أدمنت حبك

بارت ٢١

السلام عليكم
*********

#بقلم - الكاتبه - سانسا
****************

شهد،،،،كعدت ورفعت الديباج وانصدمت لكيت نفسي نازفه شي قليل واخذني الخوف ومنا جسمي يئذيني عركانه جسمي صاير مي اريد اكوم اخاف وسحبت الموبايل واتصلت علئ زوجه هشام وفهمتها الصار بيه  خطيه اجتي والخوف والقلق امبين علئ ملامحها
زوجه هشام،،،،هااا شهد ليش نازفه شكو واكعه صاير
شي اشبيج كومي خل ابدلج واتحضري حتئ اتروحين للدكتوره وانشوف وضع الطفل
شهد،،،،كومتني علئ كيفها ومشيت للحمام وجسمي متكسر بل كوه وصلت للحمام وسبحتني وجابتلي ملابس واحتياطات خاصه وبدلت وطلعت وهيه شالت الفرشه وغيرتها وكعدت عل جربايه وكلتلي خابري السامر انطي خبر بلكت يكدر يودينه ونتئكد علئ وضع الطفل واتصلت علئ سامر مايجاوب وانوب اتصل يرفضه يعني زعلان ميريد يجاوب وأتصل هم مايجاوب وكتلها مايجاوب كالتلي
زوجه هشام،،،،،دزي رساله او بصمه
شهد،،،،دزيت رساله كتبت (سامر تعال للبيت حباب شغله ضروريه) فتح الرساله
سامر،،،،(عندي شغل اني مافارغ المشاكلج )
شهد،،،،دزيتله(سامر يعني اني هسه صرت مشاكل ترئ شغله ضروريه والله )
سامر،،،(من اخلص شغل عود اجي)
شهد،،،،(لتجي ماريدك بعد بس راح تندم علئ هذا تصرفك بل نسبه اليه راح اروح الاهلي اشعندي ضاله يمك اشو بس القهر)
سامر،،،(انتي مره واطلعي عتبت البيت حتئ اشوفج الزلم اشراح اتسوي وطلعلج وجهي الحقيقي)
شهد،،،،حبيت استفزه وكتبت ( اني راح اطلع اليوم واريد لزلمه يحجي ويمنعني)
سامر،،،،(لتستفزيني شهد متطلعين وخلي اكمل شغلي واجي اعرف شتصرف وياج)
شهد،،،،عفته ماجاوبته وره اشويه دزيت(اني طالعه خاف اتكول ما انطت خبر ) ودز رساله وماقريتها كتلها مايجي عنده شغل واني ماكتله انزف
زوجه هشام،،،،ماشي خلي وسام يوصلنه
شهد،،،،لبستني صايه وشال ونزلنه علئ كيفنه ورحت يم عمه وشرحتلها زوجه هشام عن الوضع وراحت تتحضر
عمه،،،،يمه كلتي السامر
شهد،،،،كلتله تعال للبيت شغله ضروريه وماقبل يجي
يكول عندي شغل ماكتله انزف
عمه،،،،غير اتكوليله حتئ يكون عنده خبر يجوز يعوف شغله ويجي
شهد،،،،مااعرف وكملت زوجه هشام واجه وسام ورحنه صعدت بل سياره ومشينه قبل لنوصل العياده اتصل سامر ورفضته ونوب اتصل علئ وسام وجاوبه
وسام،،،،هاا عمي اي ويانه لاراح نوصل اي هاي وياك
شهد،،،انطاني الموبايل وسام واني انطيته الزوجه هشام كتلها ما تكدر احجي وهيه حجت وياا وكلتله راح نوصل وانطتني الموبايل وحطيته علئ اذني
سامر،،،،شهد
شهد،،،اممم
سامر،،،،اني اعلمج وتكسرين كلمتي ليش وماكلتي رايحه للدكتوره ليش ماكلتي مريضه حتئ اجي اعوف شغلي وأجي لو ما أمي كالتلي اني ماعندي خبر مرتي تنزف بس يصير خير
شهد،،،سد الموبايل ورجعته الوسام ووصلنه العياده
ونزلنه حجزنه وننتضر سرانه وصاحو شهد وكمت بس خايفه كلش وطبت ويايا زوجه هشام وحجتلها عن حالتي والصخونه والنحول وكالتلي
الدكتوره،،،سويتي تحاليل عامه
شهد،،،،كتلها لا هاي اول مره اراجع وانطيتها موعد اخر دوره وسجلتلي كالت
الدكتوره،،، سويلي هذني التحاليل وتعالي
شهد،،،وكمنه طلعنه ورحت القسم التحاليل وخفت اني ابصراحه اخاف من الأبره
وزوجه هشام ،،،،يله حبيبتي هيه نغزه خفيفه والله
شهد،،،،يمه والله اخاف والله وكادتني زوجه هشام وطبيت للتحاليل ورخفت وطلعت وعفتها رحت يم وسام كعدت
وسام،،،،،هههه والله اتمنيتك يمي عمي سامر واتشوف هذا لخبال هههه
شهد،،،،اي طبعآ انته ما امجرب الأبره وتضحك عليه
والله اني اخاف وكمنه ورحت وسام كاعدني وصلت للباب وردت افلت ولزمني وسام
وسام،،،،يله عيني ولج فضحتينه فوتي اخذي التحليل
شهد،،،وسام بعدني ماكملت كلامي وسمعت صوته
سامر،،،خير شكو اشكالت الدكتوره
وسام،،،،والله عمي كاعد انقنع ابزوجتك حتئ تاخذ تحاليل بس هيه اتكول خايفه
سامر،،،،شهد شنو خايفه فوتي اخذي التحاليل فضيها
شهد،،،،ما ما اخاف والله واباوع علئ وسام يضحك
عليه وكتله لتضحك ترئ والله ابجي وسامر بينت عليه ابتسامه خفيفه بس ماضحك ووسام حاط ايده علئ حلكه وكاتم ضحكته واجتي
