عشگ الاربعين (هديه فصل)

البارت الثالث والثلاثون

شلون اشيل الفرح
والشايلينه اشباح
وشلون الم الحزن
لو يم ضحكهم طاح

***********************************

علاء: شبيج صافنه بوجهي حجيت هيج رئسا بدون مقدمات تقربت يمي وكالت
رزق : ماكدر اشوفك متاذي ماريدك تروح بعد الله يخليك اريدك ويانه تبقى
علاء: ليش هالحجي رزق
رزق : قررت اصير هالمرا قويه واحجي كلشي كتله لان اخاف عليك ماريدك تتركنه
علاء: يهمج هالشي ردت بس اخليها تحجي باي طريقه
رزق : طبعا يهمني
علاء: ليش
رزق : بده صوته يصير هادئ وخافت احس روحي توترت وبدت نبضات كلبي تزيد لو بس ابطل هالثول الي يصيرلي من اوكف يمه انه بخير يهمني لان انت شخص مهم بهالعائله ومسؤول علينه فوجودك مهم بالنسبه النه
علاء : تمام بس خلي اكلج شي الله الي يحمينه وهوه الي مسؤول عن ارواحنه يعني اذا اجه يومي سواء بالواجب او هنا راح اموت
رزق : اسم الله عليك شيخ لاتكول هيج
علاء : برودها تجاهي حيل ازعجني كتلها اذا ماعندج شي تكدرين ترحين
رزق : بقيت صافنه عليه وعلى كلامه بس قهرني حيل كتله ماعندي شي درت وجهي وطلعت وسديت الباب نزلت دمعتي على اسلوبه وياي مادري ليش هيج يعاملني
هجن : شبيج واكفه هيج
رزق : مابيه شي اريد اروح انام رحت الغرفه ونمت وكعدت من الصبح على مود الشيخ لان لازم اغير جرحه بس كعدت طلعت من الغرفه لكيت علي طالع من غرفه الشيخ صبحت عليه وكلي
علي : اذا جايه على مود الضماد بدلته للشيخ هوه خابرني
رزق : كتله تمام خليت ونزلت جوه وانه احس بحركه بداخلي مادري شنو اسوي بروحي هسه وصلت رسالته الي معناها مايريد اتقرب عليه ولا اوصل يمه خلاص براحته اصلا انه وحده لطشه وشامره روحي عليه المفروض ماسوي هيج كعدو كلهم والشيخ نزل ومبدل وكامل بقيت صافنه عليه لحد ما حجه علي
علي : ها بويه شو نزلت شكال الدكتور
علاء : فتحت عيني الصبح وانه مقرر ابعدها عني ماريد اتاثر اكثر ولا اتاذه وهيه مبين ماتريدني ولا تريد قربي فخليني اطلعها من كلبي قبل لا يصير شي خابرت على علي يجي يبدل الضماد اجه
علي : صباح الخير شيخ
علاء : صباح النور بسرعه غير على الجرح حيل متاذي
علي : صار بويه
علاء : بده يشتغل بس مبين مطلعه جراحه هواي تاذيت كلش كعدت غسلت وفرشت وصليت وبدلت ونزلت جوه حجه علي وكتله مو وكت الدكتور الناس راح يجون حتى نحل الطلابه
علي : صار
حسن : جان خليتنه احنه وعمي صلاح نحلها
علاء: ماريد احد يدخل كلش طلعو منها حتى اي شي يصير مايجي عليكم
علي : وليش هيج مضحي بروحك
علاء : ما مضحي بس انه المسؤول هنا
علي : صار بويه
رزق : اباوع عليه وعليهم شلون يحجون واحس بالم بكلبي احس روحي مقهوره حيل ومحد يوخر هالشي غير الشيخ احس لمسته الي هيه علاجي بس شنو بيدي اسوي كعدت صافنه خلصو اكل والشيخ مااكل كال ماشتهي خلو وطلعو اجت سماح
سماح : صباح الخير حبي
رزق : صباح النور ماجاي نشوفج اليوم ليش مامداومه
سماح : تعبانه شوي
رزق : سلامتج صارلي هواي ماحاجيه وياج
سماح : شحجي رزق شحجي خليني ساكته وخليني بهمي احسن
رزق : محمد. مو
سماح : ليش اكو غيره
