Hidden love " ကုမုဒြာ "( complete )❤️

Chapter - 42

မြို့ထဲသို့ဝင်လာယုံနှင့် ပန်းရနံ့သင်းသင်းလေးက စည်းကြိုလို့နေသည် ။ ကားလမ်းမကြီးရဲ့အလယ် ပလက်ဖောင်းပေါ်၌ ပန်းရောင်စုံစိုက်ပျိုးထားပြီး ပတ်ဝန်းကျင်အား လှပစေကာ မွှေးရနံ့တွေကြောင့် စိတ်ရွှင်လန်းစေသည် ။

ဧကရာဇ်မောင် ကားပြတင်းပေါက်ကနေပြီး လှပသည့်မြို့ရဲ့အလှကို ကြည့်ရှုနေခဲ့သည် ။ ဒီကမ္ဘာကြီးထဲက နေရာသေးသေးလေးတစ်ခုမှာ လှပတဲ့မြို့ငယ်လေးတည်ထောင်နိုင်ခဲ့ပြီး သူမြတ်နိုးရတဲ့လူရဲ့အငွှေ့အသက်ဖြစ်တဲ့ ပန်းရနံ့ကိုရရှိအောင်ဖန်တီးထားကာ အမြဲသတိရနေစေသည် ။

၄ နှစ်သာသေဆုံးနေခဲ့သည့် နှလုံးသားလေးဟာလဲ ယခုတော့စတင်လှုပ်ရှားလာပြီး အနှစ်နှစ်အလလ ရှာဖွေနေတဲ့လူကို ပြန်တွေ့ရဖို့မစောင့်နိုင်တော့ပေ ။ ထိုလူကသူဆိုတာ မသေချာသေးပေမဲ့ ဧကရာဇ်ရဲ့နှလုံးသားလေးကတော့ မရပ်မနားခုန်ပေါက်နေ၏ ။

* ငါအရမ်းကြီး မျှော်လင့်ထားလို့မဖြစ်ဘူး ... စိတ်အေးအေးထားရမယ် ... ဒါကတိုက်ဆိုင်ယုံသက်သက်ပဲဆို ငါထပ်ပြီးနာကျင်ရလိမ့်မယ် ... ဒီလောက်လွယ်လွယ်နဲ့ ရှာတွေ့ဖို့ဆိုတာ မဖြစ်နိုင်ဘူး ... ဒါပေမဲ့ သေချာအောင်သွားကြည့်တာက အကောင်းဆုံးပဲ *

အရှေ့ခန်းမှာကားမောင်းနေတဲ့ လင်းထက်က တစ်ချိန်ကမုဒြာအားအနီးကပ်စောင့်ကြည့်ပေးရတဲ့ လုံခြုံရေးခေါင်းဆောင်ဖြစ်ပြီး ခုတော့ဧကရာဇ်မောင်ယုံကြည်ရတဲ့လက်ထောက်ဖြစ်နေပြီ ။ ဧကရာဇ်မောင်သွားရသည့် ဘယ်နေရာမဆို လုံခြုံရေးအဖြစ်လိုက်ပါစောင့်ရှောက်ပေးရပြီ ကုမုဒြာကိုလဲ ကူပြီးရှာဖွေပေးရသည် ။ သူအလုပ်လုပ်လာတဲ့တစ်လျှောက်မှာ သခင်ကြီးရဲ့ ခုလိုစိတ်လှုပ်ရှားနေပုံကို မတွေ့ဖူး၍ လင်းထက်လဲအံ့ဩနေသည် ။

လုပ်ငန်းကိစ္စအကြီးကြီးတွေ ကိုင်သွယ်နေချိန်မှာတောင် နည်းနည်းလေးမှစိတ်မလှုပ်ရှားပဲ သိကျပြတ်သားစွာလုပ်ကိုင်နိုင်တဲ့ သခင်ကြီးလိုလူက မုန့်ဆိုင်ကကောင်လေးကိုတွေ့ဖို့အတွက် စိတ်တွေကနာမငြိမ်ဖြစ်နေ၍ အံ့အားသင့်နေသည် ။

" သခင်ကြီး ... ဆိုင်လိပ်စာ အသိအကျလေး ပြန်ပြောပါလား "

လင်းထက်ရဲ့အသံကြားမှ ဧကရာဇ်မောင်အသိပြန်ဝင်လာခဲ့သည် ။ ခုသူတို့က မြို့အလယ်က အဝိုင်းမှာရောက်နေပြီး လမ်းချိုးတွေကအများကြီးရှိတာကြောင့် လိပ်စာသေချာသိမှဖြစ်မည် ။ ဧကရာဇ်မောင်က ဖုန်းထဲက လိပ်စာကို တစ်ချက်ကြည့်ကာ ပြောလိုက်သည် ။