أدمنت حبك

بارت ٢٣

السلام عليكم
*********

#بقلم - الكاتبه - سانسا
****************

شهد،،،حضني ونمنه نوبات الصخونه خفيفه ونوبات كلش قويه احس جسمي يصل عليه احس اعضام جسمي منتهيه من الألم والنار لبداخلي بركان ويغلي دائمآ الكمادات متفارقني واكوم ابرد جسمي حتئ لو مابيه حيل اكوم اجبر نفسي لأن شي صعب اتحمله من الألم حسيت علئ نغزات ابطني واني نايمه وكعدت مامتحمله نغزات بطني وكمت ابجي من الالم وكعد سامر حس عليه دا ابجي
سامر،،،،شهد شنو شكو اشبيج تبجين
شهد،،،،من بين شهكاتي وألمي وكتله سامر بعد ما اتحمل بطني دتئذيني كلش ونغزات كلش قويه
سامر،،،ليش هيج ديصير ويااج اوديج للمستشفئ كومي اتحضري
شهد،،،،لا ماروح اصلن هسه خفر خليها علئ باجر
سامر،،،وشلون تتحملين للصبح
شهد،،،،لا ما اتحمل والله
سامر،،،،لعد خل انروح للمستشفئ وانطي خبر الأم وسام
شهد،،،،هاك انته خابرلها وانطيته موبايلي وخابرلها
سامر،،،،عيني ولو وقت مو مناسب بس شهد موزينه كاعد تتلوه من بطنها ودتبجي اني راح اوديها للمستشفئ بس دا انطيكم خبر
زوجت هشام،،،،،اصبرلي جايتكم
شهد،،،،سده الموبايل وكال جايه وكعد يتلمس راسي
سامر،،،،عيوني تتحملين لمن نوصل المستشفي ماريدج تبجين
شهد،،،،صح عصبي ونار علئ اقل شي يفقد اعصابه ومايعرف من يعصب شيتصرف وبس ابنفس الحضه حنون كلش ماكو مثل طيبه گلبه ويتلمس راسي وشعري ويصبر بيه لحد مااندك الباب وكام فتحلها الباب وطبت
زوجه هشام،،،،هااا خير اشبيها شهد
سامر،،،،ما اعرف بس تتلوه من بطنها
زوجه هشام،،،،حبيبتي خير اشبيج من اشوكت اتئذيج بطنج
شهد،،،من صخنت كلش هيه اتئذيني وهسه احس نفسي عركانه صرت مي من الصخونه ودتئذيني بطني
زوجه هشام،،،،،اتحسين ابنبض حركه خفيفه
شهد،،،،اي جنت احس حركه خفيفه ابطني يعني احس بيه بس صارلي كم يوم ماكو اي حركه ولا مثل النبض
زوجه هشام،،،،،لعد لازم انتئكد انروح انشوف شنو هذا الألم لبطنج
شهد،،،وين انروح هسه وكلها خفر
سامر،،،،لعد يعني نبقه كاعدين للصبح ننتضر الدكاتره لاعيني امشي كومي لبسيلج شي وخلي انروح عل اقل بس ناخذ سونار ونتئكد من صحت الطفل ونتطمن عليج
شهد،،،،امممم ماشي وكمت كعدت عل جربايه واجتي زوجه هشام،،،،ساعدتني ووخرت الديباج وكمت
علئ كيفي ومشيت للحمام
سامر،،،ام وسام بله زحمه ملابس الشهد
ام وسام،،،،عيوني صار
شهد،،،،وكادني سامر ودخلنه للحمام كامش أيدي ولازمني من خصري ومقربني عليه حيل وهمس
سامر،،،،لتخافين گلبي هسه تطلع مجرد تقلصات
شهد،،،،حضني حيل وسمعت كلمه گلبي لو حسيت طرت وحتئ الألم نسيته وحطيت راسي علئ صدره وشميت عطره وكتله ما اعرف ليش هيج أحبك احس روحي أدمنت الحبك صرن ادمان علئ حبك وعطرك
سامر،،،،،ههههه صايره رومانسيه اله بل حمام تتغزلين
متتغزلين بل غرفه حتئ انشوف شغلنه
شهد،،،،يااعزا سامر اني ابيا حال
سامر،،،،هههه هوه اني لو انتي تتحارشين بيه