رزق : الله يهدي سركم انه صح اكلج اخوي طيب وحباب وكلش متسامح بس من شي يوصل يم كرامته ياذي
سماح : اعترف غلطت واعتذرت بس مانطاني مجال
رزق : الوقت كفيل يهدئه ويبرد ناره
سماح : الله كريم
هجن : ها مجتمعات خير
رزق : شعليج انتي اللتهي بروحج هههه
سماح : صدك تقى وين
رزق : بعدها نايمه
سماح : شسالفه هسه ساعه 9
رزق : بعد وكت خليها خطيه البارحه سمعت ابنها بس يبجي حتى علي بقى يصيح عليها
سماح : اي سمعته وسديت اذاني
هجن : لعد ليش تحجين بعد سموحه خليها براحتها
سماح : لو ما وضعج جان طيحت حظج
هجن : ههههههه
رزق : صلاوات من ضحكتي ست هجن عبالي نسيتي شلون تضحكين جاي نحجي وهم سمعنه صوت صياح بالديوان اخير شي هدئو ماندري شنو صار بس الي اعرفه الشيخ وراها كبل اجه للبيت وصعد فوك ماخلانه نعرف شبيه وهوه مبين عصبي حيل دخل علي ورا
علي : رزق فدوه شوفي ابوي شوي جرحه بقى يصب
رزق : رئسا طفرت انه صعدت فوك دكيت الباب وفتت لكيته جاي يفتح جرحهه كبل عاط بيه وكال
علاء : خلصنه ريوك وطلعت للديوان شوي واجه صلاح والولد موجودين بدو الناس يجون اهل الطلابه وكعدو وابو شهم هم اجه
ابو شهم : شيخ السموحه منك خاف تعبناك هذيج المرا
علاء : انت تامر ابو شهم اهم شي نوصل لحل
ابو شهم : شيخ انه قصيت الك القصه كلها ومال يكلولي تعال اتنازل وننطيك فلوس هاي واكفه يعني اغتصبهم نوب قتلهم وهسه يردوني اتنازل
علاء: اكيد ماتتنازل انه ما انطيك هالحق ردو الجماعه الثانيه
هسه احنه جايين عليك تحل الموضوع لو تعقده اكثر شيخ
علاء : ابنكم غلطان وجايين بكل عين صلفه
ابو دحام : بويه انه شبخهم على الاقل احترم وجودي
علاء : غير تستحقون الاحترام وانه من احجي كلمه الكل يسكت فلوس راح تعوضوهم وغصبا عليكم وتنازل مايتنازل وانه بضهره
ابو شهم : فدوه اروح الك انه بحمايتك وعتبرني دخيلك
علاء : والكل كاعد وسامع من اليوم ابو شهم تحت حمايتي وراح يجي ويكعد قريب علينه حتى امن عليه واذا صار شي اله او البنته صدكوني ساعتها راح اخليكم تتمنون الموت حتى لو جان الضرر مو منكم فهمتو
ابو دحام : عيب عليك شيخ انت شكبرك وشكدك وتحجي هلحجي احنه جايين تصير بينه محضر خير يعني تقبلها ابنك ينعدم وتسكت
علي : هي هي احترم نفسك شهالحجي هذا صدك ماتستحي
علاء : علييييي صوتك مايرتفع وانه ارد عليه اسمعني الضاهر انت مو مال احترام ومو مال تجي بالطيب ولاتخليني اطلع عصبيتي عليكم وادفعكم الثمن غالي وكفت على حيلي ونكتت عباتي
ابو دحام : معناها تعلن بينه حرب ابو علي وانت شيخ وجيناك تليتك راح توكف ويا وابن اخوي يموت
علاء: الي يسوي غلط يتحمل واعلا مابخيلك اركبه
ابو دحام : جا شوف بيوم الي ينعدم ابن اخوي اعتبر روحك ميت
علاء : بديواني وتهددني والكل شاهد يصير خير اطلعوا برا بسرعه
صلاح : تريد اروحله هسه افلش وجهه
علاء : عوفه هذا واحد ساقط مبين عليهم يردون الطلايب
ابو شهم : شيخ اروحلك فدوه سامحني كله بسببي
علاء : بويه انت صاحب حك وهالبني ادم عبر عليك فلازم يتعاقب انه قبل كل شي انه رجل قانون ويلا روح ومن اليوم تبدي دور بيت قريب على بيتي وتجي تسكن بيه انت وبنيتك تقرب عليه راد يبوس ايدي وجريتها منه رجع كلي
