جار الضبع

بارت (6)

#جار_الضبع

#بارت(6)

لياسة Yaasah Yaasah

أنها واحده من أشد الفترات تعباً الفتره التي
تكتشف بها انك وحيد أكثر من أي وقت مضى
وانك بجميع احزانك لا تعني للعالم شيئاً

              🌿🍃🌿🍃🌿🍃🌿🍃

أجوان -- أخر مره انصابت جُمان بنوبة الصرع قبل سنه ونص و طول هاي السنة والنص هي كلش زينه خطيط دماغها طبيعي الرنين مالتها طبيعي صح بقت مستمره بعلاجها بس تحسنت والدكتور طلب تبقى مستمره على علاج الصرع سنتين ومن بعد السنتين يعيد الفحوصات كلها وراها يلا يقطعه عنها اليوم ما اعرف شبيها وليش هيج صار بحالها رجعت النقطه الصفر وگعت بالگاع مزركه
ما لحگنا نطلع بيها من الحفله كل المعازيم شافو حالتها صارت فرجه للعالم حسبي الله ونعم الوكيل بكل واحد وصلها الهذا الحال

ماما تخبلت بقت تلطم على راسها وهي تشوفها فاقده ما نگدر نشيلها عوض نزع العباة مالته وغطاها بيها وطلب من الناس يبتعدون من عدنا
بقينا بس أني وبكر وامي وخاله ام عوض يمها
دقيقه او اقل الدقيقة وانتهت النوبه عدها
حاول بكر يشيلها ما گدر عاد امي صاحت على عوض اجه شالها البيتنا ورجع يم المعازيم خطيه الولد هم خربت الحفلة مالته نومنها على القنفه جبت غطا غطيتها وگعدنا أني وامي مقابيلها اثنينه نبجي على حالها

جُمان--  بعد ما دخت وگعت بلحفله ما حسيت شنو صار كل الي اذكره دخت وگعت بالگاع
من صحيت لگيت نفسي بيتنا نايمه على القنفه
وأمي وأجوان يمي گاعدات فتحت عيوني بثقل راسي إحسه يريد ينفجر من گد ما يوجعني ودايخه وجسمي نحلان عرفت أني نشمرت گدام الناس وكل الموجودين شافو حالتيزبقيت متمدده بمكاني وعيوني ع السگف ودموعي تنزل بهدوء

صافية --صحيتي حبيبتي

أجوان --الحمدلله على سلامتج حبي

محاوبتهم بقيت ساكته وعيوني معلگه ليفوگ والدموع تنزل منا ومنا

صافية --تشربين علاجج بوقته لو جاي تخربطين بيه

نفس الشي ما ارد

صافية --لا تنقهرين ماما باجر نروح للدكتور وان شاءالله ماكو شي مسحي دموعج

بعدت الغطا مني وگمت جسمي ما متوازن ودايخه حيل سندت نفسي على الحايط ورحت الغرفتي
دخلت وسديت الباب شمرت نفسي على الجربايه وبقيت أبجي بدون صوت بس اكتافي تتحرك
اذكر كلش زين اول نوبه صابتني اذكر شلون ضربني بالخشبه براسي وفقدت وگعت ومن صحيت لگيته مخليني بحضنه ويبجي

غمضت عيوني وبدأ هذا اليوم يمر عليه بكل تفاصيله بقيت افرك براسي ما اريد اذكر ما اريد
عوفني بحالي ما اريد اذكرك شي بقيت اعيط بصوت عالي لحد ما اجت أمي تركض عليه جرتني بحضنها حضنتها حيل واني وجع الدنيا كله بيه تمنيت ارجع زغيرة وانام بهذا الحضن ما على گلبي هم ولا قهر
بقيت بحضنها ابجي واناشغ لحد ما غفيت