شهد،،،،هيج صارت فوك ما اكولك أحبك
سامر،،،،اعرف اتحبيني ومتحملتني عصبيتي طبعي
شهد،،،،اممم وكفت يم المغسله لملي شعري بيده هوه صار ورايه واني غسلت وجهي وكملت
سامر،،،،تسبحين اتريحين جسمج
شهد،،،لا ما اكدر
سامر،،،،،اني اساعدج
شهد،،،،هااا لا ماريد ودنكت راسي
سامر،،،،شنو تستحين مني واني زوجج سترج وغطاج
وروح وحده
شهد،،،،هااا لا ماريد ما اكدر وافرك بيدي
سامر،،،ماشي ابراحتج
شهد،،،،طلع جاب الملابس وكتله اريد اسبح
سامر،،،،ماشي خل اطلع
شهد،،،،مشه وكمشت ايده وكتله لا ابقه اخاف يصيرلي شي وانته مو هم كلت ستري وغطاي
سامر،،،،شهد لتجبرين نفسج علئ شي مترديه
شهد،،،،لا اريد وبلشت انزع الدشداشه وبقيت بل اتك ومشيت للدوش قبل لا افتح الدوش اجه لم شعري بل قراصه
سامر،،،،لتنكعين شعرج شينشفه هسه تاخذين برد
شهد،،،،اممم ودخلت جوه الدوش بس جسمي حتئ يبرد اشويه وكملت وجاب المنشفه وكال هذني ملابسج وام وسام راحت تتحضر كالت اله اتروح وياج متخليج وحدج
شهد،،،،،اي اعرفها متخليني وحدي
سامر،،،،راح اطلع انتي غيري وصيحيلي
شهد،،،،اممم وطلع نزعت ملابسي لتنكعن ونشفت جسمي ولبست الداخليات والاتك وصحتله واجه
سامر،،،،تعالي طلعي للغرفه
شهد،،،،وطلعت وكعدت عل جربايه نشفني زين وكال
سامر،،،،هسه مال عض
شهد،،،،واجه اتقرب مني دا البس بل اتراك وعضني من كتفي حيل
شهد،،،،ااااه سامر ليش هيج
سامر،،،،غير اشتهيتهن اعض ههههه
شهد،،،،واني هسه مال عض
سامر،،،،هههه اسف عود من نرجع من المستشفئ انكمل
شهد،،،،ياااا سامر صاير مليق كلش يله ترئ جسمي يئذيني وبدلت وكملت واجتي
ام وسام،،،،يله كملتو اني خلصت وانطيت خبر الهشام علئ روحتنه للمستشفئ
شهد،،،،اي ماشي ولبست صايه وطلعنه وسامر كادني
ونزلنه وصعدت بل صدر بل سياره ومشت السياره للمستشفئ وطبينه للطوارئ ودخلت ويايا ام وسام وشرحت حالتي للدكتوره الخفر ونمت عل سديه وسوتلي سونار وكالت
الدكتوره،،،،،هاي تقلصات عندج هياته الطفل وشي اكيد يصير عندج تقلصات
شهد،،،، وكالت لازمج راحه تامه وسجلتلي علاج تقلصات وكتلها عندي علاج الحمه ماخلصته بعد
وطلعنه
سامر،،،،،هااا اشكالت
شهد،،،،ماكو شي يخوف مجرد تقلصات
سامر،،،،هم الحمد الله يله امشو
شهد،،،،،ورجعنه للبيت وبعدهم نايمين وصعدت فوك
ومددت عل جربايه واجه سامر نام يمي وسحبني حضني وهمس ابصوت وكال
سامر،،،،ماريد يصير شي عليج ماريد اخسرج شهد
شهد،،،،ولا اني كلشي ولاتبعد عليه سامر تعرف احبك
وكلمت احبك احسها قليله المعنئ اني ادمنت حبك
ماريد فد يوم يمر عليه وماشوف عيونك الي امحير لونهن ولايوم يمر عليه وماشم عطرك وانام علئ صدرك
حضنك أماني ومسكني
سامر،،،،،هل كد اتحبيني شهد شنو الشي الخلاج اتحبيني
شهد،،،،انته متعرف شنو انته بل نسبه اليه
سامر،،،،،امممم يله ارتاحي
شهد،،،،بده يمسد علئ راسي وحاضني حيل حسيت الألم خف من جسمي وارتخيت جسمي خدر ونمت وكعدت علئ لمسات علئ شعري واخذ خصله من شعري وباسها وكتله صباحو