ابو شهم : الله يطول بعمرك يارب ويحميك من كل شر
علاء: تسلم خله وراح وانه احس دشداشتي بيها رطوبه جست الجرح طلع نازف جنت لابس دشداشه سوده بس مايبين عليها دخلت وانه عصبي نار من ورا حجي ابو دحام الكلب يهددني دنك باب غرفتي ودخلت رزق عطت بيها شجابج هنا امشي طلعي برا
رزق : رغم عاط بوجهي بس ماهتميت لان شفته يحتاج مساعده تقربت عليه وكتله خليني اساعدك
علاء: انتي ماتفتهمين كتلج طلعي برا انه اساعد نفسي بنفسي
رزق : ماتحملت وكتله انت ليش هيج وياي ها ليش اذا متحملني كوه طلكني ورجعني الاهلي احسن بس هوه موصوجك صوجي انه اريد اساعدك
علاء: غضبت عليها اكثر وكفت لج صوتج لاتعلينه عليه واذا عليته مره ثانيه اكسر راسج
رزق : اول شي تعلم احترمني يلا ماعلي صوتي عليك
علاء: تقربت عليها وضربتها لان حيل نرفزتني كتلها هاي حتى تبدين تتعلمين الاحترام الضاهر محد معلمج
رزق : رجع مرا ثانيه ضربني واهاني طلعت برا وسديت الباب رحت لغرفتي ورجعت دموعي اخذت مجراها مرا ثانيه ومن يومها قررت بعد ما اهتم لوجوده وحتى لو يموت كبالي مالي علاقه بيه غسلت وجهي وغيرت ملابسي ونزلت جوه لكيت الوكت صاير غده والبنات مشتغلات شغلي كتلهم راسي يوجعني انه صاعده انام
علاء : يعني شجابج كبالي شوصلج انه من افقد اعصابي اضل ماعرف شنو احجي ابقى اخربط بالكلام غيرت على الجرح ونزلت بعد مابدلت لكيتهم كاعدين بالهول دخلت يمهم لبست طبعا تراك مال بيت
علي : شلون صرت بويه
علاء: زين صرت
علي : بويه وتهديد هذا شنو فلمه
علاء : مايخوفني ولا يهز مني شي علي نسيت انه منو
علي : لا بويه بس جاي احجي وحجه عمي صلاح
صلاح : ترا انت حيل مستصغر هالشي انت ماتدري عشيره هذول اكبر هتليه وسرسريه صارو شيوخ كله من البوك والافتره على الناس هسه تكول بسيطه وماتخاف يكدرون ياخذونك غدر
علاء : وانه راح اخليهم يعرفون منو الشيخ علاء وحجي زايد ماريد
صلاح : هسه صار حجيي زايد فوك ما نخاف عليك انت هيج وجرحك ماجاي يطيب بس الضاهر انه دخلت بشي مو من حقوقي
علاء : بلا هالحجي صلاح انت تدري كلش زين رغم لسانك طويل بس انت اقرب شي الي بهالدنيا شلون مالك دخل بس انت شفته شكد شراني ومومال نخاف شيخ علاء عمره ماخاف شي للموت اروح برجليه ومايصير بيه شي ضلينه نسولف ونحجي وحسن ماخذ وضع السكوت وماحجه  كتله شبيك ساكت شو
حسن : لا بويه بس تعبان شويه جاي احس بتعب
علاء: علي تاخذ اخوك للدكتور وشوف شنو بيه
حسن: ماحاجه بويه زينه انه
علاء : شبيك كالب وجهك
حسن : مابيه شي
صلاح : احجي حسن شبيك لا اكوملك والله
حسن : مابيه شي شبيكم
علاء : لعد روح للدكتور
حسن : شوف بويه الصار بيني وبين هجن صح خطا وانه جنت غلطان من ساسي لراسي بس اشوفها مجبوره عليه فماكو داعي لهذا الزواج
علاء : وبعدين شنو راح يصير بعد ابوك والبت بطنها تكبر
حسن : جا تغصبها عليه شراح يصير حياتنه شلون تصير
علاء : شلون مغصوبه وهيه بلسانها وافقت
حسن : اكيد توافق والي بطنها
علاء : جا تنجب وتسد حلكك وماريد نقاش فوك شينه جاي يكول ماريد اعرس عليها اسمع صلاح تقبلها جاي يحجي ودك جواد
جواد : مساء الخير سيدي
علاء: هلا بيك
