزفني من فوك لجوا..حبج هتلفني
اخ مو وجه هذا مراية خرب اهلج..
صار كدامي كلش ..وجهه قريب وجهي..جانت ردة
فعلي برود وهدوء مفرط..
غمض عينه مندمج ومسترخي..دفعته بسرعة وركضت
للباب..

اجه ركض لزمني من اكتافي وجرني..
رفعت البسمار وشخطت وجهه بكل قوتي..
صرخ ولزم خده متفاجئ..رجع ورجع يريد يلزمني
دفرته طاح بالكاع..
وخرررر اذا مديت ايدك عليه هذا البسمار انبته
بعينك واعميييك...
كام ولازم خده بيده ووجه انلطخ دم ..

حجيت وانا خازرته واعصابي صارت نار..تعال يلا
تعال الا ابططط عينك..
احجي ومادة البسمار وايدي الثانية فتحت الباب
بسرعة ومشيت حيل..

مالتفتت وراي ولا خليت نفسي اخاف..كملت طريقي
واحس ريكي نشف من المشي السريع..
وصلت للبيت فتحت الباب لكيته مقفول..دكيته
مرة ومرتين ماكو...استغربت ماي وين
راحت !انوب احتاريت وين اروح زين شسوي هسه؟
رجعت دكيت الباب حيل وماكو رد معناها صدك طالعة..

استحيت ادك الباب ع بيت ام دعاء ودنيا ظهر..
اكو قطعة ثرمستًون دائما يكعد عليها ابوي بالباب..
طلعت كتابي حطيته عليها وكعدت..اكلني القلق ع امي
وافكر وين راحت!يمكن راحت للمركز معقولة!!راحت تسأل
عن ابوي!بس امي خوافة ماتسويها..
انسطرت من التفكير وتعبت وانا ع كعدتي والرايح والراجع
يصفن عليه..

ورا شوية انفتح باب بيت ام دعاء..طلع ابو دعاء وباوعلي
بقلق..شبيج عمي ليش كاعدة هنا،؟؟
كمت من مكاني وحاجيته..عمو ماتدرون اذا امي رايحة
لمكان يعني انطتكم خبر لو شي؟لان اجيت لكيت الباب مقفول..،
لا بوية مااتوقع..بس تعاي طبي جوا وسالي
خالتج..

لا عمو اذا تكدر صيحلها هنا احاجيها..
فتح الباب وصار ع جهة ..طبي بوية انت جا انت غربية
شنو ..صاح ع ام دعاء بصوت عالي..وكال دخلي
جوا..
دخلت للحديقة وهي اجت تركض..شافتني استغربت..
هلا يمه تعاي تفضلي..
دخل الو دعاء من وراي وحاجاها..وهي استغربت
من سالها ع امي..وكالت راح اخابرها واشوفها
ومن دكت عليها ماتجاوب وانا اعصابي تلفت..
اخر شي كالو ابنهم يطفر على بيتنا ويفتحلي الباب
وادخل خاف طايحة بالبيت وماندري ..

اجو وياه وطفر وفتحلي الباب..دخلت مفرفحة..
فتحت باب المطبخ ودخلت اصيح بصوت عالي
يمه وينج يمه انت هنا..
وصلت للهول واشوفها طايحة بالكاع..ام دعاء وراي
اجتلها تركض تكعد بيها..
وانا لزمت ايدها باردة ثلج ..انخطف كلبي وانا ادعي
ياربي كون عايشة ..
جسيت نبضها حيل ضعيف..