سامر،،،،صباح العافيه
شهد،،،،اممم جوعانه
سامر لعد كومي ننزل والريوك عليه
شهد،،،،كمت غسلت وبدلت ونزلنه جوه وصبحنه علئ عمو وعمه وسامر راح جاب كيمر عرب وصمون واني صبيت الشاي وبدينه ناكل وكملنه وطلع سامر وطلعت وراه بل طرمه وكفت يمه وضحك وكال
سامر،،،،،، هاا شوشه تردين شي
شهد،،،،اي اريد
سامر،،،شنو
شهد،،،،اريد اكولك احبك ولتتئخر
سامر،،،،هههه
شهد،،،،اجه سحب راسي وحطه علئ صدره وباس راسي وكال
سامر،،،،،اعرف اتحبيني
شهد،،،،سامر وانته مراح اتحبني
سامر،،،،ليش منو كلج ماأحبج انتي زوجتي وشريكت حياتي وأم ابني ليش ماحبج
شهد،،،،ماحسيت بيه يحبني مثل ما اني احبه مجرد يكول احبج كواجب لان زوجته احسه يتوتر من اكوله اتحبني
سامر،،،،يله شوشه فوتي ارتاحي احاول ما اتئخر
شهد،،،،اممم ماشي وراح واني رجعت للمطبخ وشفت عمه تضحك وكالت
عمه،،،،لازم الغرفه ما امكفيتكم
شهد،،،،عزااا خجلت يعني شافتنه من حضني وباسني
ودنكت راسي
عمه،،،،بعد روحي انتي يمه
شهد،،،،مرت اياام ووضعنه تمام اني وسامر احلئ شي ابحياتي عشره ويه سامر يخاف عليه وعلئ ابني بس اني بديت اضعف كلش وجهي دائمآ ذبلان واصفر لونه الئ فد يوم نايمه الضهر يم سامر وحسيت شي حار نزل عندي وضهري احسه مقسوم بلنص وكشفت الديباج واشوف دم يعني نزيف وخفت من الموقف وكمت ابجي وكعدت سامر حباب اكعد بعد ما اكدر
سامر،،،،،اممم هااا شكو اشبيج هاي شكو ليش هذا الدم
اشصاير
شهد،،،،ما اعرف والله ما اعرف حباب شوف الدم راح اموت والله
سامر،،،،،،اشششش علئ كيفج اخذي نفس مراح اتموتين هسه انروح للمستشفئ بس لتتحركين اهدي اصيح
ام وسام وأجي
شهد،،،عافني وحدي بين خوفي وقلقي واجه هوه
وام وسام،،،،ليش هيج شنو واكعه ليش هذا الدم
شهد،،،،ما اعرف والله راح اموت
سامر،،،،شهد اهدي متموتين اهدي هسه انروح ونشوف الوضع
ام وسام،،،،كومي حبيبتي للحمام غسلي وبدلي حتئ انروح
شهد،،،،كمت بس احس بطني دتتكطع من الألم واصيح اااه ماما راح امووت اااه وطبيت للحمام ونزعت ملابسي وغسلت وجابتلي ملابس واحتياطات طبيه ولبست وطلعتني وسامر نزلني جوه بين ماتتحضر ام وسام وشافتني اخت سامر
اخت سامر،،،،عززا يمه اشبيج ليش هيج وجهج اصفر
سامر،،، حبيبتي صار عدها نزيف وراح انروح للمستشفئ
اخت سامر،،،،لعد اروح وياكم
سامر،،،،ام وسام راح اتروح
اخت سامر،،،،حتئ لو اروح خاف يصير شي الله لايكولها والجهال يم امي
شهد،،،،وراحت لبست عبايه واجتي ابسرعه ونزلت ام وسام وطلعنه للسياره وانطلقنه للمستشفئ وطبيت سامر كايدني وحاضني ويبوس ابراسي ويكول
سامر،،،،حبيبتي عمري صيري سباعيه ولتخافين اني يمج ماكو شي ان شاء الله
شهد،،،،ماركزت علئ معنئ كلامه لان الموقف الجنت بيه لايحسد عليه وكتله سامر احبك حباب لتعوفني اخاف والله
