တီ တီ… တီ တီ တီ…
မြန်မာကဗျာ၏ စကားပြေတစ်ပုဒ်ကို ကျက်မှတ်နေရင်း ရုတ်တရက် ထမြည်လာသည့် ကြိုးဖုန်းအသံလေးကြောင့် ဖယောင်း ထိတ်ခနဲပင် လန့်သွားရသည်။ ဒီဖုန်းအသံနဲ့တော့ ဖယောင်း ဘယ်တော့မှ အသားကျမည် မထင်။ လိုအပ်သည်ထက် ပိုကျယ်နေသည့် ထိုဖုန်းသံကို ကြားလိုက်ရချိန်တိုင်း ဖယောင်း နှလုံးခုန်နှုန်းတွေ မြန်လာသည့်အထိ ထိတ်ထိတ်လန့်လန့် ဖြစ်ရ၏။
“Hello…Housekeeping ငါးလွှာကပါ…”
“Hello…Reception ကပါ၊ 504 Check-out လုပ်ပါမယ်”
Reception မှ ထိုအသံသည် ဖယောင်း မရင်းနှီးသေးသည့် ဝန်ထမ်းသစ်ကောင်လေး၏ အသံဖြစ်သည်။
အယ်…မေ့လို့။ ကောင်လေး ဘယ်ဟုတ်ပါ့မလဲ။ ဖယောင်းထက် အသက်တစ်နှစ်ကြီးသည်လို့ ကိုကြီးမိုးစွေ ပြောပြပြီးလို့ သိခဲ့ရပြီပဲ။ ဒါဆို… ဝန်ထမ်းသစ်အစ်ကို လို့ သုံးနှုန်းမှ သင့်တော်တော့မပေါ့။
ဖယောင်း ကိုယ့်အတွေးကိုယ် သဘောကျကာ ခိခနဲ တစ်ချက်ရယ်လိုက်ရင်း အခန်း နံပါတ် ၅၀၄ ဆီသို့ ဦးတည်၍ အပြေးတစ်ပိုင်း လျှောက်သွားလိုက်သည်။ ဧည့်သည်များကတော့ အခန်းထဲမှ ထွက်သွားပြီးပြီ ထင်သည်။ အခန်းတံခါးသည် ပွင့်လျက်သားနှင့် ရှိနေခဲ့၏။
Check-out အခန်းထဲသို့ ဝင်ဝင်ချင်းတွင် ဖယောင်း၏ ထုံးစံအတိုင်း မွေ့ရာပေါ်က ခေါင်းအုံးလေးများအပေါ်သို့ မျက်လုံးများက အရင်ရောက်သွားသည်။ ခေါင်းအုံးပေါ်တွင် ပိုက်ဆံနှင့်တူတာဆိုလို့ စက္ကူစပင် ရှိမနေခဲ့။ ဖယောင်း နှုတ်ခမ်းလေးတစ်ချက် တွန့်လိုက်ပြီး စစ်ဆေးစရာရှိသည်များကို စတင်စစ်ဆေးလိုက်သည်။
အရင်ဦးဆုံး မွေ့ရာပေါ်ကို စစ်ဆေးရသည်။ မွေ့ရာပေါ်တွင် လုံးတင်ထားသည့် စောင်ကို ဖယောင်း မ,ယူကာ မျက်လုံးကစားလျက် ကြည့်ရင်း စစ်လိုက်သည်။ အိပ်ရာခင်းများနှင့် စောင်များအပေါ်တွင် အစွန်းအထင်း ရှိမရှိကို စစ်ဆေးရခြင်းဖြစ်သည်။ ထို့နောက် မှန်တင်ခုံကို စစ်ဆေးရသည်။ မှန်တင်ခုံ အန်ဆွဲထဲက Hair Dryer ရှိ မရှိကိုလည်း ရှာဖွေရသည်။ မှန်တင်ခုံပေါ်က ရေနွေးအိုးကိုလည်း မျက်စိရှင်ရှင်နှင့် ကြည့်လိုက်ရသေးသည်။ ဒါတွေ စစ်ပြီးတော့ Coffee Table ဆီသို့ သွားကာ ကော်ဖီခွက်များ ကွဲအက်ပျက်ဆီးခြင်း ရှိ၊ မရှိ၊ ကော်ဖီခွက်နှင့် အောက်ခံပန်းကန်ပြားနှင့် ကော်ဖီဖျော်သည့် ဇွန်းများ စုံလင်မှု ရှိ၊ မရှိတို့ကို စစ်ဆေးရပြန်သည်။ ပြီးလျှင် အခန်းအတွင်းက Mini Bar (ရေခဲသေတ္တာငယ်)ကို စစ်ဆေးရသည်။ ဖယောင်းတို့ ထည့်ထားသည့် ရေဘူးအရေအတွက်၊ အချိုရည်ဘူး အရေအတွက် အတိုင်း ရှိ၊ မရှိကို ရေတွက်၍ စစ်ရသည်။ ရေဘူးများနှင့် အချိုရည်ဘူးများကို စစ်ရာတွင် ဘူးအဖုံး၏ ပါကင်ပိတ်အရာ ပျက်မပျက်အထိပါ အသေးစိတ်စစ်ရ၏။ တချို့သော ဧည့်သည်များသည် ရေဘူးနှင့် အချိုရည်ဘူးများကို ဖောက်သောက်ပြီး မဖောက်ထားသည့်ပုံစံနှင့် ခြေရာလက်ရာမပျက် ပြန်ထားတတ်ကြ၍ ဖြစ်သည်။ Mini Bar ကို စစ်ဆေးပြီးချိန်တွင်တော့ အိပ်ခန်းထဲတွင် စစ်ဆေးစရာ ကုန်သွားပြီ။ ထို့ကြောင့် ရေချိုးခန်းဆီသို့ ဝင်သွားလိုက်သည်။
