كابوس اليقظة

32

صباح الخير..كل عام وانتو بخير يارب ينعاد علينا وعليكم بالرضا والعافية وربي يحفظلكم احبابكم

كابوس اليقظة
الجزء الثاني والثلاثون

ذب جكارته وطفر عليه ملخني من راسي ..اجت رشا
بحركة خاطفة لزمته من جتافة وملخته وخرته مني..عاط بيها حيل..
تكسحييي برااا طلعي من بيييتي...
وراد يرجع يهجم عليه كمت اعيط حيل فقدت..
امي وابوي اجو يركضون وهو عاط ..حجي هاي البنية بعد
ماااتدخل للبيت ..يحجي وياسر ع رشا..وامي حاضنتني وتريد
تفهم مني وانا فقدت..

ابوي من شافني هيج تقرب مني لزمني ..شبيج بابا
شنوو شنو صار..
فاتت زينة مرعوبة ولازمة بطنها..شبيكم شنو صار..
اندارلها مهند..ولييي فوك شنزلج مو مريضة..صرخ بي
ابوي..البنية شعليها تزمخ بيها اكيد سمعت صريخ
وانهبطت..اخذها وديها لغرفتها ترتاح وانزل اريدك..

هز راسه يتحلف واخذ زينة وطلع..حجت رشا وي ابوي..
عمو اكدر احجي وياك شوية؟
ميخالف تفضلي جوا ..نهاد ودي اصايل لغرفتها ترتاح..
اخذتني امي لغرفتي ورشا راحت وي بابا بقت عيني
عليها..
حاولت امي تهديني وتفهم مني شي ماكو..انفتح الباب وفاتت
بيبي اشرت لامي تطلع..

اجت كعدت يمي وبقت تسولف وياي..حجيتلها الصار
كالت لا تهتمين لحجيه ..بقت يمي تقريبا نص ساعة او اكثر
واجت رشا ..فتحت الباب وفاتت..ها اصايل انا راح اروح..
كعدت لحيلي ومسطورة راسي حيل اذاني..تعالي وين
رايحة بعد وكت..
لا لازم ارجع..بعدين اخابرج ونسولف..
شحجيتو انت وبابا؟
بعدين افهمج..

طلعت وانا رجعت مددت وغمضت عيوني حيل دايخة
وبطني تأذيني..
غفيت ع وضعي..كعدت دنيا ليل..طلعت برا ماشفت احد..
رحت للحديقة فارغة..شعجب ماكاعدين بالصالة البيت هدوء!
رحت لغرفة بيبي سالتها..كالت ابوج نايم بغرفته
ارتفع ضغطه وعينه كلش اذته وامج توها سوتله حامض وودته
اله..
يعني كاعد اكدر افوت اشوفه؟
لا يمه عوفي هسه تعيبان باجر شوفي..

رجعت اخذت فوني اتصلت برشا ردت اعرف
شنو صاير وشحاجيه حتى ابوي هيجي تعبان..بس ماجاوبت..
دزيتلها مسج من تشوفين مكالمتي خابريني..كعدت انتظر
وانتظر ماكو..
شوية واندك باب غرفتي ..صحت منو؟
انا ..حجه امجد..
كمت فتحتله الباب فات كعد ع السرير ينهت..ها الله يساعدك
امبين حيلك مهدود..
ايي كلش تعبت لازم هالاسبوع اخطب وارجع اسافر..

شنو صار ماصار بعده ابوي قافل ؟انا خليته براحته
كلت بعدين احاجي بس هو ماانطاني مجال..
سكتت ودنكت..
شبيج ؟؟ابوي بي شي؟؟؟حجه وكام..
لزمته من ايده كعدته..اكعد افهمك احسن..
شنو؟
اليوم اجتلي رشا..
اي ؟
حجيتله الصار مساع كله..كام وعيونه صارت براسه..هذا
لازم يتأدب لان تمادى الا ادوس ببطنه وطززز باليصير..

جلبت بي واتوسل..لا امجد لا يولي عوفه..لا تضيع مستقبلك
بعدك طالب وراك سنتين بعدك ماواكف ع حيلك..
وخري اصايل كافي ..عندي شراكتي وي الحجي تكفيني..
شراكتك من فلوووس ابوي يعني مو بعيدة مهند يقنعه ياخذ
منك كلشي..اصبر لخاطري اصبر..بس كون نفسك وتخرج
وراها سوي بي الماينحجي..