سامر،،،،حياتي مااعوفج والله بس لتخافين يله هسه فوتي وشوفي الوضع وطمنيني عليج
شهد،،،،وباسني من خدي واخذتني اخت سامر وطبيت للطوارئ وشافت وضعي وشرحتلها عن حالتي الكامله من بدايت حملي ولحد الان ونمت عل سديه واخذتلي سونار بس مايطمن شكلها وبقه ادقق وكالت
الدكتوره،،،،،بنتي الطفل مابي نبض وحتئ صارله تقريبآ فتره ميت ابطنج وحتئ يابس داخل رحمج ولازم انسويلج تحاليل لان يسبب تسمم لان صارله فتره ميت
شهد،،،،،انصدمت من كلامها وكتلها لاعيني ابني مابي شي لتحجين هيج عفيه اتئكدي فدوه حبابه الله يخليج
الدكتوره،،،،ماما مابي نبض وصارله فتره ميت امبين عندي
شهد،،،،وكمت وطلعت ماحجيت شي صاحتلي الدكتوره وطلعت وبقت اخت سامر يمها ورحت علئ سامر بس ابجي وكتله حباب سامر تعال حاجيها اتكول ميت ابني مابي نبض هاي امبينه متفتهم الدكتوره اريد اروح الغير دكتوره حباب
سامر،،،،،ماشي شهد هسه انروح ونتئكد بس اهدي
شهد،،،،حضني وكعدني عل سكمليات يمه بس حاط راسي علئ صدره وطلعت
اخت سامر،،،،سامر حبيبي الله يعوضك الطفل ميت مابي نبض صارله فتره وحتئ يابس ابرحمها ولازم انسوي هاي التحاليل لان يسبب تسمم بل جسم ولازم انسويلها عمليت كورتاج لان الطفل لازك ومتتحمل شهد هيج شي
سامر،،،،اصبري علئ كيفج خل افتهم اشويه اشويه
شهد،،،،لا ماسوي شي ابني اريده ما أذبه
سامر،،،،حبيبتي بس اصبري وخلي انفهمج شوفي الله يعوضنه ان شاء الله بس اهم شي صحتج انتي وخلي ناخذ هاي التحاليل ونتئكد
شهد،،،،ما ما ماريد اريد ابني ماما تعالي شوفيهم يردون ياخذون ابني
سامر،،،،شوشه حبيبتي بس افتهميني موزين عليج والله الطفل ميت صارله فتره هيج راح يسببلج تسمم موزين عليج مو حتئ انتي راح نخسرج ابهذا اعنادج
شهد،،،،ختلت ابصدره حباب سامر ماريد
سامر،،،،ياعيني بس افهميني لازم اتدخلين العمليه ابئسرع وقت انتي بس اسمعي كلامي والله متخسرين الله يعوضنه هذا اختبار من ربج يريد يشوف صبرج وأيمانج قوي لوضعيف فهسه المفهوم من كلامي لازم تتقبلين الأمر ماشي
شهد،،،،اي بس هذا ابني اشلون اتريدني اعوفه واذبه شوف سامر اني عندي اقتراح خلي ابطني مااسوي العمليه بلكت يرجع يعيش الله يخليك
سامر،،،،لاشهد لا ميصير دا أكلج ميت صارله فتره
ميعيش بعد بس اني اكولج اذا سويتي العمليه صدكي ربج يعوضنه غيره هذا ما مقسوملنه ياعيني
شهد،،،،اي ماشي بس اني اريده
سامر،،،،ميخالف ياعيني اتقبلي أمر الله
شهد،،،،ماشي بس اني اخاف والله اخاف
سامر،،،،لتخافين واني يمج
شهد،،،،اريد اهلي اريد اخوتي اريد نسرين
سامر،،،،اني خبرتهم قبل اشويه علئ حالتج وكالو جايين بل طريق والله
شهد،،،لعد انتضرهم ما ادخل للعمليه
سامر،،،،ماشي انتضري بس المهم اتسويها وهلي انكمل اجرائات العمليه بلكت الدكتوره اتئجل سراج بين مايوصلون اهلج
شهد،،،،اي ماشي وبقيت ابجي حجزلي سامر غرفه خاصه اليه ورحنه للغرفه وكعدنه بيها وكمت ابجي
