مساء السعادة عليكم احبتي ❤
/// البارت خمسة وثمـانون /////
#بيوت_بلا_جدران
#شمس_السعدي
----------------------------------------------
خليت علي يم ماسة يردون يسولها زرع ..
وعفتهم ورحت للامام بگلب يفرفح وابجي ..
ربي لاتوجعني ببنتي.. جانت مثل الوردة كلها تحسدني عليها وعلى شطارتها ..
شسوة بيها هيج بيوم وليلة بنتي انگلبت احوالها ..
ربي منك اريدها بجاه اهل البيت عندكم ..
جنت يائسة ومااعرف شسوي بس ابجي والناس والعالم كلها تعاين عليه وتگلي ..
الله ينطيج مرادج ان شاء الله ..
حسيت الدنيا اسودت بوجهي حتى درع اليركض وراي ويحجي مااسمعه بس ابجي وادعي طول الطريق ..
هسا حسيت بوجع امي من صدك حسيت بخوفها والمها على اخواني ..
جانت تگلي ..
" خليهم بعيدين وسعيدين .. اهم شي مايصيبهم مكروه"
بنتي ربي بنتي اريدها منك .. ذبلت بيوم وليلة..
منين اجاها هالمرض الاكشر ..
مايوم شكت وبجت من بطنها .. مثل الوردة المفتحة ليش من كبرت وحلت بالعين هيج صار بيها..
جنت گاعدة گبال الامام وابجي ودرع حاضني ويبجي وياي ويدعي .. ويواسي بيه ..
همس..
" فوتي جوة وابجي "
رديت ..
" لا ماافوت .. اذا بنتي ماتطيب ماافوت .. اجيبها واجي واطش جكليت بوسط الحضرة .. هسا منا اطلب مرادي "
بقينا شوية وگومني ..
ماردت ارجع للمستشفى واشوفها .. خايفة حيل جنت
دخلت شفت علي وماسة منتظرينا ..
جانت نايمة على السدية ولازمة ايد ابوها ..
عاينت عليها وابجي .. اشرلي علي اسكت ..
فتحت عينها ..
" ماما وين رحتي "
بست راسها ..
" يبعد امج رحت زرت ودعيتلج "
همس علي ..
" خلونا نرجعها للفندق تعبت هنا "
رد درع ..
" والدكتور گلتولو راح نطلع ؟"
رد علي..
" بنتي ماتريد تبقى هنا .. وماكو شي بعد غير ننتظر نتائج الزرع بعد شعندنا باقين .. "
رجعنا للفندق همست ..
" جوعانة ماما "
ابتسم علي ..
" اي بابا گولي شتردين لو اخذج للمطعم تاكلين "
رديت ..
" لا وين تاخذها خلينا نجيبلها لهنا "
رد درع ..
" عجل ابقن هنا بين مانروح ونرجع "
راحوا هو وعلي يجيبون غدا ..
واني بقيت يمها ..
شفتها مسخنة گومتها سبحتها .. ومشطت شعرها ..
رادت اضفرلها ..
ضفرته الها ورجعت نامت ..
بقيت مگابلتها وگاعدة .. اتلمس بوجهها وشعرها ..
ربي لاتحرمني من ملاكي هذا ..
تذكرت اول ماحبلت بيها شلون ضجت وماردتها .. وردت اطيحها ..
كبرت گبال عيني مثل الوردة .. جانت بلسم بحياتنا اني وامي .. اتذكرها من تغار على امي مني وتبعدني عنها تريد تنام يمها وتصيحلها يمة ..
YOU ARE READING
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
