كابوس اليقظة

19

السلام عليكم..رمضان كريم ع الجميع يارب ينعاد علينا
وعليكم بالخير والبركة

كابوس اليقظة
الجزء التاسع عشر

اذا كابوس اصحي من غفلتج حتى تخلصين منه..
شنو تقصد؟!!
اصحي فتحي عيونج حتى تشوفيني مو كابوس بالعكس..
استغفرالله ..اسألك بالله انت شلون الك نفس تتبع مرأة متزوجة
وتكلك انا احب زوجي؟!!
لان انا احق بيج منه وانا اولى بس هو حالفه الحظ..وانت ماتحبي
قيد شعره بس انت نقية ومحيطج الضيق خلاج تشوفين
نفسج تحبي..

اولى منه!!اولى من زوجي!بيا حق؟بيا شرع؟؟وانت شفتني
قبل كم شهر وصدفة بمطعم !؟؟
اصايل ..اااه اصولي وجذوري ..تدرين شوكت شفتج وضعتي مني؟
قبل سنتين شفتج ومو هنا بأربيل ..جنتي طالعة من المصيف وملتهية
تسولفين ..
وانا توني داخل وجنت اخابر ومكالمة حساسة وطالعة روحي
من الدنيا..صدكيني جنت بحالة نفسية يصعب الحجي عنها
وكاره جنس حوا كله بس شوفتج نسمة عذبة جانت..هي دقايق يمكن شفتج بيها..بس براسي بقت سنين ..
ورا طلعت ودورت عليج حتى مليت ومالكيتج..

دزيت الحماية نبشو
اربيل كلها ومالكوج..بقى ذاك طيفج بعيوني مستحيل
انساه..لبسج لهسه اتذكره..ضحكتج عيونج الصادقات مانسيتهن
ولا كدرت انساهن..حتى الكاميرات رجعتهن وماكدرت احصلج..
تمنييييييت الكاج وكمت ادور بكل الوجوه بس عبث..
الى ان شفتج ذاك اليوم ماصدكت عيوني..جنت اكول ربي
مايحبني ومااستحق منه رحمة..بس شوفتج بذاك اليوم
خلتني احس اكو امل ..احس انا استحق رحمة واكدر ارجع
لربي..

ليش شمسوي حتى ماتكدر ترجع لربك!؟!
مذنب هواي..قابل اغشج..بس ردت وياج ابدي نظييف
ولكيتج مخطوبة لشخص مايستحق نظرة منج..
زين اذا متعرفني قبل شلون تعرف اهلي!وعلاقتك قوية
باخوي..
كلشي يخصج الي بي حق واقربه مني ..راح تلكيني بكل
مكان ووي اقرب ناسج..

اذا فعلا محترمني ابتعد عن طريقي وعن زوجي بالذات ..
هه تكبرين راسه من تكولين زوجي ولو هو فعلا زوج...
لا تتجاووووز..انت ليش تحجي عليه!غيرة منه ؟
لو تريد تكرهني بي..
هه..اكرهج بي !لا مو هذا الاريده اريد تشوفين عيوبه وتفتحين
عيونج زين..انا نابش عشيرته وعشيرتج وشفته هالشخص
مو سند مو كفووو وماله حق بيج مثلي..انا قبله انا ردتج
قبله..

مو انت التحكم اذا يناسبني او لا..انا مقتنعة بي واريده..
ولو بقيت تركض وراي منا لعشرين سنة ماتنول شي..وحتى
وان...ان اثبت هو مو كفو او صار بينا فراق..لا تتوقع الجأ
الك او اقبل بيك..
مااعرف اذا عندك ضمير او عندك ذمة ..المهم اي شي يتحرك
بيك..بس اسمع مني هالكلام وانت بعد وذاتك..مستعد تسمعني؟؟..
جر حسرة طويلة وحجه..اسمعج ..ومستعد اسمع طول العمر..

اولا انا عندي مشكلة صحية..ثانياً البيت واجهت ضغط ماريد
احجي بي بس عندي استعداد اضوك انواع المر وماارجع
لاهلي..
منو اذاج مهند مو؟؟؟؟
مااحجي كدامك اي شي يخص حياتي انت انسان غريب..بس
شايف الحجي الحجيته عن اهل مناضل والمشاكل الواجهتني
ببيتهم كلللها ماخلتني افكر لو لحظة انفصل عن زوجي ..واشوفها
تافهة قياساً بالشفته..