واجه سامر كعد يمي عل سرير وكمش ايدي وكتله سامر
سامر،،،،هااااا
شهد،،،،ابصوت مخنوك خايفه سامر
سامر،،،،لتخافين موكتلج اني يمج زين انتي مو اتكولين انته مصدر أماني
شهد،،،،اي
سامر،،،،لعد ليش خايفه انتي قويه
شهد،،،،،تذكر من جنت أكولك الشي الأريده مايصير
تذكر جنت اكولك اتمنه اعيش حياتي واريد اتكون عندي عائله وأطفال وهذا أول طفل راح مات ميريدني
ليش هيج
سامر،،،،لا شهد حرام لتكولين هيج هذا أمر ربج ميصير تعترضين علئ حكمه كولي الحمد الله
شهد،،،،الحمد الله سامر ما اهتميت للموجودين وكتله ابهمس خليني علئ صدرك
سامر،،،تعالي
شهد،،،،ودخلت راسي علئ صدره ما اهتميت للموجودين وجريت نفس عميق وكتله ما اعرف ليش احس هذا أماني ومسكني وانسه كل همي وانسه نفسي يمك سامر لتعوفني وعصر أيدي بيده وحضني اكثر أيده علئ كتفي وباس راسي
سامر،،،،لتسوين هيج ابنفسج ميصير
شهد،،،،امممم وانفتحت الباب ودخلت عمه وعمو وكمت ابجي وكتلها عمه ابني ميت يردوني اذب ابني
عمه،،،،يمه ابنيتي هذا أمر ربج لتعترضين علئ حكمه سوي ليكولونه ألج
شهد،،،اي عمه اي واجه عمو حضني
عمو،،،،ابنيتي ربج الرزاق الكريم جنت اتمنه اشوف حفيدي بس هذا امر ربج بلكت الله كاتبلي عمر حتئ اشوفه
سامر،،،،عمرك طويل حجي ولتشوف احفادك
شهد،،،،باسني عمو وكعدت عل سرير وسامر يمي
وعمو وعمه واخت سامر كعدو عل تخم البلغرفه لان خاصه وبيها تخم وابلازمه وحمام وثلاجه وام وسام
واكفه يمي وسامر كال
سامر،،،،شو اتئخرو عمار اني انطيتهم خبر من اجينه خل اتصل ،،،هله ابو عبد الملك وين صرتو يمعود
عمار،،،،هله والله هاي وصلنه انتو ياطابق
سامر،،،،بل ثاني غرفه12 ماشي هله بيك
اشويه ويوصلون
شهد،،،،وره اشويه ودخلو اهلي اخواني وسلمو وعمار اول واحد اجه حضني وكمت ابجي ويمسح علئ راسي
ويهديني وعصام وحسام وهشام كلهم يطمنون بيه ويشجعوني ويحاولون يغيرون عليه ونسرين ماكدرت رأسآ بجت وحضنتني وطبطبت علئ ضهري وكالت
نسرين،،،،انتي قويه وتتحملين كلشي
شهد،،،وشاورتني وكالت ابضحكه
نسرين،،،،،،جان ما اتحملتي سامر واخبالاته وهسه انتي قويه وتتعدين هاي المرحله وتكدرين اتجيبين اطفال
بس هسه لازم اتذبين الطفل لان اذا ماذبيتي يسببلج تسمم بل رحم وهاي اذا عشتي حتئ يمكن اطفال بعد ميصير عندج ابسبب اعنادج
شهد،،،،لا لا هاهيه اسويها
سامر،،،،،انتي قويه وسباعيه وتتعدين هاي المرحله واتصير سوالف
شهد،،،،اممم وره اشويه اجتي السستر وانطتني صدريه العمليه وكلهم طلعو بقيت اني ونسرين وسامر بل غرفه واني دخلت بل حمام نسرين دخلت ويايا ولبست الصدريه وطلعت وسامر جان كاعد عل سرير وكام وكف ورحت يمه وشعري مفلول امغطي ضهري وكمش أيدي وكعدني عل سرير واتلمس شعري وخلاه وره أذني وكال ابصوت ومعنئ ماعرفت شنو افسره
سامر،،،،شوشه اعرفج انتي قويه وتتحملين كلشي فهسه اريدج تتحملين حتئ ترجعيلي ماريد افتقدج انتي هم
