كابوس اليقظة

السابع

مساء الخير

كابوس اليقظة
الجزء السابع

اي كلت حدد ماكلت هالاسبوعين!
ايي ماما مادري يعني ليش مدققة بالموضوع..
لان اعرفج مو خالية..وفهمت الصار بين مهند وزينة
بس المافهمته شلون حجو هالموضوع كدامج..
دنكت وسكتت ماعرف شنو اجاوبها...
وهي سكتت ماحرجتني اكثر..

بوقت الغدا كعدو يحجون بالتحضيرات
وتحهيزات الزواج..بابا كال لمهند تاخذ مرتك
وتروح شهر عسل ..بس مهند رفض كال ماعوف
البيت والشغل رغم امجد جاي يساعده ويطلع
وياه من الصبح ..بس يكول بعده مو كلش
متمكن ماكدر اعوف كلشي عليه..
وهم يسولفون دك فوني جان ع الكاونتر ورا
مهند..ردت اكوم اخذه وهو مد ايده باوعله وانطانياه..

اخذته شفت رشا تخابر..فتحت خط
وجاوبتها مبتسمة..هلا وغلا..
هلااا بيج اريد البشارة يلااا ..
يارب خير.. بشارة مال شنو؟
طلعت الاسماء ولج رااااح نشتغل سواا..
ياااااي حلفي حلفي ..حجيت بفرحة وهم يباوعولي
وياشرون شنو ..

اشرتلهم بيدي هسه وانا اكمل حجي وياها..
شنو الخطوة الجاية يعني شنسوي؟
حضري اوراقج بعدين امرلج اخذهن وكالو بس
هالاسبوع وتداومون..
فدوة لعمرج شلون خبر يسوي واهس..بس نطلع
انا وماما للسوك اجيبلج احلى هدية..
شعندي غيرج انا غير اخوات احنا ..
اكييد اخوات يلا خلي اكول لاهلي واكمل غداي
ههه..
روحي بلعي باي..

سديت الخط ومبتسمة من اعماقي فرحانة
حيل..كال بابا وين طلع اسمج ؟
طبعا هم يسمعون لان فوني عالي ورشا تحجي
حيل ..
جاوبته بفرح..بوزارة ال..اجور يومية يردون وعن
طريق اهل رشا والحمدلله صارت..
بيبي وماما باركولي وامجد يباوعلي مبتسم..
مهند جان ساكت ويستمع ..بس ماتحمل الا ينكد..
حجه ببرود..وشراح ينطوج مليون؟هو اجر يومي
اقلها خمس اشهر ويكلولكم باي..

جاوبته وبثقة وماريده يتدخل بهالموضوع..لان
انا من اول ماداومت كلت لبابا بس اتخرج
اشتغل انا ماريد اكعد بالبيت..وبابا كال هذا
شي يخصج الج وانت تقررين محد يتدخل
بقرارج..لهذا مهند ماكدر يكسر حجاية بابا
هسه بعد ماتخرجت ..بس حسيته يحاول
يوتر الجو او يفرض نفسه..

رديت ع كلامه وحجيت كلماتي بثقة..انا مانداومة
ع مود الفلوس..الحمدلله رب العالمين رازق
بابا ومعيشني ملكة..بس اريد احس بثمرة
تعبي ودراستي..
هههه شدعوة دارسة طب اسنان ام ثمرة..
كلمن واختصاصه مثل ماطب الاسنان مهم
اختصاصي هم مهم..
باوع باستصغار وهم تجاهلته خليني فرحانة بهالخبر
الحلو..

للعصر اجت رشا ع السريع حتى مادخلت جوا..
كعدنا بالحديقة شوي سولفنا ..هي عدها تواصل وي مناضل
وحتى اخوها يعرفه لان جان ابو الخط مالتها وحالياً
ع مود الشغل جاي يتواصل وي اخوها ووياها..
وبعد ما سولفت اخوها شكد يمدح بي ويحترمه زاد اشتياقي
اله ونفس الوقت من اتذكر موضوع الزواج اجفل..
بس مابينت هالشي كدامها..