زوجه هشام،،،،ولج يله عيني ينتضرج جوه حتئ يكمل تحليل والدكتوره تنتضرج
شهد،،،ودخلت سامر كادني ودخلني وكعدني عل سكملي واجه المحلل قرنص أيدي وعقمها وراد يدخل الابره ووخرت أيدي وكتله الله عليك مو حيل والله اتئذي الابره
المحلل،،،،لتخافين والله ايدي خفيفه متحسين بيها
شهد،،،،امممم ومديت ايدي وحط الابره وهم وخرتها وكتله لتسحب دم اهواي ترئ دمي هوه قليل
المحلل،،،،لا ما اخذ دم اهواي يادوب اسحب 3سي سي
لان كاتبتلج تحاليل
شهد،،،اممم ماشي يله
المحلل،،،اخي الزم بنتك زين لان دتتحرك أيدها وتتئذه
شهد،،،،باوعت السامر وهوه حضن راسي علئ صدره ولزم ايدي حيل
سامر،،،،كافي بنتي لتتحركين
شهد،،،اسمع دكات گلبه سريعه وحسيت علئ فلت القرنصه مال التحليل وكتله شنو سحبت
المحلل،،،،اي سحبت وكتلج متحسين بيها
شهد،،،،وحطلي لزكه مال جرح شكرآ وكمت رحت بل انتضار وكعدت ووسام مابطل ضحك
وسام،،،،والله عمي الله يساعدك
سامر،،،،بعد اتورطنه شنسوي
شهد،،،والله عاد المعاجبه العجب يرجع
سامر،،،،هااا هيج صارت
شهد،،،،اي مو انته متورط رجع لعد
سامر،،،،مارجع هيه مو لعبه
شهد،،، اممم لعد اتقبل الموضوع ولتكول ورطه
وصاحو اسمي مال تحاليل وكام سامر جاب التحاليل
سامر،، يله شهد ندخل للدكتوره
شهد،،،انته تدخل
سامر،،،ليش عندج مانع
شهد،،،،هااا لابس عيب تدخل ويايا
سامر،،،،لا ماكو عيب عادي ادخل حتئ هم استفسر عن حالتج
شهد،،،اممم ودخلنه وانطيناها التحاليل وكالت
الدكتوره صعدي عل سديه حتئ اخذلج سونار
شهد،،،صعدت عل سديه
الدكتوره،،،،عندج الحمه الألمانيه نسبتها كلش عاليه
وعندج فقر دم
شهد،،،،واجتي حطتلي جل والجهاز علئ بطني وبدت تتحرك واتئشر وتشرح
الدكتوره،،،،هذا الطفل بعده كلش اصغير وحسب موعدج للدوره اخر مره يطلع انتي ابشهر الثالث
تردين تسمعين دكات گلبه
شهد،،،،شعور لايوصف من شعور الأمومه والدكتوره تشرح وكالت تسمعين دكات كلبه اني فرحت وكتلها اي
وسمعت دكاته ضعيغه
الدكتوره،،،،حالته تعبانه ترئ وضع الطفل حيل تعبانه
يرادله تغذيه وراحه ونبضه كلش ضعيف ولهذا السبب نزفت وعدها الحمه الألمانيه هذي خطيره عل أم والطفل احتمال اذا ارتفعت نسبت حرارتها تكتل الطفل
سامر،،،،لعد ليش نزفت اليوم
الدكتوره،،،،صارت عدها مضاعفات وضغوطات بل حمل
وهم سبب الحمه والصخونه
شهد،،،يعني هسه الطفل ابخير
الدكتوره،،،،ان شاء الله ابخير بس يرادله راحه وغذاء واهم شي نسبت الحمه اتقل
شهد،،،،اممم ماشي ونزلت من السديه
الدكتوره،،،ضلي حطي كماده حتئ لو ما امصخنه انتي
وراح اكتبلج علاج للحمه ومقوياات تاخذيهن وتجيني شهر القادم ونشوف وضعج
شهد،،،شكرآ دكتوره
سامر،،،،دكتوره هيه ابد متاكل ونفسهئ تلعب
الدكتوره،،،،كتبتلها مقوياات بعد غصب عنها تاكل
شهد،،،،هههه اممم وطلعنه وسئلتنه
زوجه هشام،،،،هااا بشرو اشكالت وضع الطفل زين
شهد،،،،علئ كيفج خل افهمج وضعه تعبان كلش ابسبب الحمه وراح اخذ علاج الها
زوجه هشام،،،،انشاء الله ماعليه شي
شهد،،،،ان شاء الله بس اشكد حلو من تسمعين نبضات گلبه حلو شعور الأمومه
سامر،،،،يله نرجع للبيت
زوجه هشام،،،،اني ارجع ويه وسام وانتو رجعو سويه
سامر،،،ماشي
شهد،،،،خفت ابصراحه لان سامر ماينسه الشي
سامر،،،،يله صعدي شهد
شهد،،،وصعدت السياره ومشينه اشويه وكلت خل اغير
الجو بل كلام وكتله سامر يعني الطفل مابي شي مراح يصير بي شي
سامر،،،،لاشهد لتخافين ان شاء الله مابي شي بس انتي سمعي كلام الدكتوره اتغذي زين واخذي العلاج والمقوياات والفيتامينات وان شاء الله يصير زين
شهد،،،اممم ان شاء الله وسكتنه وره اشويه وكال
سامر،،،،ليش ماكلتي انزف امكان مكاعده اتنرفزيني ابكلامج جان كلتي اريد اروح للدكتوره وفوكاها كسرتي كلمتي وطلعتي
شهد،،،،اي اني قصدي علئ بيت اهلي
سامر،،،،وكلتي راح اطلع اليوم واريد ازلمه ويمنعني
شنو يعني افهم من كلامج اني مو ازلمه
شهد،،،،لا موهيج قصدي بس حبيت اضوجك مثل ما ضوجتني واني ترئ طلعت علمود الدكتوره
