🌹🌹🌹🌹🌹-- ခွန်းသုတ -- 🌹🌹🌹🌹🌹
မြန်မာနိုင်ငံ၏ လူသုံးအများဆုံး လူမှုကွန်ယက် အပလီကေးရှင်းတစ်ခုဖြစ်သည့် Facebook ၏ အင်တာနက်စာမျက်နှာများပေါ်တွင် အပြိုင်အဆိုင် ပေါ်ထွက်လာခဲ့သည့် လူငယ် Vlogger များထဲတွင် ခွန်းသုတတစ်ယောက်သည်လည်း အပါအဝင်ဖြစ်၏။ Vlogger တစ်ယောက်ဖြစ်သော်လည်း ခွန်းသုတသည် တခြားသော Vlogger များကဲ့သို့ အစားအသောက်များကို ညွှန်းဆိုပေးရသည့် Food Vlogger လည်း မဟုတ်၊ အလှကုန်ပစ္စည်းများကို ကိုယ်တိုင်သုံးစွဲ၍ မျှဝေကြေညာပေးတတ်သည့် Beauty Vlogger လည်း မဟုတ်၊ ခရီးသွားမှတ်တမ်းများကို ရိုက်ကူးထုတ်ဖော်ပြသပေးရသည့် Travel Vlogger လည်း မဟုတ်၊ တခြားလူငယ်များလို ဂိမ်းများကို တိုက်ရိုက်ထုတ်လွှင့်၍ ဂိမ်းကစားပြသည့် Game Steamer လည်း မဟုတ်ပြန်ပါ။
ကမ္ဘာကြီးပေါ်တွင် လူသားတစ်ဦးအဖြစ် ရှင်သန်ဖြစ်တည်လာသည့် လူ့ဘဝကြီးတွင် ခက်ခဲပင်ပန်းစွာ ရှင်သန်ရုန်းကန်နေရသည့် လူသားများ၏ ဘဝများကို ထုတ်ဖော်ရိုက်ကူး၍ မိမိ၏ ကိုယ်ပိုင် Facebook စာမျက်နှာတွင် ထုတ်လွှင့်တင်ဆက်သည့် Vlogger ဖြစ်သည်။ ခက်ခဲကြမ်းတမ်းလှသည့် ဘဝများအတွင်းကမှ လိင်တူချင်း စုံမက်ချစ်ခင်မြတ်နိုးကြသူ (LGBT) များ၏ ဘဝများကို အထူးသဖြင့် ဖော်ပြတင်ဆက်ပေးသည့် Vlogger တစ်ဦးအဖြစ် ခွန်းသုတကို လူသိများကြပါသည်။ ထို့ကြောင့် သူ့ကိုယ်သူ မည်သည့်ခေါင်းစဉ်အောက်က Vlogger တစ်ဦးဖြစ်မှန်း ခွန်းသုတ မသိပါ။ ခွန်းသုတတွင် ပြတ်သားတိကျသည့် ရည်ရွယ်ချက်တစ်ခုသာ ရှိပါသည်။ ထိုရည်ရွယ်ချက်မှာ… LGBT များ၏ ဘဝပုံရိပ်များသည်လည်း သာမန်လူသားများ၏ ဘဝများနှင့် ထပ်တူညီစွာ ဖြစ်တည်လျက်ရှိသည် ဆိုသည့် အချက်ကို LGBT များအပေါ် မလိုမုန်းထားစွာ ဆက်ဆံတတ်သည့် သူများအား အသိပေးတင်ဆက်လိုခြင်း ဖြစ်၏။ ထိုကဲ့သို့သော စိတ်ဆန္ဒများသည် ခွန်းသုတ ကိုးတန်းအရွယ်တွင် စတင် ပေါက်ဖွားလာခဲ့ပါသည်။ ခွန်းသုတ၏ အသွေးအသားများအတွင်းသို့ LGBT များ၏ ခံစားချက်များ၊ စကားသံများကို တစ်တိုင်းပြည်လုံး ကြားသိစေချင်လောက်အောင် နာနာကျင်ကျင် အော်ဟစ်ရင်ဖွင့်လိုက်ချင်သည့် ရင်နင့်ဖွယ်ရာ ခံစားခဲ့ရသည့် အဖြစ်အပျက်ဆိုးကြီး တစ်ခုသည် ခွန်းသုတတို့၏ အထက်တန်း ကျောင်းကြီးတစ်ခုတွင် ဖြစ်ပျက်ခဲ့ပါသည်။
