اسعد الله اوقاتكم بكل خير احبتي ❤
/// البارت التاسع وخمسـون /////
#بيوت_بلا_جدران
#شمس_السعدي
----------------------------------------------
رجعنة منين ما جابتنة الايام
المطر من ينزل من الغيم مرغم
كسرنة الحجي البعيونة بماي
حتى اليقرة يلكة المعنى مبهم
جمعنا همومنا بنصين الفراك
ولكينة بذاكرة عشرتنة منجم
اصعب موقف بلحظات الاوداع
من اشوف الجنت تبني تهدم
من تقوي كلبك وانته مجروح
ما مهتم تبين وانته مهتم
من تبتسم بس بداخلك نوح
الدموع اباب عينك سكتة تلتم
تضطر تمشي لكن وانته مكسور
عزت نفسك تبررلك الهم
وراها تعيش لكن گلبك يموت
وحساسك الطيب يبدي يفهم
ماتحلم بعد بل عنك يروح
وما مسموحلك يومية تندم
كل جروحنة وكل المعانات
من ما من وره الناس البيها نحلم
-------------------------------------------------------
صدمة تليها صدمـــــــة حينما يلف حديثك الصمت ولن تستطيع التعايش معه ولا تصل معه لصبراً والخطـــىء يتجول بكل حرية ولا تستطيع أن تحرك ساكناً لتصير به مبصراً وتتشكل بالاحتدامات لتكون تمثال بشكل صامت شكلته معالم القهر !!
" روح اسأل امك ابوك منو ؟"
هالجملة بقت تدور بدماغي وعقلي حسيته ينشل ..
شني من ابوي وليش هيج گالتلي ؟؟
اعاين الييتهم هوسة ناس تاكل بناس وكلها تصيح ودرع شرايينه نطن وعيونه حمر من العصبية وهو يگلها اني منو وابن منو ..
ساعة يتوسل بيها يگلها گولي اني ابنج ولاتدمريني !!
وساعة يصيح ويگلها ليش سويتي بيه هيج ؟؟
حاولت اتملك اعصابي واتغاضى ..
اجيت اوگف وي درع مااگدر احجي ولااگدر اعوفه وامشي ..
جان درع واگف ودموعه تصب ..
وابوه يحاسب امه ..
" مهجة احجي ولج اهاجس نار بيه درع ابني لو لا ؟"
رد درع ..
" يابة انت عندك شك اني ابنك "
عاين عليه ابوه وصار يبجي ..
" يول انت روحي قطعة منها .. عجل يوم الشفتك ودحكت بيك اهاجس الدنيا ضحكتلي وفتحتلي بوبها .. اشنو عبالك هالحجي سهل عليه .. وابني وصديقي والربيتو على ايدي يطلع مو ابني .. انت كلشي بحياتي وفجأة اجه كابوس دمر هالحياة "
بجه درع ..
" انت ابوي ورفيق عمري وصديقي .. الحضن الدافي وحنيتو الانام بيها بالليل . والظهر الاسند نفسي عليه .. انت اخوي لان ماعندي اخو .. ماكنت بس اب بالنسبة الي .. كنت احسد نفسي على النعمة الاني بيها عجل دوم اگول اني محظوظ بأبوي وجدتي الكانت امي الربتني وجدي وشيخي الكان يتنومس بيه جثير گدام ربعو وولد عمومتو وعشيرتو .. كل هذا فجأة ينتهي ويطلع سراب شلون اعيش بعد شلون اگدر اتحمل هالحقيقة احجي دحگي بيه واحجي گولي الحقيقه.. گولي السمعتو من رحمة و خالتي حورية كذب والفصلية مو امي ولا اهلج اهلي لان اموت يول اموت اهون من هاي الحقيقة المرة "
YOU ARE READING
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