سامر،،،،احسابج بل بيت واشوفج الزلم اشلون اتصير وعلئ شنو اندم
شهد،،،دنكت راسي وصار اعصاب يحجي بعياط واني سكتت ماريد اجادل حتئ متكبر اكثر
سامر،،،ها شو سكتي وين السانج
شهد،،،،حبيت اغير الموضوع لان كلش خفت وكتله سامر
سامر،،،،مااات سامر وخلص وارتاح منجن
شهد،،،،جوووعانه ودنكت راسي وافرك بيدي خايفه من ردت فعله
سامر،،،،اي هسه اخذ عشه للبيت
شهد،،،سكتنه ونزل جاب عشه كباب ووصلنه وبعد ماحجينه شي وطبينه المطبخ و
سامر،،،ام وسام هذا عشه لتعبين نفسج
زوجه هشام،،،،تسلم
شهد،،،،صعدت فوك للغرفه ودخلت للحمام وبدلت وطلعت وحسيت احد سحبني والطخت عل حايط
سامر،،،،اي يت شهد اتهددين وماخذه راحتج بل كلام
شنو عبالج افوتها ألج
شهد،،،،سامر اشبيك أيدي عوفها مو قصدي احجي هيج بس انته هم ضوجتني ابكلامك صرت صاحبت مشاكل
واني كتلك اروح الأهلي
سامر،،،،اي واني كلت متطلعين عتبت الباب واشكلتي انتي اطلع واريد لزلمه يمنعني وطلعتي وكسرتي كلمتي
شهد،،،،بس اني رحت للدكتوره مارحت الأهلي
سامر،،،،المهم طلعتي وكسرتي كلمتي
شهد،،،،بس انته ما انطيتني مجال اكولك اريد اروح للدكتوره وطلعت
سامر،،،،حتئ لو ضوجتج اتكولين اريد أزلمه يمنعني شنو اني مو ابعينج
شهد،،،،اسفه موقصدي بس والله انته ضوجتني ابتصرفك وكلت خل استفزه بس والله موقصدي
ماعبالي راح نوصل لهاي المواصيل
سامر،،،،شهد كبري عقلج اشويه ترئ والله اندمج عل ساعه الأجيتي بيها فهمتييي
شهد،،،،ونتر ايدي حيل ودخل للحمام لزمت أيدي اذتني كلش ومشيت للميز لميت شعري وابجي علئ تصرفه صح اني غلطانه لازم ماأستفزه بس ابقتها ضجت من تصرفه بعد ما اكرر هذا الشي لان اني راح انقهر وأتئذه وكملت ومسحت عيوني واتلمست بطني ما امبينه عبالك موحامل ولبست الشال وطلع سامر من الحمام واجه اتقرب يم الميز ومشط وحط عطر ومشيت اريد اطلع ولزم ايدي وسحبني عليه باوعتله
سامر،،،،،شهد بعد لتكررين هذا التصرف والكلام الكلتي
والله لو مالبطنج جان اعرف شتصرف وياج
شهد،،،،شنو يعني تضربني اتمد أيدك عادي هاي مو اول مره ودنكت راسي
سامر،،،،هل مره راح اعديها ابسبب حالتج بس مره ثانيه متلومين اله نفسج ويله امشي غسلي وجهج حتئ ننزل
شهد،،،،امممم ورحت غسلت وطلعت لكيته نازل قبلي ونزلت رحت للمطبخ وزوجه هشام لكيتها امحضره كلشي ومدينه السفره ونقلو المواعين والصمون والعصاير وجبت لكلاصات وكعدت يم عمه وصبيت العصير وانطيتهم واني اكلت صمونه وعصير
عمه،،،،،شهد اكلي ضبي گلبج يمه طفل هم يريد غذاء
شهد،،،،اي عمه دا اكل واكلت اشويه لفه مال كباب وعصير وشبعت وكمت رحت للمطبخ ووسام شايل المواعين وداعزل بيهن وماقبلت
زوجه هشام،،،،ياعيني روحي ارتاحي اني اغسلهن
شهد،،،،لا اساعدج خامه كل البيت عليج والجهال متكوليلي اشلون اتلحكين فخليني اساعدج وساعدتها وحضرت الشاي وره اشويه وكمل الشاي وحضرت لكوابه واخذته كاعدين وطبيت وكعدت يم عمه وصبيت ووسام ماكو وكمت اني وزعته العمه والعمو والهشام والزوجته ورحت انطيت السامر بس عبالك ماعاجبه الوضع اخذه وينفخ ومشيت وكعدت يم عمه دا اصب وكالتلي
عمه، ،،،موزين الشاي يسوي فقر دم
شهد،،،كتلها بس اشويه اشرب وشربت وكملت وشلت لكوابه وغسلتهن وصعدت للغرفه غسلت وبدلت ومشطت شعري ضفرته ورحت عل جربايه ومددت وخابرت نسرين وحجيت وياها وكتلها عن حالت الطفل
نسرين،،،لعد انتبهي علئ نفسج واهم شي حالتج النفسيه والصخونه خل تنزل وأكلي حتئ لو متشتهبن
اجبري نفسج علمود الطفل
شهد،،،اي ماشي راح أكل وأهتم ابنفسي
نسرين،،،،حبيبتي مابيج غير العافيه وسلمينه عل كل
شهد،،،،الله يعافيج يعمري وانتي هم سلمينه باي
وسديته من نسرين ونمت عل مخده وحسيت علئ
فتحت الباب ودخل وشمر عليه علاكه
سامر،،،،هذا الدوه
شهد،،،،ماحجيت شي اخذته الدوه وكمت رحت للثلاجه وسامر راح للحمام وطلعت بطل مي ورجعت للجربايه
واخذت العلاج مكتوب تعليماته وأشوكت ينئخذ
