Unicode
ဆောင်းဟွန်းတစ်ယောက်အိပ်ရာကနိုးလို့ ထထွက်သွားတာကို မှေးတေးတေးဖြစ်နေတဲ့ဂျယ်ယွန်းဟာ ခံစားမိလိုက်ပါသည်။ နေမကောင်းတဲ့ဝေဒနာတွေ မရှိတော့ဘူးဆိုပေမယ့် အားနည်းချင်နေတာကြောင့်ရော ဆက်အိပ်ချင်သေးတာကြောင့်ရော မထသေးဘဲနေလိုက်သည်။
ဒီနေ့ကျောင်းကိုလိုက်ချင်ပေမယ့် မလိုက်ဖြစ်ဖို့က ရာခိုင်နှုန်းများလို့နေသည်။ ထို့အတွက်စိတ်ညစ်မိပေမယ့် ဟိုးအရင်နေ့စွဲတွေတုန်းကအတိုင်း နွေးထွေးမှုတွေပြန်လည်ပြည့်နှက်လာတဲ့ သူနဲ့ဆောင်းဟွန်းဆက်ဆံရေးကြောင့် ဂျယ်ယွန်းကျေနပ်နေမိသည်။
ကျောင်းမသွားရလို့ဝမ်းနည်းနေတာကိုတောင် သိပ်မတွေးနိုင်လောက်သည်အထိ သူ့ရင်ထဲကောင်းနေသည်။ ဒီလိုလေးဘဲအမြဲနေသွားချင်တယ်။
စောင်ပုံထဲဆက်ကွေးရင်း မျက်နှာလေးမှာအပြုံးနုနုလေးတွေရိုက်ခတ်စေတဲ့ အတွေးလှလှလေးတွေကို တွေးလျက်နေနေတုန်း
"ဒေါက် ဒေါက်"
တံခါးခေါက်သံသဲ့သဲ့က နားထဲဝင်လို့လာသည်။ ဆောင်းဟွန်းနဲ့ကိုကိုသာဆို တံခါးခေါက်မည်မဟုတ်။ ဒီတော့ဖြစ်နိုင်ချေရှိသည်မှာ မမဟွန်းမီသာဖြစ်သည့်အတွက်
"မမလား။ ဝင်ခဲ့လိုက်လေ။ ကျွန်တော်နိုးနေပြီ။"
သူ့စကားအဆုံးမှာ တံခါးကပွင့်လို့သွားသည်။ သူ့စိတ်ထင်နေသလို မမဟွန်းမီမဟုတ်ဘဲ အစ်ကိုဟီဆွန်းက အခန်းထဲဝင်လို့လာတာကိုမြင်ရတော့ ဂျယ်ယွန်းမှာငေါက်ခနဲထထိုင်လိုက်ရသည်။ သူကဒီအချိန်ကြီး ဘာလာလုပ်တာလဲ။
"ဆောင်းဟွန်းပြောလို့လေ။ ဂျယ်ယွန်းနေမကောင်းဘူးဆိုပြီး။ အဲ့ဒါစိတ်ပူလို့လာကြည့်တာ။"
သမားရိုးကျဂရုစိုက်ခြင်း၊ ခါတိုင်းလိုပဲစေတနာသန့်တဲ့ဂရုစိုက်ခြင်းလို့တွေးပြီး ဂျယ်ယွန်းရင်ထဲနွေးထွေးမှုတွေကို ထပ်မံခံစားလိုက်ရသည်။ ဒီအမျိုးသားဆီသူ့နှလုံးသားလေးရောက်နေတယ်ဆိုပေမယ့် တစ်ဖက်လူဆီကနေ ရိုးရိုးသားသားဂရုစိုက်ကြင်နာပေးတာကိုသာ ဂျယ်ယွန်းအလိုရှိခဲ့သည်လေ။
![](https://img.wattpad.com/cover/303578722-288-k354800.jpg)