جواد : سيدي اسف ما اجيتك امس ولا اليوم القائد الف شغله طلب
علاء : عادي
جواد : بس ردت اكلك شنو صار على موضوعي
علاء : تعال بعدين ونتفاهم
جواد : صار سيدي
علاء: سديت الخط من عنده وكتله شفت جاي يتصل يسال على خطيبته الي دمرتها
حسن : دمي غلي خليت وكمت رحت للغرفه وانه افتر منا ومنا اي يسال عليها الساقط والله ماخليها الاحد هجن الي وبس ضليت بالغرفه على ماصار وقت الغده اجت سماح صاحتني رحت كعدت بدينه ناكل
علي : لعد رزق رين
سماح : بالغرفه كالت تعبانه اريد انام
علي : شبيها
سماح : مادري خويه تكول راسي يوجعني ودايخه
علاء : اسمع وانه مدنك اكل بس مااكلت هواي خليت وكمت صعدت فوكً انام تمددت وتذكرت اسلوبي وياها الصبح ماجان زين اف لو بس اضبط عصبيتي شراح يصير يعني خليت ونمت كعدت العصر بدلت وخلصت ونزلت جوه وصلت للهول اريد اطلع وجان اشوف سحر كاعده وسماح تكلها كومي طلعي برا شدخلج هنا صدك ماتستحين
سحر : الله يخليك شيخ سامحني والله موقصدي غيرتي هيه الي عمتني الله يخليك سامحني والله ما ادنه الها مرا ثانيه
علاء : عصبتني حيل لدرجه كضيتها من شعرها وجريتها كتلها لج انتي باي حق جايه لبيتي وطابه وبكل عين صلفه تردين اردج وانتي طاعنه شرف مرتي امشي طلعي برا لا اذبج بالسجون والله لخاطر امج وابوج رجال طيب جان طيحت حظج وحظ اخوج الادبسز
سحر : الله يخليك شيخ والله ماعيدها والله نزلت اريد ابوس ايده ورجله دفرني
علاء: صدك لو كالو الي استحو ماتو بس انتي كل مستحه ماعندج وحده ادبسز وصلفه امشي طلعي برا ماقبلت تطلع جريتها من شعرها وشمرتها برا طبعا حتى شالها تخربط كتلها سحر نسيت اكلج شغله بس قبل لا احجي كالت
سحر : تعوفني على مود هاي الساقطه مادري من يازباله
علاء: عكدت حواجبي وكتلها ترحين فدوه الها على الاقل اشرف منج والشرف مو بس الي بالج لا الاخلاق العاليه هيه شرف بس للاسف ماتعرفنه انتي واريد اكلج شي روحي وانتي طالق ورقتج توصل لباب بيتج وكل حقوقج لان ماريد اشوف وجهج بحياتي كله خليت وسديت الباب بس شنو احس كلبي يفور يفور من العصبيه يعني صدك مارتاحيت دقيقه دخلت للديوان وبدت الايام تمشي واجت اربعينيه هند وسوينه الها ثواب جان يوم خميس كل هالايام ماشفتها ولا التقيت بيها الضاهر زعلها قوي ست رزق المهم حددنه موعد عرس صلاح وسمر وبدت التحضيرات دوم يسولف الي على خبالها وعركهم المايخلص اجه يوم الحنه مالته وجانت يمنه بالحديقه لان حديقتنه حيل جبيره طبعا هالحجي قبل رمضان سوينا لان مابقى شي ويجي رمضان اسابيع قليله البنات محد راحت لحنه البنيه بس صلاح راح حناها واجه بالليل بدت الحنه مالتنه جنت لابس زي عربي والولد هم كلها وهواي ناس اجت وهواي عالم تابعين لصلاح اجو وخلصت الحنه والاخ يركص عبالك مامصدك راح يتزوج خلصت الحنه ودخلت وانه لحد هسه ماشايف رزق ولا اصلا لمحتها حيل شتاقيت الها بس ماطول هيه بخير انه مطمئن زين مادري درت بسحر اجت هنا لولا خليت وصعدت فوك طبعا جبت عمال ينظفون وام كاظم اجت تساعد البنات دخلت لكيت البيت يلمع لمع صعدت فوك وصلت لباب غرفتي وسمعت صوتها تكول هجن تانيني هسه اجيج ماطول محد بالبيت اجيب تلفوني واجي تمام فتحت الباب وطلعت ضليت صافن عليها هاي شمسويه بروحها باوعت بعيوني وارتبكت حيل رادت تدخل للغرفه صحت عليها رزق التفتت وكالت
