၂၀၀၉ ခုနှစ်၊ ဇူလိုင်လ (၄)ရက်နေ့၊
ကချင်ပြည်နယ်၊ ဖားကန့်မြို့၊ ဝှေခါရွာ။
အိမ်ခေါင်မိုး သွပ်ချပ်များပေါ်သို့ မိုးစက်လေးများ တပေါက်ပေါက် ထိမှန်သံများကြောင့် နှင်းပန်း နိုးလာရသည်။ နှင်းပန်း အိပ်နေသည့် ကြမ်းပြင်၏ ဘေးနားက ထရံပေါက်မှတဆင့် မျက်စိတစ်ဖက်မှိတ်ရင်း အပြင်ဘက်သို့ ချောင်းကြည့်လိုက်တော့ အလင်းရောင်ပင် မသဲကွဲသေးသည့် ပတ်ဝန်းကျင်သည် မှုန်ရီမှိုင်းဝါးလျက် ရှိသည်။ သို့သော် အချိန်အားဖြင့် ငါးနာရီဝန်းကျင်ခန့်တော့ အနည်းဆုံး ရှိရော့မည်။
လှဲလျောင်းနေရာမှာ နှင်းပန်း ကုန်းရုန်းလူးလွန့်ထလိုက်သည်။ ပွယောင်းရှုပ်ဖွာနေသည့် ဆံပင်ကို တစ်ရစ်၊ နှစ်ရစ် လိမ်၍ ခေါက်တင်ပြီး ခေါင်းအုံးဘေးနားတွင် ချထားသည့် ဆံညှပ်နှင့် ခပ်ပြေပြေ ညှပ်တင်ပစ်လိုက်သည်။ နှင်းပန်းဘေးနားမှာ အိပ်မောနေသည့် မခင်စောသည်တော့ အသံထွက် ဟောက်၍ပင်နေသေးသည်။ အိပ်ပါစေလေဟုတွေးကာ ကျိုးကျိုးကျဲကျဲ ကြမ်းများကို ခပ်ဖွဖွနင်းရင်း တဲအိမ်လေး၏ အပြင်ဘက်သို့ ထွက်လာလိုက်သည်။
တဲအိမ်ကလေး၏ အနောက်ဘက်တွင် ဘေးချင်းကပ် စီထားသော စဥ့်အိုးနှစ်ဦးထဲတွင် ရေများက ပြည့်လုပြည့်ငင်။ ညက မိုး အတော်များတယ် ထင်ရဲ့ ဟုတွေးကာ စဥ့်အိုးထဲက ရေတစ်ခွက်ကို ခပ်ယူလိုက်ရင်း မျက်နှာသစ်၊ သွားတိုက်လိုက်သည်။ ရေစိုနေသည့် မျက်နှာကို သုပ်မနေဘဲ တဲလေး၏ ဘယ်ဘက်ခြမ်းကို အဖီထိုးထားသည့် နေရာလေးသို့ လျှောက်လာလိုက်သည်။
တဲလေး၏ အဖီခြမ်းလေးသည် နှင်းပန်းတို့ ထမင်း၊ဟင်းချက်ရာ မီးဖိုချောင်ကလေးဖြစ်၏။ မီးဖိုလေးထဲမှ လက်ကျန်ပြာများကို လက်ဖြင့် သုပ်ဖယ်လိုက်ပြီး ထင်းချောင်းသုံးလေးချောင်း ထိုးထည့်ကာ မီးမွှေးလိုက်သည်။ အညွန့်တလူလူ တက်လာသည့် မီးတောက်လေး၏ အပေါ်သို့ မီးခိုးများ အရိုက်နာမှုကြောင့် မည်းမှောင်နေသည့် ဒယ်အိုးလေးတစ်လုံးကို ကောက်တင်ကာ ဆီဘူးလေးထဲမှ လက်ကျန် ဆီဖင်ကပ်လေးကို သွန်ထည့်လိုက်ရင်း ညနေ မှော်ထဲကအပြန်မှာ ဆီတစ်ဆယ်သားလောက် ဝင်ဝယ်ဦးမှ ဟုစိတ်ထဲ တေးမှတ်လိုက်ကာ ခေါင်းကို ဗြိခနဲနေအောင် ကုပ်ချလိုက်သည်။
