كابوس اليقظة

الثالث

مساء الورد

كابوس اليقظة
الجزء الثالث

بادن رجليه وبطني خبطت من الخوف..جاوبت
مهند واحاول اضبط نفسي ..السايق مالتنا..
ورشا ع الخط سمعته كالت هسه انطني خبر شنو
اكله هو يستحي يخابرج..
مهند واكف يباوع وعاقد حاجبه اشرلي..كليلها خل
يجي..

سألته بتردد ها؟
اخذ الفون من ايدي وحجه وي رشا..كليله يجيبهن
للبيت هسه ..
جاوبته تدلل هسه اخابره..سد الخط وذب الفون
بحضني وكعد ..
ابوي ابد مايتدخل بكل موقف يصير ..ناطي
مطلق التصرف لمهند ..

سألتني امي وتحاول تهدأ الجو من شافت مهند
مفول عصبية ويباوعلي ويخزر..
شعجب ناسية ملازمج امي ..
ها مو حارة الدنيا وجوعانة دخلت ركض ونسيتهم
بالسيارة..
جاوب مهند ..هه طبعا ناسية روحج المهم
بطنج تشبع ..
ضحكت امي وردته ..شتريد منها يمه بالعافية
على قلبها خل تاكل الخير واجد..

لوى شفته وهز راسه واحسه يفكر بشي..
وانا كاعدة وعيني كلساع تروحله وافكر شلون
راح يجي مناضل وخاف يحس بشي مهند..
كمت ادعي كون مايجي كون يصير شي يمنعه
وانا احاجي نفسي دك الفون بحضني وطفرت..
هو شافني طفرت ضاج ازيد وخزرني..

سحبه مني وفتح خط وطلع..بقت عيني وراه
بس ماكدر ابين رد فعل ..خليت الامر طبيعي
بس امي تباوعلي بشك وابوي ابد مو يمي
عينه ع الاخبار مركز..
بقيت احوس بمكاني ..اخر شي كمت للغرفة
كلت حتى من يدخل مايلكاني اكيد مايجي وراي للغرفة..

فتحت الكنتور وصفنت نسيت شنو اريد اسوي..
ضربت خدي وانا ادردم..اصحي هبلة لا تصيرين شعندج
واكفة ..
ها اي اريد ملابس..
ايي اخذيلج ملابس ولبسي ولا تفهين تبقين كل عمرج فاهية..
اخذت ملابسي والبس واحجي بيه طبع احجي وي روحي
بصوت عالي وافكر بصوت عالي ..

كملت تبديل وجاي اعزل ملابس التحتاج غسل وانفتح
الباب..
اخترعت ورجعت ليورا واباوع لمهند فات وسد الباب وراه..
باوعلي يخزر وهو عيونه اصلا تخوف كبار ونظرته بلا خزر
هي تخرع..
انتجى ع ميز التواليت وذب الملازم ع السرير..ذني ملازمج
اصولة ..حقج تنسينهن اذا صاعدة وي هيج حات..
حجيت وانا اضبط روحي حتى ماابين خايفة..ترى نسيتهم
لان تعبانة!!!

ادري بيج تعبانة اخ بوية الله يساعدج..مرة ثانية ديربالج
اذا تعبتي عود انتبهي شناسية وراج..مايصير يومية يجي
محارب مدري مناضل يجيبهن الج للبيت..
مفهوم؟!هزلي راسه..
اي اي ..
عافني وفتح الباب ..قبل لا يطلع التفت وحجه..خلي ببالج
ووصلي الحجي لغيرج..مو ياخذه العزم ويصير مناضل
زيادة ويرسم للبعيد..
حجاها وطلع وطبك الباب حيل..

جريت نفس وايدي ع قلبي اليدك يدك حسيته رح يطفر من
حلكي..
شنو معنى كلامه معقولة حس !اعرف مناصل امبين
ومشاعره مفضوحة بس مامعقولة يبينها كدام مهند يعني
هو رزن وواعي اكيد ماراح يبين..بس هو مهند شكاك
وبكلشي مخلي انَّ..