اغصان تتحرى البليل

٢

مساء الخير

اغصان تتحرى البليل
الجزء الثاني

خنكني من ركبتي بيديه الاثنين..طاحت الجنطة من ايدي
وانا ارافس..
دفعني بالكاع اجه ظهري بالطابوك المسيجين بي
الزرع..
احس لحم ظهري تملخ..
كعد كدامي وعيونه تريد تطلع..باوعتله بلا مانزل
دمعة وفاتحة عيوني بحقد..
احجي ساقطة زبالة...شتى انواع الغلط والكلام
اليندي اله الجبين..

نزع..نزع شحاطته ...وجانت ..جانت..
رجالية ثكيلة وكلها طين...
وضربني بيها على عيوني ..نزلي عينج عين ....
ماتنكسررررر..
صرخت بصوت عالي..

امي وهالة صارو فوكي وبس يبجون..عوفها دخيلك
شبيها كافي عوفها..
بس هو شحاطته نقشت جسمي من وجهي لايديه
لظهري..
ماردت ابجي بس صوت عياطي يزيد وي كل ضربة..
اتلوى من الم الضرب ومرعوبة من هجمته عليه..
ومنين ماريد اشرد يلزمني ويضرب..

اخر شي استجمعت قوتي كلها ودفعته..لان حسيت
طاقتي خلصت بعد ماتحمل..
بدفعتي اله طاح ع التنور ..كمت ومادري شلون كمت..
بس الاتذكره انا ركضت جوا وفتت للحمام وقفلته..

كعدت بالكاع وانا اجر النفس كوا وصوت صياحه
يقترب..
فاسدة..بت الحرااااام..تمدين ايدج عليه؟؟؟؟
اقترب الصوت وصار بالباب..رجفة سرت بيه ونملت..
حتى الوجع نسيته..
بس خوف ..خوف من هذا الانسان الي المفروض
يكون حضني الدافي..يكون خيمتي..
حضنت نفسي واقويها..لهفة تقوي عوفي الخوف عوفي
الضعف..

ودكاته على باب الحمام تتضاعف..فتحي الباب لو اكسره؟؟؟؟؟
ماريد اكسره لان اغلى منج..
خوووش خوش لا تطلعين..هسه انا اعرف شلون اخلص
منج..
اختفى صوته شوية..واسمع صريخ..امي تصرخ
واول مرة هيج اسمعها...
يبوووووو احركني كبلها ثابت احركنييييي انااا..
بقيت صافنة شنو احركني!!!

فتحت الباب بخوف تخيلت راح يأذي هالة وامي
صرخت..
طلعت واشوف جاي عليه وبيده دبة النفط وامي
مجلبة بملابسه وتبجي بكل حيلها..
بس شافني فتح الدبة ويريد يفرغها عليه..بين
صرخات امي..دخل جيرانه ابو دعاء وابنه ومرته
يركضون..

على بختك حجيي..جرتني ام دعاء لحضنها وتباوعلي
بوجه مخطوف من الصدمة..
اباوع لهالة واكفة وراهم وعيونها تصب..
ابوي اخذو ابو دعاء وابنه وطلعو..
وانا اخذتني ام دعاء للغرفة والمرة ترجف اكثر مني..
امي ولهفة وراها دخلو وسدو الباب..

كعدتني المرة بالكاع وهي تقرا وتسمي عليه..لان شافتني
فاصلة..
بس عيوني ناطة وبية رجفة...
اجت هالة بيدها هدوم الي كابلتني ودموعها تنزل..
امي طلعت ورجعت بيدها
وصلة وطاسة ماي..
كعدت يمي..وانا بحضن المرة وخانسة وهي تمسح على
راسي..
حقها يمكن ضاع الكلام منها ..

امي بللت الوصلة وحاجت ام دعاء.. حبيبة خليني
انظف وجهها ..تحجي وصوتها مخنوك لان صرخت..
قربت الوصلة المبللة من وجهي ..رجفت وتوجعت..
جان وجهي مطين من الشحاطة ..واحس يسمطني
لان تزلغ..
شوي شوي كملت..