صباح الورد احبتي ❤
/// البارت ستـون /////
#بيوت_بلا_جدران
#شمس_السعدي
----------------------------------------------
اوكف يادمع لاتجرح الخدين
ولا تكسر خواطر هي ..مكسورة ..
اوكف وانتضر ارد احجي انه وياك
واسمعك قصتي عالناس مشهورة ..
انه اول بشر مايعطش بصيف
انه ارتوي بس احضن الصورة ..
اوكف يادمع لمن اكلك طيح
وارسملي بنزولك صوره مقهورة ..
صورة طير جان يطير بين الغيم
شلون يطير هسه وجنحه مكسورة ..
-------------------------------------------------
بقيت گاعد لليل مااريد ارجع للبيت ..
دگ التلفون .. شلته ..
جان درع يحجي ويبجي ..
" الو علي .. دگيت وجنت متأمل الگيك هين .. "
رديت بصوت مخنوگ ..
" شبيك درع صاير شي "
رد ..
" جدي مات .. مات بسببي "
غمضت عيني وتنهدت ..
" انا لله وانا اليه راجعون "
الى رحمة الله .. شوكت ؟؟
" المغرب وي الاذان اجاني الخبر مثل الصاعقة.. اكثر انسان حنين عليه راح .. عجل منو الي بعدو "
رديت ..
" وكل امرك لله .. ماعندنا غيره .. اني جايك من الصبح ان شاء الله "
رغم الوجع البداخلي والالم والصدمة والاحساس بالغدر بس مااگدر اعوفه واحده ..
احس همه اكبر من همي .. اذا اني انخدعت بأمي وطلع ابوي مو ابوي الحقيقي .. فهو فجأة صفا بلا احد ..
لا اهل .. لا عشيرة ..
زادت امانات رضوان الي .. لازم اكون اله اخو جبير وكأنه رضوان موجود ..
عاينت الملابسي .. لازم اسبح وابدل ..
دست على جرحي وگمت ..
أين نضع كل هذا الحزن ؟
تخلعت أكتافنا ..
رجعت للبيت .. دگيت الباب طلعت رحمة ..
يمكنها مانايمة منتظرتني ..
" وين رحت بالي يمك "
فتت من غير مااحجي ولا كلمة .. دخلت الغرفة جان حسوني گاعد ويعاين ..
اتقربت منه .. دنگت بسته وشميته ..
حسيت بنقاء روحه ..
" يمكن انت اكثر شخص نقي بهالدنيا "
دخلت وراي ..
" زعلان مني ؟؟ "
گمت طلعت ملابس من الكنتور ..
اجت صارت بوجهي ..
" لاتسوي هيج وياي اموت والله .. صيح .. احجي .. اتعصب .. بس لاتسكت .. عبالك بيدي بس ماگدرت .. وعمتي هم خطية…. "
قاطعتها ..
" اششششش ولا كلمة .. اكثر وحدة انتي تعرفين مااحب الجذب ولااحب احد يضم عليه .. ولج حياتي وسرها كلها بيدج جانت وماتگليلي .. شلون جنتي تگدرين تنامين بالليل وياي على نفس المخدة وانت ضامه عليه هيج سر "
رادت تحجي سكتتها ..
" مو وكتها .. هسا اني مو بوعي واذيج بالحجي لو بقينا نحجي .. هسا اني رايحة للغربية "
سألت ..
" توك اجيت درع بي شي ؟"
اخذت هدومي وردت اطلع ..
" جده توفى "
أنت تقرأ
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
