Lop_Eared Guard (နားရွက်ကျလေးနဲ့ သက်တော်စောင့်)

အခန်း(၁၁)

အခန်း(၁၁)

၂၀၁၆ ခုနှစ် ၂ လပိုင်း ၁၄ ရက်၊ ည ၁၁နာရီ။

Keldivia မြို့ရှိ ထင်ရှူးတောများ မီးလောင်နေရာမှ မီးတောက်နီနီရဲရဲတို့က မိုးကောင်းကင်တစ်ခွင်လုံးတွင်ပင် ပျံ့လွင့်လျက်ရှိနေသည်။

ပဲ့တင်သံများထပ်နေသော လမ်းကျဉ်းလေး၏ အမှောင်ရိပ်များထဲတွင် ယန်ယိတစ်ယောက်တည်း လမ်းလျှောက်နေသည်။ ယန်ယိရဲ့ အပေါ်ဝတ်လေကာအင်္ကျီက တိုက်လေနှင့်အတူ ဝဲလွင့်နေပြီး လက်ထဲတွင် 590M သေနတ်တစ်လက်ကိုင်ထားကာ ဘယ်ဘက်ဝမ်းဗိုက်တွင်ရထားသော သေနတ်ဒဏ်ရာကြောင့် ဦးခေါင်းက ညွတ်ကျိုးကျနေသည်။ ဇကာပေါက်အလား ဖြစ်သွားသည်အထိ သေနတ်ဖြင့် အပစ်ခံထားရသော တောခွေးရိုင်း အယ်လ်ဖာများ၏အလောင်းတွေပေါ် နင်းကာလျှောက်နေရင်း ယန်ယိရဲ့ တိုက်ခိုက်ရေးဘွတ်ဖိနပ်၏အောက်ခြေမှာ စေးကပ်သောသွေးများ စွန်းထင်းနေသည်။ စေးကပ်နေသော မြေကြီးပေါ်လျှောက်နေတဲ့ ယန်ယိရဲ့ခြေလှမ်းတို့က မလှမ်းချင့် လှမ်းချင် ဖြစ်နေသည်။

ယန်ယိက ပန်းဆိုင်လေးတစ်ဆိုင်ကို ဖြတ်လျှောက်လာခဲ့သည်။ ထိုပန်းဆိုင်ရဲ့ ပိုင်ရှင်က သက်လတ်ပိုင်းအရွယ် သာမန်ဘီတာတစ်ယောက်ဖြစ်ပြီး သူ့ရဲ့ ကလင်းဆဲလ်က ငြိမ်ဝပ်ကာ ရှုပ်ထွေးနေသည်။ သူက လက်မောင်းထဲပွေ့ချီထားတဲ့ကလေးကို တင်းတင်းကြပ်ကြပ်ပွေ့ဖက်ထားရင်း ကိုယ်တိုင်က နံရံထောင့်ကြားသို့ ဆုတ်ကာကျုံ့ကျုံ့ကလေးနေနေခဲ့သည်။ တုန်ရီနေတဲ့လက်နဲ့ ငွေရှင်းကောင်တာတွင်ရှိသော ပိုက်ဆံအားလုံးကို ယန်ယိခြေထောက်နားပုံချပေးပြီး ဒူးထောက်ကာ တောင်းပန်နေခဲ့သည်။

"မ ... မပစ်ပါနဲ့ .. ပိုက်ဆံတွေ ... ပိုက်ဆံတွေ အားလုံးကိုယူသွားလိုက်ပါ...."

ပန်းဆိုင်ပိုင်ရှင်က သူ့ကလေးရဲ့မျက်လုံးကို လက်နဲ့အုပ်ထားပြီး ခေါင်းကိုတွင်တွင်ခါကာ ယန်ယိကိုတောင်းပန်နေခဲ့သည်။ လေကာအင်္ကျီရဲ့အောက်မှာ အနက်ရောင်အိမ်တော်ထိန်းဝတ်စုံကိုဝတ်ဆင်ထားပြီး အရပ်ရှည်ရှည် ၊ ပိန်ပိန်သွယ်သွယ်ရှိသော ထိုကောင်လေးက နူးညံ့ကာ ချောမောသော အိုမီဂါတစ်ယောက်ဖြစ်လေသည်။ ပြာ'၏အရောင်နှင့်ဆင်တူသော မီးခိုရောင်ဆံပင်ပျော့ပျော့အတွင်း၌ရှိသည့် ယုန်နားရွက်တို့က သူ့နားရွက်ပေါ်ရှိနေတဲ့ နှင်းမှုန်တို့ကို ဖယ်ရှားဖို့ မသိသာစွာ လှုပ်ရမ်းနေသည်။