شهد،،،،حسيت بطني تلويني دتتكطع كل هذا الصار وما عرفت شنو يقصد سامر وسحب خصله من شعري وشمها وكال
سامر،،،،ولتحرميني من ريحت شعرج
شهد،،،،وكام سامر واجتي نسرين اجت ضفرت شعري ولبست الجيس مال عمليات لازم بدون قراصه او حتئ ماشه ميصيركتله تعال ادخل ويايا حباب والله خايفه
سامر،،،،مايصير شهد اشلون ادخل وياج
شهد،،،،لعد ماريد
سامر،،،،ماشي خل اشوف اكدر ادخل ويااج
شهد،،،،،اجتي الدكتوره وجابت فايل ووقع عليها سامر وكاللها
سامر،،،،،اكدر ادخل وياها لغرفه العملياات لحد البنج لان اتخاف واتريدني وياها
الدكتوره،،،،،والله مسؤليه هاي بس احاول ادبرها بينه
شهد،،،،وراحت الدكتوره وكتله سامر هاي الصدريه من وره مفتوحه ضهري طالع
سامر،،،،،البسي الصايه فوكاها
شهد،،،،،ماشي ودخلو سلمو عليه واجتي
الدكتوره،،،، يله شهد ماما جاهزه
شهد،،،،،اختنكت ماجاوبتها باوعت السامر
سامر،،،،اي جاهزه بس اكدر ادخل وياها
لحد البنج
الدكتوره،،،،ماشي
شهد،،،،وجابولي العربانه وكعدت بيها والبنكلادش يدفعني سلمت عليهم مخنوكه اتحسين نفسج راح اتموتين لو اتعيشين هاي اول عمليه أليه حسيت بيها
راح اموت اني حتئ تحليل ما اخذت كلت السامر اول وتالي راح اذبه وكالت
الدكتوره،،،،، من انتي بل بنج ناخذلج تحليل لازم نتئكد
ومشينه البنكلادش يدفعني وسامر كامش ايدي ويمشي ويه العربانه بس ادموعي مابطلن ووصلت الصاله العمليات وعصرت أيد سامر حيل ونزلت من العربانه الدكتوره،،،،،تكدرين اتنامين عل سديه حتئ انبنج
شهد،،،،ونمت عل سديه وعصرت أيد سامر وكتله تعرف أني احبك
سامر،،،،اشلون ما اعرف انتي اتحبيني
شهد،،،،خايفه سامر
سامر،،،،،شوشه تعبرينها واتصير سوالف وبعدين اتكولين عليش خفت لان شغله بصيطه
شهد،،،،اذا كعدت اريد اشوف ابني حباب
سامر،،،،،امممم ماشي
شهد،،،،،كمت ابجي احبك وأريد اكولها الك خاف اموت حتئ متضل ابنفسي اني أحس أدمنت حبك ما اعرف ليش ومسح ادمرعي بيده وباس أيدي واجه ابو البنج وحضر الابره بل كانونه الي حطتها الدكتوره وماحسيت بيها بس اشويه نغزه ما اهتميت الها لان اريد اشبع من سامر وبده يدفع الابره بل كانونه وجاب كمامه الأوكسجين وكال استنشقي حتئ تاخذين بنج
وسويت مثل ماكال واشوف سامر عيونه حمر والنونه عاكدها امبين عليه ضايج قبل لا اخذ البنج وكتله أحبك هاي أخر كلمه مني وهمس سامر بين الصاحيه والنايمه اسمع سامر يكول
سامر،،،،،شهد احبج لتركيني احبج والله موتردين تسمعينها مني وهسه صيري قويه حتئ تسمعيها
شهد،،،،حسيت علئ احد يصفك وجهي وينطق اسمي
شهد تسمعيني فتحت عيوني احس شي غواش واغمض بس ما اكدر انطق حرف تحس حلكي يابس بقيت بس افتح واغمض حتئ يفهم اني صحيت واحس
