The Crossfire | Revised | Sample

i | 1 | the k f c

❝ THE KFC ❞
───── ⋆⋅🌹⋅⋆ ─────

───── ⋆⋅Chayanne⋅⋆ ─────

|| Friday. . .

"Jesas ah tyad!"

Mi best friend laugh as she listen to me. "Wa do you?"

"Mi just ready fi go home," mi complain. Mi look pon e bag a people ina the Ochi KFC like dem cya cook a dem damn yard.

Shaking me head at the irony, me walk weh fi go tek a seat. Wiping off the seat cause Marymount High all white uniform really easy fi dutty up, me plop dung miself wid waa hefty sigh like me a mi granny.

Thinking boh mi granny mek me look pon e long line in worry. . .

The area weh me live ina full a violence like almost every other community ina Jamaica. Me live ina Steer Town, St. Ann. Mi granny seh it used to be a very safe community weh people cuda sleep wid dem door open a nighttime. Now, she seh the violence did get outrageous and a slowly coming like Tivoli Gardens way a Town or Flankers deh a MoBay.

Cause a dis new norm, Mama always tell mi fi hurry and bring mi mawga behind ina the house afta school before night come. She always preach to me seh shi wuda must dead too if she lose another daughter.

Despite today being the end of mi first week ina fifth form, me did still eager fi go home so she nafi worry ar old head too much. But my Mama gon always be my Mama - all she know fi do a worry. It tek a toll on her and make she look older than she seem. Dem seh black nuh crack but Mama debunk dat cause right now she a near eighty and look half-dead to me.

She eva a bawl seh Brahma can tek ar right now and me nuh know if Him wi listen and dweet fi real. She a did mi only family member round me and we nuh really have it like dat so me afi tek care a her nuh matta how miserable she be.

Before that godforsaken day weh she long fa come, mi always try do sum nice for her. One nice thing mi always do fi ar a save a portion a mi lunch money and buy her waa redbox every Friday.

Speaking of said KFC, mi look back dung pon mi ticket wid a sigh. Me too impatient fi dem things ya morewhile ino.

Mi look ova pon the pretty piece a black gyal weh siddung in front me. She have waa whole head a cream hair; she neh too mawga but she also neva fat and slubbo - she a did waa nice in-between.

"Chezzy," mi seh to her. "Wa time?"

Shi look pon ar watch. "Afta five."

Chezandra Tomlinson a mi best friend, practically mi sister at this point. We know each other alla wi life cause we mother dem a did best friend too.

See cause ar name a waa mouthful, everybody call her Chezzy. Just like how me name Chayanne but everybody except mi granny call mi Chichi. According to Mama, mi mother did gi mi the nickname before she pass weh. Mama seh Mommy did call mi dat cause mi did coming like termite - likkle bit and love nyam.

Speaking of love nyam, mi number finally call and mi run go up deh like smaddy weh dog a run dung. A deevn seh mi did happy fi finally get e likkle food, a cause in ya did very, very hot and stink a sweat. If me did stay in ya fi two more seconds, mi wuda drop dung bloff and mi granny wuda drop dung pleng right afta me.