رزق : بعد ما كعدت من النوم حيل تاثرت بكلام الشيخ وحلفت مايشوف الي اثر كمت لا اكل ولا اشرب يمهم ابد واذا هوه موجود ماطلع ابقى بغرفتي البنات كلهن قدرن وضعي بعد ماسولفت السماح وهجن رغم هجن رفضت كالت ليش تحبسين روحج انتي مامسويه شي خطا بقيت على هاي الحاله لحد مابيوم صحيت على صوت صياح جوه وكفت يم الدرج وجان اشوف سحر واكفه وصوتها يلعلع بس كبر بعيني من طردها وبعدين سمعت من سماح شنو مسوي بيها ومطلكها حتى كالتلي
سماح : اي حياتي فرحي بس يمته يذوب الثلج يا خيه
رزق : رديت عليها وكتلها حتى لو ردت ماراح يذوب لان اخوج مايغير طبعه
سماح : لج هوه الشيخ اكو واحد بطيبته
هجن : كلام سماح صحيح ماكو بطيبته والله
رزق : ماكلت شي بس لسانه حيل متبري منه وعصبي
ومايتفاهم
سماح : لج والله بعدين تندمين اذا خسرتي الشيخ
رزق : انشالله ماكو ندم خليت وكمت من يمهم وانه احس بفرحه خفيفه لان سوه شي لخاطري انه ادري غلطتها ماتغتفر ومحد يكدر يسامحها بس شعوري انو هالشي على مودي كلش فرحني انكر اذا اكلكم ماحبه مابطلت ثانيه من حبه وشوقي اله خصوصا بهالفترا الي بقى مايشوفني بيها اجت اربعينيه هند وعلياء والشيخ ماقصر وبيومها هلكنه هلك صار وقت عرس صلاح والكل فرحان ومتونس انه مارحت لحنه اختي لان صدك جنت مريضه وتعبانه بشكل بوقتها عليه الشهريه وجاي اتاذه من تجي اكثر من قبل بهواي مادري شنو السبب يجوز من اخير شي صار وياي قبل فترا المهم سماح هيه الي شترت الي بدله مارحت انه جان فستان ماروني للركبه والردان شيفون يعني صح بس حنه زلم بس اجو قرايبهم نسوان هواي وهجن بنفسجيه بس مانزلت لان تعبت كلش انه سويت شعري ومكياجي بالبيت احب الشي الهادئ ماحب الهوسه بس ركزت على الايلاينر جان مديله حلو بوقتها كملت الحنه وحضنه طاح من الشغل صعدت فوك اريد ابدل طبعا نضفت وانه بملابسي بس ماتوصخن لان اكثر شي خطيه خاله ام كاظم وبناتها شتغلن كلشي شويه وتذكرت تلفوني صحت هجن ماشفتي تلفوني
هجن : لا ماشفته
رزق : خوش جا نازله جوه اشوفه طلعت برا درت شفت الشيخ حيل ستحيت مالابسه هيج كباله قبل توترت حيل ردت ادخل صاح عليه التفتت كتله تفضل شيخ امر
علاء: صراحه ماجان بالي شي اكوله الها بس ردت اشبع عيني بشوفتها كتلها احم ليش مارحتي لبيت اهلج اليوم
رزق : تعبانه شويه شيخ كلت باجر الصبح اروح
علاء : تمام لعد باجر انه اوديج الصبح
رزق: اجه بالي اسال عليه شلون صار بس ترددت كبل حجه
علاء: تردين تكولين شي
رزق: ها اي شلون صرت
علاء : يعني موكلش زين
رزق : ماشوف شر انشالله يارب خليت ورحت نمت هوه بقى يباوع عليه حتى تلفوني نسيت ما جبته كعدت ثاني يوم حضرت ملابسي واريد اروح لاهلي قبل لاتروح سمر للصالون لكيت محد بالبيت بس حسن كتله وين الشيخ
حسن : صارت سالفه وراح يحلها ويجي وكلي اوصلج امشي