وحطيت العلاج عل مير الجربايه ورجعت المي بل ثلاجه ورجعت عل جربايه ونمت انطيته ضهري وسامر طلع من الحمام راح للميز مشط واجه عل جربايه ويكلب بل موبايل واني منطيته ضهري وكام طفه الضوه ورجع يكلب بل موبايل وتوصله رسائل وصوت مال كتابه رسائل وأرسال وعفته واني هم سحبت موبايلي وطبيت عل وات ساب علئ سامر مامتصل وعل فايبر هم مامتصل والأنستا طلع نشط الان يعني متصل وعفته وبقيت اكلب بل انستا اشوف ملابس اطفال وسرير مال اطفال عجبني كلش حلوات الملابس
يخبلن ملابس البنات احلئ من الولد وطفيت الموبايل
ونعست وسامر بعده كاعد يتراسل ونمت وحسيت علئ ملمس علئ شعري ما اعرف حلم لو واقع اني انعس من احد يتلمس ابشعري أبفروت راسي ونمت وكعدت علئ صوت فتحت باب الحمام وطلع سامر من الحمام واني كاعده عل جربايه انتضره يصبح عليه مثل قبل من يشوفني اكعد هوه يكول صباح الخير بس هسه ما كالها بس اني كلت صباح الخير وباوع عليه عبالك ماعاجبه شي
سامر،،،،امممم صباح النور
شهد،،،،،جاوبني واندار عل ميز
ورجعت مددت عل جربايه وبقبت اباوعله احسه صاير بارد كلش وعفته ماحجيت شي بعد وطلع وعافني حتئ ماكلي تردين شي اعتبرني ماموجوده اني مامتعوده علئ هذا تصرفه وبروده وكمت رحت للحمام غسلت وبدلت ونزلت جوه بل مطبخ كاعد عمو وعمه وهشام وسامر ديتريكون وصبحت عليهم وعمو كلي
عمو،،،ابنيتي اشلون صرتي تعالي اتريكي اهم وجبه هيه الريوك تعالي يمي اليوم اني اريكج وريك حفيدي من هسه ادلله
شهد،،،،تسلم عمو متقصر ومشيت وكعدت يمه وسوالي لفه جبن كيري بل صمونه واكلت منها وصبيت شاي وماحجيت شي بعد واشوف سامر نضراته عليه ومن
يشوفني انتبهت عليه يندار وكمل الريوك وطلع وعمو وهشام هم طلعو وبقيت اني وعمه وشلت المواعين غسلتهن وكملت وصعدت الغرفتي واخذت علاجي  ومددت عل جربايه احس نفسي صخنت وبل كوه كمت نكعت نفسي ورجعت نمت وحسيت احد يتلمس خدي أيدين ناعمات كلش وبوسه بس نعسانه اريد اكوم ما اكدر النعاس امسيطر عليه وفتحت عيني وجان اشوف
شهد،،، حجيت ابصوت تعبان منوشه منو جابج اهنا تعالي انطيني بوسه وبستها وكالت بابا جابني وانفتح باب الحمام وعرفت سامر موجود لعد اني اشكد نايمه وماحسيت علئ نفسي احس اعضامي متكسره من الصخونه وكلت المنوشه حبيبتي جيبيلي مي من الثلاجه وكامت راحت جابت بطل مي وشربته كله وكالت منوشه ماما بيج( واوا )يعني اوا كتلها اي جسمي يئذيني وكتلها صيحيلي ماما كليلها ماما شهد اتريدج بيها أوا وكامت منوشه وطلعت وسامر كاعد عل قنفه يباوعلي بس ما اجه يمي وما كلف نفسه يسئلني اشبيج وكمت ابجي من الألم لبجسمي واجتي زوجه هشام دكت الباب وفتحلها سامر  ودخلت واجتي عليه
زوجه هشام،،،،هاا شهد بيج شي رايدتني منوشخ اتكول ماما واوا
شهد،،،كمت ابجي وكتلها بعد ما اكدر احس نار تطلع من جسمي ويئذيني كلش حبابه كوميني اريد اغسل بلكت اتفك لصخونه وكمت علئ كيفي وطبيت للحمام وسبحتني وطلعت جابت ملابس ولبستني وكعدت عل جربايه وغطتني وهذا كله سامر كاعد عل تخم ما اتحرك وحاجتني ابصوت ناصي
زوجه هشام،،،،،شهد شكو متزاعلين اشعجب سامر ماحجه شي ولا كام عليج
شهد،،،،اي زعلان لان طلعت بدون ما اكله وصارت بينه كلام واني نرفزته وكتله اروح لهلي ماضل يمك اطلع وأريد ازلمه اليمنعني وهوه زعلان علئ كلامي وعصب كلش وكال اندمج علئ تصرفج
زوجه هشام،،،،انتي تعرفي عصبي ليش هيج تحجين وتخلي يعصب اكثر
شهد،،،،ترضين اني دا انزف واكوله تعال شغله ضروريه يكلي مافارق المشاكلج يعني اني صرت ام المشاكل
وكتله اذا هيج اشعندي ضاله يمك لعد اروح لهلي ويكلي اذا تطلعين الباب تعرفين شسوي
واني كتله لعد طالعه ومن هاي زعلان بس اني ماطلعت اتونس طلعت لان دا انزف ورحت للدكتوره
زوجه هشام،،،،،الغلط منج عوفي لتضوجيه بس لازم اتكوليله راح اطلع لان دا انزف
شهد،،،،بس هوه ضوجني وهيج سويت واني هسه مقهوره منه كلش حتئ لو زعلان مني ويشوفني هيج حالتي مايجي عليه شنو من گلب عنده
زوجه هشام،،،،،لعد اشايفه عيني صح اتشوفيهم يضحكون يتشاقون بس لو عصبو وزعلو بعد هاهيه عاد همه اشوكت مايعجبهم يفكون هسه عوفي لتحجين وياا عوفي ولا اتجادلين ماشي اني رايحه اصب غده
