اغصان تتحرى البليل

١١

السلام عليكم

اغصان تتحرى البليل
الجزء الحادي عشر

باوعت بس الكتاب بيدي والجنطة ماكو!
وكفت بمكاني وبقيت اباوع للكاع..خاف طايحة
من عندي..رجعت ع طريقي وانا امشي ومركزة
بالكاع وادور بس ماكو..لحد ماوصلت لباب المدرسة
ومالكيتها..والمشكلة اتذكر انا جنت لازمتها بيدي
يعني ماناسيتها لا اكيد طاحت ..

دخلت للمدرسة وسالت البنات الموجودات..كالو تولي
هي بيها اقلام ماتسوى لا تضوجين..سكتت وماكدرت
احجي كدامهم بيها مصرفي..ماريد وحدة تنطيني لو
تشفق عليه..
اخذت كتابي وطلعت ..

امشي ع نفس الطريق ومامليت من التدوير بس ماكو
فايدة..
زين هسه شلون ارجع!المسافة بعيدة ومو كلش اندل
اطلع منا..صح باوعت من السيارة من اجينا ع الطريق
احفظه..بس بعدني اول يوم ومو كلش حفظت الطرق..
بس ماكو غير هالحل..امشي واسأل الناس واكيد
اوصل انا مو طفلة واخاف اي اي انا جبيرة ومسؤولة
عن نفسي..

بديت امشي لحد ماوصلت لنفس الشارع النزلت بي
من الكية..
اخذت الطريق وكمت امشي عكس اتجاه السيارات
لحد ماوصلت تقاطع..
زين منا هم اتذكر ..مشيت ومشيت احس هلكت..
عبرت شارعين وحسيت طريقي غلط..
لازم اسأل احد حتى مااتيه..
جانت اكو ع الشارع محلات ..اغلبهم واكفين بالباب
لان ساعة ١١ وهيج وقت الشغل قليل...

شفت ولد شاب واكف بباب محل حلاقة..رحت
اسأله لان الوحيد من اجيت امشي من بعيد
ماحط نظراته عليه..الاغلب عيونهم تاكل
اكل ..
تقدمت ووكفت مسافة مترين تقريبا..السلام عليكم..
هو عدل وكفته وجاوب..عليكم السلام تفضلي اختي!
اذا تعرف منين اطلع لمنطقة ...؟

قصدج عبرية؟لان منا ماكو بس تكسيات..
لا لا مشي..
مشييي..حجه وهو صافن يعني يستجمع الكلام..
شوفي خوية..تخلين الشارع العام بظهرج وتطلعين من هذا
فرع محل التلفونات..ودخلي بهذا الفرع عبري
وعبري الفرع الورا..اكو مستوصف من الفرع مالته
وامشي..هذا الطريق يوصلج لمنطقة..... تندليها؟
ايي اندلها قريبة علينا..
اي هو منها وطلعي اذا تندلين لو اوصفلج؟

لا تسلم الف رحمة لوالديك ماقصرت..
بالخدمة خوية معتازة شي ؟كولي وحسبيني اخوج..
لا شكرا الك من رخصتك..
حجيت وانا امشي مثل ماوصفلي..
بس تعبت وريكي نشف لان الشمس عمودية
والجو حاار..احس شفافي خشبت..وصلت يم المستوصف
بعد عناء طويل..

من عنده ومشيت ..الدنيا ظهر وصيف قليل الناس
بالشارع ..تذكرت البسمار بقى بالمحفظة..
يلا بعد انا وحظي اذا تعرضلي احد..
بعدت من يم المستوصف شوية ..احس حيلي انهد..
دخت وانا ماماكلة غير استكان الجاي والنص خبزة..

باوعت منطقة كلها بيوت وهادئة..
التفتت من الجهتين محد..اكو اشجار صايرات بنص الشارع..
كعدت بفي الشجرة وانا اجر نفس طوييل..
مددت رجليه وانتجيت ع الشجرة ..حرارة الكاع
صعدت لبطني بس مابيه اكوم اريد اريح رجليه..
اباوع بعيوني بلكي الكى حنفية ماي برا مدام اكو
شجر يعني اكو ماي..
مادة ايدي لرجليه اعصرهم وعيوني تفتر وتدور
بس ماكو..