SOULMATE[Complete]

Part 21

#Unicode#

"သီဟ သက်သေတွေ ရလာရင် ဘယ်သူ့ဆီ အပ်မှာလဲ......" ဆိုပြီး မြင့်မြတ်မှ သီဟကို မေးလိုက်လေသည်။

မြင့်မြတ်ရဲ့ အမေးကြောင့် ဆိုင်ထဲက လူတွေက သီဟကို စိတ်၀င်တစားဖြင့် ကြည့်နေကြလေသည်။ မြင့်မြတ် မေးလိုက်တဲ့ မေးခွန်းသည် အရမ်းအရေးကြီးသည်။ ဝေယံလင်းထွန်းဆိုတာ အညတရ မူးယစ်ဂိုဏ်းချုပ်မှ မဟုတ်ဘဲ။ အထက်လူကြီးတွေနဲ့ သိနေ၊ခင်နေတဲ့ သူဘဲမလား။ မတော်လို့ သက်သေတွေကို လူမှားပေးမိတယ်ဆိုရင် စီစဉ်ထားတာတွေက သဲထဲ ရေသွန်သလို ဖြစ်ကုန်မှာပေါ့။ ပြီးတော့လည်း လူပင်ပန်းတာဘဲ အဖတ်တင် ကျန်ခဲ့မှာဘဲပေါ့။

ဒါကြောင့် သီဟလည်း တစ်ချက် ပြန်ပြီး စဉ်းစားနေတော့၏။ ထိုင်ပြီး စဉ်းစားနေရင်းမှ သီဟထရပ်လိုက်သည်။ ပြီးနောက် ကောင်တာနားကို သွားလိုက်လေသည်။ ကောင်တာနား သွားလိုက်ပြီး သီဟ တစ်ယောက် ဆိုင်မှာ ကူလုပ်ပေးနေတဲ့ ကောင်မလေးကို ခေါ်လာလေသည်။ ပြီးတော့ ထိုင်ခုံလေး ယူပြီး ထိုကောင်မလေးကို ထိုင်ခိုင်းတော့သည်။

အားလုံးမှာ ကြောင်တောင်တောင်လေးဖြင့် သီဟကို ကြည့်နေလေသည်။ အကူကောင်မလေးလည်း ကြောင်တောင်တောင် ဖြစ်လို့နေလေသည်။

"ဘာလုပ်မလို့လဲ ချစ်" ဆိုပြီး မြတ်မင်းကိုမှ မေးလိုက်ပြန်လေသည်။

သီဟမှာ ထိုအကူကောင်မလေးကို ကြည့်ပြီး
"သူဘဲ ရဲစခန်းကို သွားရမှာ" ဟု လက်ညိုးထိုးကာ ပြောလိုက်လေတော့သည်။

"ရှင်..... အကို..... ညီမက ဘာလုပ်လို့ ရဲစခန်းကို သွားရမှာလဲဟင်.... ညီမ အလုပ်တွေလည်း ပြီးအောင်လုပ်တယ်လေ..... ပြီးတော့ ပိုက်ဆံတွေလည်း မဘတ်ထားပါဘူး အကို" ဆိုပြီး ထိုအကူ ကောင်မလေးမှာ သီဟကို ပြာပြာသလဲဖြင့် ပြောလေတော့၏။

"ချစ်.... သေချာ ပြောပြလိုက်လေ" ဟု မြတ်မင်းကိုမှ သီဟအား ထပ်ပြောလိုက်ပြန်သည်။

ဒါနဲ့ သီဟမှာ ထိုအကူကောင်မလေး အနားသို့ သွားလိုက်ပြီး
"အကို တောင်းပန်ပါတယ်.... ညီမ.... အကိုက ညီမကို ရဲစခန်းကို သွားဖို့ အကူအညီတောင်းမလို့ပါ.... ခဏက ပြောချင်ဇောနဲ့ ပြောလိုက်မိလိုပါ" ဟု အားနာနာဖြင့် ပြန်ပြောလိုက်လေသည်။