شهد،،،،اممم ماشي وطلعت وبقيت اني ابكاني نايمه عل جربايه وهوه دي كلب بل موبايل واني ضليت أكل ابروحي اتندمت عل شي السويته بعد ما استفزه لان اني الأتئذه بل أخير من وره بروده وتعامله ولاكلف نفسه يحجي كلمه ويايا اقلها يسئل عل طفل بس ماكو زعلان واني اكتشفت شي جديد ابسامر من يزعل بعد يقفل مايهمه شي وعفته علئ راحته ماحجيت شي وياا
وره اشويه دكت زوجه هشام عل موبايل
زوجه هشام، ،،،يله حبيبتي تعالو اتغدو ابسرعه لان صبيت الأكل
شهد،،،،،اممم اني ماريد اريد انام
زوجه هشام،،،،ياعيني ترئ ميصير الدسوينه راح اتضل لصخونه نايمع عليج مازول متكومين ولاتاكلين
شهد،،،،والله احس جسمي متكسر ونحول عندي
وسديته وكام سامر حط موبايله عل شحن ودخل للحمام وموبايله يرج امخلي عل هزاز وكتلني الفضول  وكمت ونسيت حتئ المرض ردت اروح للموبايل وطلع سامر من الحمام وغيرت طريقي ورحت للكنتور طلعتلي ملابس ودخلت للحمام وغسلت وبدلت هههه لو ما الفضول جان ماكمت وطلعت ولكيت سامر ديكلب بل موبايل باوع عليه وبقه يكلب واني نزلت وعفته وطبيت بل مطبخ ولكيتها امكمله الغده وصبو ودخلت يمهم وكعدت يم عمه واكلت اشويه نواشف ما اشتهي بس علمود العلاج بس سامر مانزل وكملت كمت غسلت
وشلنه المواعين بقيت اعزل ويه زوجه هشام وكملنه المواعين واجه سامر كال
سامر،،،،ام وسام بله زحمه صبيلي غده
زوجه هشام،،،،صار هسه اصبلك
شهد،،،،،باوعت عليه ودنكت راسي وكتلها شفتي اشلون يتصرف هيج ويايا ما ألي وجود ابحياته وكالتلي
زوجه هشام،،، اصبري والله كريم هوه يصالح نفسه عوفي لتحجين وياا
شهد،،،،امممم وصبت الغده وودته واجتي واني رحت اخذت الشاي وصبيت وعناد بي كمت اني وزعت لكوابه الشاي باوعت عليه شفته يباوعلي وضايج عفته ما اهتميت وكلي عمو
عمو،،،،شهد بنتي تعالي يمي
شهد،،،،ورحت يم عمو وكلي
عمو،،،،اشلون صرتي ابنيتي حفيدي امتعبج
شهد،،،،لاعمو بس الصخونه احس جسمي نار ونحول عندي
عمو،،،،انشاء الله اتكومين بل سلامه
شهد،،،،الله يسلمك عمو
عمو،،،،محتاجه شي اني اعرف نفسي هاملج
شهد،،،،لا سلامتك عمو وبقيت كاعده يم عمو وباسني من راسي وحاضني واشوف سامر عيونه يريدن يطلعن
بس اني هم عاندت وبقيت كاعده يمه واسولف ويه عمو وكملنه وشلت لكوابه ورحت للمطبخ وغسلتهن ودخل سامر شايل الأكل وحطه عل سنك واني رحت دا أعزل بيهن وسامر حط الشاي عل طباخ وكعد عل ميز الطعام وره اشويه دك الموبايل مالته وفتح خط وجاوب
سامر،،،،هله عيني اشلونكم شخباركم
شهد،،،وكام وطلع بل حديقه واسمعه يحجي ويه ابنيه
سامر،،،،حبيبتي مثل شنو اتريدين اتصرف من يمي اني كتلج رجلج مو مال واحد ينطي فرصه بس اني اعرف اشلون اتصرف وياا خليها عليه
شهد،،،،اني سمعت هذا الكلام لو حسيت سجينه ونغزها ابگلبي وكمت ابجي شنو يعني معقوله سامر يحب وحده لو سامر رجع النور ويحجي وياها لان يكول زوجج مو مال واحد ينطي فرصه والله اذا صدك وبعده يحب نور ورجعت علاقتهم والله ما ابقه دقيقه يمه وخلي اتفيده نور الباعته واتزوجت غيره وهسه رجعتله بس خليه اشوف وين توصل وياك سامر واجه دخل المطبخ وشافني
سامر،،،،متشوفيت الشاي احترك مطفي
شهد،،،،جنت اعزل لكوابه مسحت ادموعي وانداريت عليه كتله ما انتبهت وردت اطلع من يمه ومشيت وسحب ايدي
سامر،،،،شكو من شفتج وشفتيني بس تبجين عبالك طفله شكو صاير شي
شهد،،،، حجيت ابنبرت مخنوكه لا سلامتك ماصاير شي ليش حتئ لو صاير شي يهمك
سامر،،،،شهد لا ما يهمني اصلن انتي كلج متهميني المره التكسر كلام زوجها وتعاند بعد متهمني
شهد،،،،حسيت كلامه أذاني كلش وحسيته من كل گلبه يحجي هيج وكتله ماشي لعد اذا ماهمك عوفني
سامر،،،،هههه
شهد،،،،لتضحك ولتستهزء ابكلامي والله عوفني هم اني ارتاح ماضل متئمله شي وهم  وهم انته ترتاح وتشوف حياتك واتعيش اجواء المراهقين
شهد،،،،جان يضب علئ ايدي حيل حسيتها راح اتطك من قوه أيده
