مساء الورد احبتي ❤️
/// البارت الثامن وخمسـون /////
#بيوت_بلا_جدران
#شمس_السعدي
----------------------------------------------
الليل يسأل من أنـا …
أنا سرة القلق العميق الاسـودُ …
أنـا صمتـهُ المتمرد ُ…
قنعت كنهـي بالسكون…
ولففت قلبي بالظنون ...
وبقيت ساهم هنا .. ارنو وتسألنـي القرون ..
أنـا من أكون ؟؟
والريح تسأل من أنـا…
أنـا روحها الحيران انكرنـي الزمان ..
انـا مثلها في لامكـان ..
نبقى نسير ولا انتهاء ..
نبقى نمر ولا بقاء ..
فأذا بلغنا المنحنى .. خلناه خاتمـة الشقاء ..
-------------------------------------------------
اجت عمتي مهجة رادت تحجي وياي دفعتها وطلعت
اريد احجي اريد اعيط صوتي اختفى ..
افترت الگاع بيه ووكعت بوسط الحوش ..
التمن عليـه كلهن ..
صاحت بيبي دنانير .. " وخرن عنها خلها تشم الهوى "
عيوني تدور ماتعرف شتريد ..
احس نفسي بوسط ذياب .. لو حجيت يموتوني ولو سكتت اموت ومااتحمل ..
تحجي وياي بيبي دنانير ..
" شبيج جدة احجي شتحسين ؟"
نزلن دموعي وبالگوة الحجي يطلع مني ..
" درع .. درع "
اجت عمتي حورية گومتني وهمست ..
" گومي لاتفضحينا بعدين افهمج "
سألتني بيبي دنانير ..
" شبي درع يمه احجي "
رديت بصوت مخنوگ ..
" درع اخوي طلع درع اخوي وتوأمي "
صفنن بوجهي كلهن ..
" شنو اخوج ؟؟"
عمتي مهجة ردت ..
" هاي تقصد لان امها رضعت درع واني هناك مريضه خبصتنا اخوي واخوي "
صحت بيها ..
" كافي حرام عليكم كافي .. شسوت امي وهيج تظلموها .. ماكفاكم اخذتوا ولدها كلهم ودور طلع ولد ثاني وماتعرف عنه "
عاينت عليها ..
" شلون فهميني شلون اخذتنه ومن غير محد يحس وشلون اطاجن گلبجن "
صاحت بيه عمتي مهجة ..
" كافي ولج شتمخرطين انتي تسودنتي .. هسا اصيحن منهل عليج وتعرفين منهل شيسوي "
ملخت نفسي بلا وعي واني اصلا جنت بلاوعي ساعتها..
" صيحيه خل شيسوي يسوي هي روح وحدة وخل ياخذها بس بعد مااسكت على ظلمكم النا .. انتي واخوج وامج حطموا حياتنا دمرتونا "
سحبتني عمتي حورية گومتني وخلت ايدها على حلگي ..
" گومي وياي كافي فضحتينا "
اخذتني للغرفة واجت عمتي مهجة ورانا والعيون كلها علينا صافنه ومستغربه مثلي واكثر ..
دخلتني ولطمتني على وجهي ..
" اصحي كافي اصحي واوعي راح تودين روحج ورجلج وبيتج للموت شمالج ماتفتهمين "
اجت عمتي مهجة لزمتني من شعري ..
" كلمة وحدة بعد وتندمين تخسرين بنتج ورجلج وامج وياهم "
بجيت ..
" مو حرام عليج شلون اخذتوه وشلون گلتن الامي مات ودفنتوه "
ردت ..
" انتي تسودنتي درع ابني جنا نحجي لان امج مرضعته "
YOU ARE READING
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