رزق : حيل صار بخاطري بس ماطول شغل اكيد اعذره خليت ورحت وصلت لبيت اهلي دخلت وسلمت عليهم وصلت يم سمر حضنتها وكتلها اسفه سمر البارحه مااجيت بس جنت حيل مريضه وتعبانه طبعا طلعت الصبح البنات نايمات لان ساعه 7ونص طلعنه
سمر : لوما جايه اليوم اموتج
رزق : هوه انه اكدر ماشوفج ومااجي
سمر : اي عفيه يلا امشي وياي للصالون انتي وملك
رزق : خاف امي تريد تروح
بيارق : لا يمه روحي انتي همزين فكيتيني
رزق : خوش عاد رحنه للصالون بقينه يمها لل3 العصر خلصنه خابرنه على محمد يجي ياخذنه ورا شويه اجه الصالون قريب على بيتنه بس شنو طلعت سمر تخبل كلش وانه لبست فستان لونه بيجي ومكياج خفيف بس حمرتي مارونيه خلتلي كالت حلوه عليج تصير وصلنه للبيت ورا ساعه اجت الزفه ونزلت سماح وهجن جايه وتقى كلهن والهوسات تخبل شويه ولبست الكبوس مالتها وطلعناها اجه صلاح بس عين الله عليه طالع يخبل تقربت من يمي هجن وكالت
هجن : طالعه تخبلين شنو هاي ولج كيكه
رزق : لاجامليني
هجن : ولج والله لعد لوشوفين الشيخ شسوين
رزق : شبيه
هجن : انتي شوفيه بنفسج واكف برا
رزق : عاد شتغل عندي الفضول ورحت طلعت برا بعد والبست عباتي وشالي وضليت ادور عليه بعيوني لحد ما اجه بعيني وشفته لابس زي غربي هالمرا يعني شماغ لافه لفه الغربيه ودشداشه وفوكها مثل الصايه لونه بيجي ومخلي الحزام مال السلاح بصفحته يعني شما اوصف شكله اكول قليل بحقه خفت عليه من العين الكل صعد بالسيارات وبقيت بس انه كتلهم وين اروح جا ماشوف غير الشيخ صاح عليه ورحت يمه وشافني ماشوف غير كلي امشي صعدي بسرعه وماسمعلج حس شمسويه بروحج وشلون طالعه هيج صعدت بالسياره وهوه طول الطريق ينافخ اخير شي وصلو يم المصور نزلت تصور سمر وصلاح ماخلاني انزل وصلناهم للبيت صلاح هناك وانه نزلت وياهم بس شنو خرب فرحتي بعرس اختي شويه وخلص العرس وجابو يزفونه صعدنه سمر فوك وهيه وجهه اصفر مادري ليش خايفه ماعرفتها هيج جبانه لسانها بالعاده شطوله
سمر : رزق لاتعوفيني وحدي
رزق: جا شلون ماتكليلي ابات يمكم
سمر: فدوه اخاف
رزق : يلا قوي روحج ماتخوف جاي نحجي وسمعنه صوت الهلاهل يعني اجه صلاح اجه دخل باركت الهم وطلعت شوي واجت سماح كالت الشيخ يكول يلا خلي نروح نرجع المهم لبست عباتي وكملت خليت وطلعت برا انه والبنات هجن وسماح وي حسن وتقى وامها ويً علي بقيت انه رجعت وي الشيخ طول الطريق كاعدين ساكتين البيت موكلش بعيد مكانه يعني مسافه ربع ساعه تقريبا راد يحجي وتردد ضل ساكت كتله شبيك هوه انه كتله شبيك وهوه بقى بس يصيح ويسب انتي شلون هيج طلعين ومنو كلج تلبسين هيج منا ناس وعالم ليش سوين هيج انتي شنو متقصده يعني مارديت عليه بحرف لان ماريد المشكله تكبر جان يسوق ومانشوف الا ...... يتبع

حبايب روحي لاتنسون التصويت والتعليقات الحلوه الي نفسكم احبكم

_______****

لاتنسون تابعوني على الفيسبوك روايات زينب عقيل الموسوي

https://www.facebook.com/profile.php?id=100087899666498&mibextid=LQQJ4d

وايضا قناتي على التيليجرام
@zainabakeel9

ورابط الواتباد للي ماضايفني يضيفني

https://www.wattpad.com/user/zainabakeel_almusawi

________*****

الى هنا انتهى البارت اتمنى ينال اعجابكم

الكاتبه زينب عقيل الموسوي