صباح الورد احبتي ❤
/// البارت السابع وثمـانون /////
#بيوت_بلا_جدران
#شمس_السعدي
----------------------------------------------
قـد نفتـرق و قــد....... نرحــل و قــد لا نلتقــــي لــكن يبقـى.... صداك في داخلـي للأبد واعلم انه ليس الاعجـاز ان نحب انما الاعجاز ان يزداد الحب رغم البعد !!..
----------------------------------------------------------
خالي راد يغير الحجي ..
رد ..
" نسيت ابشرج .. اني ومهران جنا بديالى .. راح نسترجع گيعانه وبيوتنا .. وقررنا نرجع كلنا لهناك ونجتمع سوية مثل گبل .. ونريدج ترحين ويانا هناك شتگولين ؟"
صفنا بوجه امي منتظرين ردها ..
ماگدرنا نحجي لان نعرفها شلون متعلقة بجلولاء وذكرياتها وتحب ترجع لهناك ..
بس جان خوف بداخلي انه تروح وابقى وحدي مستحيل اگدر اعيش بلياها يوم اذا مر ومااشوفها اتسودن ..
ردت ..
" خوية تعرف كلش زين جلولاء شنو بالنسبة الي .. عشت بيها احلى سنين عمري .. "
لمعت عيون خالو مهران وابتسم ..
كملت كلامها ..
" بس هسا مااگدر ارجع لان ولدي هنا .. بعدهم مامستقرين وحياتهم مخربطة .. تونا انجمعنا وتونا بدينا بحياتنا سوة .. شلون تريدني اعوفهم وامشي "
رد خالو عدنان ..
" يرحون ويانا هناك "
رد رضوان..
" منو يروح ؟ درع ويداوم ببغداد وهو هنا بالگوة متأقلم وعايش علمود امي .. واركان ومستحيل يروح وبيته وحياته هنا .. ورحمة هنا يم رجلها وجهالها .. واني مااگدر اعوف اخواني ولا امي تگدر مو يمة ؟"
هزت راسها ..
" اي خوية حجي رضوان صحيح مثل ماگلتلك اني بعدني ماشبعت منهم وهالتشوفهم كلما المهم يتطشرون بعد وكتي وحياتي صارت الهم واذا على جلولاء من تستقرون بيها اجيكم واشوفها "
خوالي ضاجوا وبالاخص خالو مهران ..
گام رضوان ..
" راح اخابر اركان اذا فارغ يجي يشوف خوالي "
خابره ورجع ..
گال مايگدر اليوم باجر يجون ..
اركان ..
من گطعت الخبر من نورا ..
صرت اروح قليل البغداد .. علمود ولد مكلفة بشغلة نفتحلنا مشروع اني وياه ..
الفلوس العندي والاخذتهن من ابوي بديت اصرف منهن واذا ابقى گاعد معناتها اصرفهم وابقى هيج ..
لو وحدي مااهتم بس هسا عندي بنية ومرة حتى لو مو مرتي من صدك بس اسمها على ذمتي وام البنتي ..
رجعت للبيت تلگتني فاطمة ..
" ابوي خابر يگول ضروري تخابره "
استغربت ..
سألتها ..
" صاير شي ؟"
ردت ..
" والله مااعرف بس هو سأل عليك وگلتله ببغداد عندة شغل .. گال خلي يخابرني "
اتصلت عليه ..
طلعتلي وحدة منهم گلتلهن اريد ابو فيصل ..
أنت تقرأ
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
