صباح الفل والياسمين عليكم حبتي ❤
/// البارت احدى وستـون /////
#بيوت_بلا_جدران
#شمس_السعدي
----------------------------------------------
هل ستشفى أرواحنا يوماً ما ؟؟
أم ستفارقنا هذه الأرواح وهي متعبة .. !!
-----------------------------------------------
دخلت جان ضوة غرفه امي مفتوح ..
اخذتني رجلي الها ..
فتحت الباب جانت تقرأ قرآن .. حست بوجودي ..
شالت راسها ودمعت عينها..
اتقربت منها لااراديا ..
تمددت بحضنها وغمضت عيني .. ماردت اسمع منها الحقيقة .. بگد ما ردت احس بطفولتي الحلوة وياها ..
بقت تمسد على راسي..
واول حجاية حجتها ..
"سميتك علي على اسم ابوك الحقيقي جان اسمه علي"
اقشعر بدني من سمعتها ..
شلت راسي .. احجيلي عنه .. احجيلي كلش لاتضمين عليه بعد ..
اتنهدت ..
" من صغري واني ماحبيت غيره .. جان خالك ياخذنا اني وجوري ونروح البيت خالتي .. نتذكر بيها ريحة امنا ..
خالتي عندها ثلاث ولد وثلاث بنات .. وعلي جان اصغرهم ..
لان خالتي الجبيرة جانت ومتزوجة گبل امي ..
نكيف نروحلهم علمود العب وي البنات ..
الشيخة جانت ماتحبهم وتمنعنا عنهم .. بس حطاب ياخذنا من وراها بحجة نلعب .. مو بعيدين علينا همة ..
جان گصيبتي الحد رجلي واني حلوة وبيضة .. يجي علي من المدرسة يضوج يشوفني العب بالشارع ..
يزمخ بيه ويگلي فوتي ..
اضوج وانقهر واشكيه الخالتي ..
وخالتي تضحك وتگلي .. " يغار عليج جيف اريدج اله "
صفنت عليها ..
" شني اريدج اله "
ضحكت ..
" بعدج صغيرة .. بس من يوم الاجيتي للدنيا واني گلت الامج حورية العلي .. وعلي الحورية جيف جنتي بدر منور وشحلاتج .. وهو جان هم حلو وابيضاني عليه طالع "
جنت ماافهم شتحجي وشتقصد .. بس يوم عن يوم وشهور وسنين بديت افهم شنهي قصدها ..
صرت من اشوفه ويزمخ عليه مااضوجن ولاانقهر عبن ادري بي يغار عليه اعله گولت خالتي ..
نجح ودخل دار المعلمين .. ورحنا نباركله…
واول ماشافني ابتسم ..
" حورية راح اصير معلم واجي اخطبج من الشيخة ترضين ؟"
خجلت وصارن خدودي حمر ..
رحت يم خالتي گعدت وعيني مافرگت عينه ..
بقت جلمته بأذاني.. وصرت اتخيل روحي عروس ومزفوفه العلي ..
وكلما اشوفن عرس اتخيل روحي اني وعلي ..
جنت اگول شعاجبه بيه اني .. هو متعلم ودارس ومثقف وراح يصير معلم ..
لين بيوم سألته ..
وجان جوابه ..
" الگلوب ماتعرف هالسوالف .. اذا دگ الگلب معناتها توقف العقل عن التفكير .. وانه من يوم الشفتج دخلتي هالگلب وعشعشتي بي "
جان حجيه حلو ومن يتغزل محد يلحگه .. عبن يگول اني اذا احب مااشوف بس الاحبه .. وحبيتج اني حورية .. هنيالج على حبي المايفارگج للموت ..
YOU ARE READING
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
