كابوس اليقظة

الجزء الثاني

مساء الخير

كابوس اليقظة
الجزء الثاني

صفنت بيها معقولة هيج تحجي تغشم روحها
مافهمت عليها..!
اكلج حبابة انت كل شهر تصلين 30 يوم لو
عدج خمس ايام تكطعين بيها الصلاة؟!
لا عدي ايام العادة مرت ابوي تكول يبولون بحلكج
بالنار اذا صليتي بيها..
اعوذ بالله شهالحجي..بس زين طمنتيني يعني
انت بالغة..
ها قصدج بالغة هيج ؟
اي هذا قصدي..

كمت انطيتها حبوب كتلها روحي شربي ومددي
اذا حسيتي وجع اكثر تعالي احجي..وهي مثل
الجهاز منين مااوجهه تروح..
اخذت الدوا وصعدت فوك ..اباوعلها تمشي
وتتعثر ولازمة بطنها ..شكول عليك ياصلاح طفلة
وامبينة عايشة ببيت اهلها مضطهدة واضح
عليها ..انوب جايبها وتريد تتسيد براسها..
قررت احاجي من يجي واوصي عليها ..

رجعت للمطبخ كملت الغدا ودخلت صليت
شوية وسمعت صوت نغم تحاجي ابوها ..
طلعت والسبحة بيدي اسبح ..شافني ابتسم..
تقبل الله ام بيتي..
منا ومنك ها جوعانين اصب؟
ايي ماما بس ابدل وناكل ميتة جوع..حجت نغم
وراح لغرفتها..
تقرب مني يباوع لكل تفاصيلي..لا تصبين هسه
اصيح لندى تصب ..

راد يصعد وصحت عليه..لحظة صلاح اريد
احاجيك شوية..
اي ياالله تعاي للغرفة..
فتحت الباب ودخلت ودخل وراي سده واجه
كعد ع السرير..طبطب بصفه تعاي بصفي..
كعدت وجريت نفس..بيج شي ندى ضوجتج؟؟
باوعتله بعتب..انا اكبر منها وتعرف طبعي شنو مو
بسهولة طفلة تكدر تغثني وبصباح واحد..
ايييه انا الاعرفج شنو ..

خلاص اذا تعرفني ليش هيج مخوفها مني بحيث
ماقبلت تكعد يمي مساع كعدت بالكاع يم رجليه..
ههه اي زين ماخذة تعلوم ولو ادري بيها مطيعة
لان خلصت حياتها ببيت اهلها تخدم وتطيع..
وانت مستغل هالشي؟؟؟!
لا مو مستغل بس ماخذه راس مال..
حرام عليك ترى المفروض ترحم بحالها اذا تكول
ببيت اهلها متأذية..اذا هي عروض ومضروبة
ووجهها كل عافية مابي..

لا ماامد ايدي عليها تدرين بيه مااحب اضرب
مرة بس لازم تعرف انت شنو بالنسبة الي..
انا مرتك وهي مرتك ..
لا انت مرتي الوحيدة..
هه..عيوني صلاح لو الوحيدة ماتزوجت غيري..وهاا ترى
مو جاي اعارك لو اعاتب لا حقك..ادري بنفسي
استحق تشوف راحتك وي غيري بس هذا
واقع..ثنينا نسوانك ..ورب العالمين بكتابه
يأمر الرجال ويذكره الك حق تتزوج ثانية شرط تعدل
واذا ماعدلت خليك ع وحدة وبسسس..

ماراح اظلمها انت ليش عبالك اظلمها؟
واضحة الامور كلش..عاملها مثل ماجنت تعاملني..
ههه ميخالف..بس بشرط..
شرط بعد!؟اي شنو بلة؟
ترجع حياتي وياج طبيعية..واذا شفتي من ندى
اقل تصرف تجين تكليلي..
كمت وابتسمت بقهر..مايهم..نرجع مثل اول
المهم مانظلم يتيمة ببيتنا..

اخذ ايدي ورفعها لشفته بهدوء وباسها ويباوعلي..احبج
نهاد..
ابتسمت وجريت ايدي منه ورحت امشي بهدوء..
مشبت خطوات اوفكاري تسابق ..استسلمت
للواقع او يمكن الشي الصار سحبني من القوقعة العشت بيها..
شي بداخلي تغير وصوت يصيح براسي..عيشي زوجة طبيعية
عيشي يوم بيومه وذبي كلشي ورا ظهرج..
هي الدنيا لحظة ..برمشة عين تخلص...