سامر،،،،شنو قصدج لتحجين ابلغز احجي شنو قصدج
شهد،،،،قصدي فهمته انته كلش زين وهسه عوف أيدي
سامر،،،،،احجي شهد شنو تقصدين
شهد،،،،شوف سامر لاعبالك اني اصغيره وغبيه ترئ اني افهم كلش زين وحافضه تصرفاته بس انته هم لاحض نفسك وانته تعرف شنو قصدي وفكيت أيدي منه ابقوه ونترت أيده وطلعت من المطبخ وصعدت فوك أبجي وطبيت ابغرفه سامر القديمه حتئ ماريد اشوفه بعد لان راح يصعد ينام الضهر وما أريد اتعارك وياا ماعندي قابليه وقوه ما اتحمل وطبيت الغرفته وكعدت عل جربايه وكمت ابجي واتذكر كلامه ويه لبنيه معقوله سامر هيج يتصرف بس سامر مو مراهق ويحجي ويه بنات سامر ماعنده هيج شي وضليت افكر لحد ماتعبت ونمت وكعدت الدنيا نهايت العصر وكمت رحت الغرفتي هسه سامر طالع رايح للمكتب وطبيت ماكو سامر رايح للمكتب وكعدت اكلب بل ابلازمه ومشه الوقت وكمت غسلت وطلعت من الغرفه صح مقهوره بس ماريد اتعب نفسي عل مايفكر بيه بعد معليه بيه ونزلت جوه وكعدت يم عمه وانسولف واجتي زوجت هشام جابت جاي وكعك وكعدنه ناكل وره اشويه كمنه انسوي عشه
سوينه لحم ابعجين وجهزنا سويه اني وياها
زوجه هشام،،،،،شهد صاير وياج شي شو وجهج امبين عليه باجيه صاير شي
شهد،،،،،لاماصاير بس تعرفين سامر مايحجي ويايا بس كاعد يغثني بلكلام وحجيتلها عل شاي وكلامنه بس علئ لبنيه اليحجي وياها ماحجيتلها كلت خل افهم الموضوع زين يله احجي
زوجه هشام،،،،كتلج عوفي هوه منه وكيفه يراضي روحه
شهد،،،،امممم وكمله وشوينه الحم ابعجين واجمي كلهم سلمو وطبو وبدينه انصب الاكل وكملنه وكعدت يم عمو واكلت وكملت وكمت اول وحده لان اكلت شي قليل وصعدت فوك الغرفتي عبالك احد كلي اصعدي للغرفه وطبيت ورحت للحمام وغسلت وطلعت واسمع صوت هزاز بل غرفه وشفت الموبايل مال سامر عل شحن ورحت يمه وجان اشوف المتصل مكتوب عليه
(شرايين قلبي) ويمه قلب من شفته حسيت نفسي رخيصه وحسيت بل خيبه وحسيت بعد رجليه ما اتشيلني وگلبي دكاته صارت سريعه وانتهت المكالمه واشوف خمس مكالمات ورحت للجربايه وكعدت وبقيت اخذ نفس عميق وقررت اعوفه علئ راحته لحد ما الزم عليه مستمسك بس جيب ليصبر گلبي واشوفه يخابرها لو يراسلها بس هم ميخالف لازم اتحمل
وكمت غسلت ونزلت وغسلت المواعين وصبيت شاي وكملنه وغسلت لكوابه واختنكت لان دا أفكر بلي صار وطلعت بره بل مرجوحه كعدت وكمت أبجي احس مخنوكه وشي كاتم علئ نفسي واتنفست وارتاحيت
وكمت طبيت جوه وصعدت فوك وصلت للغرفه واسمعه يحجي
سامر،،،،ياحبيبتي يا عيني والله انطيه درس ماينساه طول عمره والله اخليلج قيمه بس اصبري اني اتصرف
ويه زوجج اخليه يطلعج ابيت وحدج اتحملي اني اعرفج قويه انتي والجهال اشلونهم بوسيلياهم واني امرلج للبيت ونتفاهم
شهد،،،،اسمع كلامه وكمت ابجي هل كد يحبها وخايف عليها ويروحلها للبيت بعد ماكدرت اتحمل ودخلت للغرفه ومن شافني
سامر،،،،اشويه واخابر
شهد،،،،من كد مافور دمي وانقهرت وكتله عادي اخذ راحتك لتطلع بره احجي يمي لان متهمني ما اعرف اشلون طلعت مني هذا الكلام والرخيص يضل رخيص
شهد،،،،وجان يجي يسحبني من ايدي وجابني ابراشدي من قوته بعد ماحسيت ابخدي ووكعت عل جربايه ولزمت خدي ما اتوقعت هيج يتصرف ومااعرف اشلون طلعت مني هاي الكلمه ماحسبت احساب عقوبتها
سامر،،،،منو الرخيص
شهد،،،،بقيت مصدومه من تصرفه ماجاوبته وهم ضربني راشدي الثاني ماحسيت بيه من صدمه راشدي الاول احس خدي اشتعل نار
سامر،،،،،احجييي منووو الرخيصصصص
شهد،،،،كام من يمي ويحجي عليه انتي صايره فرد نوب وتجاوزين وشايفه نفسج ويعيط ولزمت بطني وكعدت عل جربايه وكمت. علئ كيفي وردت اروح للحمام وجرني من شعري سحبني عليه
سامر،،،،متطلعين منا اله اتكولين منو الرخيص
شهد،،،،وكتله سامر عوفني شوف نفسك شوف تصرفاتك مال مراهقين وخليها ابالك الباعك مره مستعد يبيعك مرتين واتلاثه عوفني الله يخليك بعد ما اكدر شعري راح يتكطع بيدك
سامر،،،،اشكاعد اتخربطين شهد منو الرخيص يولي اني رخيص ابنضرج وعلئ شنو صرت رخيص لان انطيتج مجال وفتحت صفحه جديده واتقبلتج ابحياتي بس منا وهيج اعرف اشلون اتصرف وياج
شهد،،،،وهد أيده من شعري. ابنتر ورحت طبيت للحمام وكامشه بطني واشوف خدي مشتعل نار احمر صاير اغسل ابمي بارد احسه مي حار علئ خدي والأثر امبين علئ خدي وكمت أبجي وضليت بل حمام وطلعت وماكو سامر ودورت للموبايل مالته ماكو طاله هوه والموبايل شي اكيد ديحجي ويه لبنيه ورحت عل جربايه ومددت واتغطيت ونار ابگلبي عبالك بركان يغلي ونمت من بعد تفكير وقهر ومعانات وحسيت علئ سحبت الديباج يعني اجه ينام يمي ومدد وسمعته يحجي ابصوت همس يكلي
سامر،،،،ليش اتخليني ائذيج غصبآ عليه وانتي صايره تتجاوزين كلش بس انتي مافهمتي الموضوع واتجاوزتي وخليتيني اضربج هذا خدج مو مال ضرب مال واحد يبوسه بس انتي ابكلامج ماخليتيني الزم اعصابي يعني اني صرت رخيص ابنضرج
شهد،،،،يحجي ابهمس عباله نايمه ونام عل مخده مالته
واسمعه يجر حسرات ونمت وكعدت سامر رايح وكمت للحمام غسلت واشوف أثر خفيف علئ خدي وكمت ابجي يعني يضربني علمودها وطلعت ورحت مددت عل جربايه وابجي عل صار البارحه ورجعت نمت وكعدت علئ منوشه ماما تعالي اكلي عم كتلها ماريد وراحت واجه سامر ودخل للحمام وطلع اجه نام عل جربايه
ولا عبالك احد موجود يمه بلغرفه ونام واني هم نمت ماحجينه شي ولاكلمه ومشت هيج أيامنه محد يحجي ويه الثاني وعفت كلشي بس البجي والقهر ماعفته اشوفه يكشخ ويبدل طبعآ امرتب ابهيج أمور بس اني كمت ادقق علئ كلشي ويطلع مايحجي ويايا حتئ ملابسه هوه يحضرهن ويغسلهن حتئ مايحجي ويايا بس بليل من انام احس عليه يحجي ابصوت ناصي ويتلمس علئ شعري لو ياخذ خصله من شعري ويشمها. واني منطيته ضهري وابجي بدون صوت بس ادموعي تنزل وقررت احجي العمه عل صار ما اكدر اضل ساكته
ونمت وهم كذالك الصبح رايح للمكتب وكمت رحت للحمام غسلت وبدلت ونزلت جوه وكعدت ابغرفت عمه وحجيتلها علئ تصرفات سامر وتعامله ويايا ومن ضربني
عمه،،،،،عزاا العزاني يايمه هيج يتصرف بس يمه ابني واعرفه ماعنده هيج سوالف بنات ومراهقين  مولان ابني وادافعله لاوالله يايمه اني وياج بس هم ارجع واكولج ابني مايسويها خاف قصدج علئ نور بس هوه نساها ولايمكن يرجعلها هوه كلي نور طلعت من گلبي وشافت حياتها واني هم اريد اشوف حياتي
يايمه اتئكدي سامر عاف نور من زمان لايمكن يرجعلها حتئ لو هيه اجتي اتبوس رجليه مايرجعلها ولايتقبلها بعد بس ما اعرف ويه منو يحجي
شهد،،،،امممم عمه اني سمعته يكلها اني انطي درس عمره مراح ينساه ويكلها بوسيلي الجهال واني امرلج للبيت عمه يروحلها للبيت شنو يعني هذا تصرفه
عمه،،،،عوفي يمه اني احجي وياا وافتهم الموضوع منه
شهد،،،،،ماشي عمه وكمت ابجي ونمت ابحضنها
ومسدت علئ راسي وكمت من يمها ورحت اكل سويت شاي وطلعت جبن كيري وأكلت وكملت وطلعت بره بل حديقه وكعدت عل مرجوحه واخذت نفس وارتاحيت لان حجيت العمه اقلها افرغ من همي وارتاحيت اشويه شميت هوئ ونفهت عن نفسي ودخلت جوه بلشنه ابترتيب البيت والتهينه بل غده وحسيت نغزات ابطني حسيت شي ينبض ابطني صح اول مره اجرب هذا لحساس عرفت طفلي ديتحرك لو نبضاته حسيت بيها 
وكملت الغده وصعدت الغرفتي وطبيت للحمام غسلت وسديت البوري وصفنت علئ لمرايه واتلمس خدي الضربني سامر وكمت ابجي وامسح علئ خدي وسمعت الباب الغرفه انفتحت ما اهتميت حتئ لو سامر مايهمني بعد وغسلت وجهي لان عيوني حمر وطلعت فتحت الباب الحمام وصار ابوجهي سامر شايل ملابسه ويريد يفوت للحمام وباوع علئ ملامحي ودنكت راسي ومشيت من يمه وسحب ايدي ورجعت عل حايط ودنكت راسي ونزلن ادموعي حسيت ابغصه صارت ابلعومي ورفع راسي باوع بعيوني ومسح علئ خدي الضربني بيه واتقرب اكثر ووخرت من يمه رحت للجربايه وكعدت عليها ماريد اي تصرف اندم عليه واندار عليه
سامر،،، شنو اتعززين ابنفسج عليه
شهد،،،،،دنكت راسي ومسحت ادموعي وكتله ابصوت مخنوك لا ماعزز نفسي عليك بس انته شوف تصرفك وشنو لتريده
سامر،،،،خليج هيج ماريد شي منج
شهد،،،،كمت وكتله سامر وماسمعني دخل للحمام يعني عزت عليه نفسه ومشت حياتنه هيج تصرفه بارد اتجاهي وماكدرت اسامحه علئ تصرفه ومدت أيده عبالك لعبه بيده ساعه يحضن يبوس وساعه يضرب ولازم اني اتقبل الامر لازم ما ازعل وفد يوم طلعت بره بليل بل حديقه وسمعته يحجي ويكول
سامر،،،،،ياروحي انتي كتلج هاهيه لازم اوكفه عن حده اصبريلي باجر جايج للبيت واتفاهم وأجيبج يمنه عباله ماعندج زلم
شهد،،،اني سمعت كلامه وكمت ابجي وامسح بدموعي حسيت صارت مغصه ابطني قويه ولزمت بطني ومشيت وطبيت جوه بل مطبخ شربت مي حسيت حلكي يبس وصعدت فوك الغرفتي وطبيت للحمام وكمت ابجي هذا مكان ضعفي الي اكدر ابجي بيه ابراحتي وحسيت مغصه قويه صارت ابطني ما اعرف الصار بيه من كلام سامر السمعته ويه لبنيه معقوله هيج ابسهوله البشر يبيع ابسرعه وينسه وعوده اليه بس ما اتصور هيج سامر معقوله يصادق بنات لو يحب وحده لو رجع النور واني دايخه وغسلت وطلعت من الحمام وكعدت عل جربايه واجه سامر دخل للغرفه باوع عليه اشويه ودخل للحمام غسل وطلع واني مددت واتغطيت بس بطني اتئذيني واسمع موبايل
سامر يهتز وعفته واجه نام عل جربايه وبده يكلب بل موبايل وعفته وانطيته ضهري وبقه عقلي ياخذ وينطي بل أفكار ونمت وكعدت الصبح سامر طلع من الحمام
امبدل وراح اخذ لسويج والموبايلات وباوع عليه ومشه من يمي وبعد ما تتحمل وكتله بل عافيه عليك الشي دسوي شنو رايحلها رايحلها بعد متكدر شوف اكلك بس تطلع باب الشارع اني ما ابقه دقيقه اهنا بلبيت واتمنه تطلع انته حتئ اصير كد كلمتي لان هل ايام النسوان توفي ابكلامها الزلم بعد ماعدهم كلمه لان بس يوعدون ومايوفون والله ماابقه دقيقه بل بيت علئ شنو ضلتي اهنا
سامر،،،،شنو اشكاعد اتمسلتين انتي شنو قصدج رايحلها
اريد مره تطلع حتئ اعرف شنو اتصرف
شهد،،،، فر بيده وطلع طبك الباب حيل وكمن الحمام غسلت وبدلت وطلعت ورحت للكنتور لميت كم غرض بس المهمات عندي وكلت وقررت اروح البيت اهلي
وكملت ونزلت اتريكت وكملت وطلعت للحديقه واتذكر كلامه الحلو والموحلو وطبيت جوه ومشت الساعات وسوينه غده وكملنه وبقه اشويه ويجون وصعدت فوك حضرت الغراض وبدلت وحضرت نفسي واجه دخل سامر للغرفه شافني وكلي
سامر،،،، وين شنو هذا شنو الجنط
شهد،،،،ملابسي وغراضي مثل مدشوف اريد اروح الأهلي وانته ضل يم حبيبت گلبك يم (شرايين قلبي )
سامر،،،،لتتخبلين شهد وممنوع تتدخلين ابخصوصياتي
شهد،،، ههه ضحكتني والله خصوصيات كلت بل عافيه عليك خصوصياتك دا احجي وياا ودك موبايله وباوع عليه وضحكت كتله اخذ راحتك عيني احجي وياها لو خايف مني
سامر،،،،،شهد كافي ولتلحين واسكتي
شهد،،،،وفتح خط ابكل عين ويحجي وياها
سامر،،،هله عيني شنو لاوالله هذا بعد ما اكدر اسكتله هسه جايج انتضريني
شهد،،،،وسد الموبايل وكال
سامر،،،،شهد ممنوع تطلعين والله راح تندمين اذا هل مره طلعتي وكسرتي كلمتي
شهد،،،هههه لاوالله اتريدني انتضرك تجي من حبيبتك
سامر،،،،شهد كافي وشغلي عقلج وكافي اتفكرين بيه ابشي مو زين تندمين والله
شهد،،،،مو كد الندم العايشه بيه هسه عافني وطلع وبقيت اكل ابنفسي ومانزلت طولت  يله نزلت من سمعت صوت جوه عالي ونزلت وجان اشوف سامر
دخل سامر واعصاب صاير وشعره منفوش امبين متعارك وكعد عل تخم وكال عمو
عمو،،،،خير اشصاير شنو هذا وضعك
سامر،،،يابه اتعاركت

شتتوقعون راح يصير ويه شهد

وسامر شنو شغلته وتغير طريقت تعامله

ويه شهد وشنو راح يصير وياهم
اول شي احب اباركلكم ابشهر الفضيل
رمضان كريم عليكم يا أحلئ متابعيني
وان شاء الله سنه خير عليكم ويتقبل الله
صيامكم وقيامكم وطاعاتكم

ابرئيكم شهد منو شافت واشراح يصير وياها
واشراح يصير ابحالتها اتمنا اتصوتون واتعلقون
واتقدرون تعبي

احلئ بارت لأحلئ متابعيني اشكركم علئ تعليقاتكم الحماسيه وابصراحه دتشجعوني اكثر علئ كلشي
وحماسكم امبين حماسكم من تعليقاتكم واريدكم
اتصوتون اكثر وأتعلقون اكثر حتئ تصعد الروايه

للحكايه بقيه

لتحكمون ع الروايه من بدايتها

لتنسون التصويت ⭐ والتعليقات 🌹