هوسه يمي بس جسمي احسه ميت بس روحي وتفكيري وياي احاول احرك جسمي ماكو ثكيل بين الحلم احس روحي وبعدين هم احس هوسه يمي وسوالف وميزت هذولي اهلي وارتاحيت يعني الحمد الله عايشه اني عبالي الملائكه جانت تحجي ويايا هههههه كلت متت اني وحسيت بديت استرجع نفسي وجسمي راح الخدر منه وهمه ديسولفون مامنتبهين عليه بس سامر يمي كاعد عل سديه قريب كلش ورفعت ايدي حطيتها علئ أيده بس خطيه فز فزه وابسرعا اندار عليه وبدون وعي كالها الكلمه الي هيه واعدني بيها بس بل غرفه يكولها لان كدام أهله يكول عيب
سامر،،،،،شوشه حبيبتي كعدتي
شهد،،،،،ما اعرف اشلون افسر لهفته اليه من كعدت وكام وكف يمي واتحمدلي بل سلامه واجمي عمه وعمو سلمو عليه واخواني والكل بس ما كدرت اجاوبهم بس اباوع عليهم لان الساني احسه خدران
سامر،،،،راح اصيح الدكتوره لان كالت بس تصحه تنطوني خبر
شهد،،،راح واجه ويا
الدكتوره،،،،،الحمد الله علئ سلامتج حبيبتي والله عمليتج جانت اشويه بيها خطوره لان الطفل ميت من مده ويابس لازك والحمد الله كدرنه انصيطر عل وضع والحمد الله اهم شي العلاجات المغذياات والمسكنات
كمليهن وان شاء الله باجر تطلعين الصبح
شهد،،،،حسيت ابكسره قويه وبل كوه طلعت مني الكلمه
اريد ابني
الدكتوره،،،،،هوه اصغير كلش مايبين شي منه بس ننتضر احد يستلمه
سامر،،،،،اني استلمه
شهد،،،،راحت الدكتوره وكمت ابجي صعبه كلش اول طفل اول فرحتي مات صح هوه ماشفت منه شي بس حسيتها صعبه لان قطعه مني
وصار اليل كلش وراحو اخواني ابيت اعيالي واعيالي كلهم راحو وبقت نسرين وسامر يمي واليل كله ابجي
سامر،،،،شهد ميصير هيج كافي بجي
شهد،،،،،سامر اريد مسكن لان جسمي يئذيني وجاب الأبره والدكتوره ضربتها بل عضله كمت ماامنع احد اريد بس يسكن الألم وسكن عندي ونسرين نامت عل تخم هيه وكاعده وسامر جاب السكملي واجه يمي وكمش ايدي ونام واني هم نمت بس اكعد اشويه وارجع انام وكعدت علئ صوت بره والضوه وسامر هم كاعد لان ماكو بل غرفه وره اشويه دخل واجه يمي
سامر،،،شتحسين هسه
شهد،،،مابيه شي
سامر،،،،هسه تجي الدكتوره وتكتبلنه خروج
شهد،،،،اممم وسكتنه ونسرين كاعده وسامر جاب ريوك
واجتي الدكتوره وكتبتلي علئ خروج وكمت بدلت علئ كيفي نسرين ساعدتني وطلعت بل عربانه مال بنكلادش وصلنه يم السياره وسامر انطاه 25ألف وراح وصعدت بل صدر ومشت السياره وصلنه البيت وطبينه بل استقبال وكعدنه يمهم اشويه وصعدت فوك الغرفتي استرجعت ذاكرتي ودخلت سامر كايدني من أيدي
ومددت عل جربايه الي امغيرين الفرشه واتغطيت
وأحاول انام ونمت من التعب وصحيت علئ سامر يكول جبته بس هسه اروح للمقبره وأدفنه انتضر محمد ومصطفئ يجون حتئ انروح وكتله سامر حباب خل اشوفه
سامر،، شهد شتشوفين منه بس عباره عن لحم عبالك ميصير اتشوفيه موزين والله
شهد،،،،عصبت وكتله لازم اشوفه شنو تحرمني من شوفت ابني
سامر،،،لا شهد ما احرمج
شهد،،،،صدك سامر اذا متخليني اشوفه والله اروح الأهلي والله واجتي نسرين وكالت شهوده هوه هم اني كلت تجين يمنه وهم اتغيرين جو
سامر،،،،ليش شنو قابل اهنا احنه منداريها
نسرين،،،،سامر تعال اشويه بره
شهد،،،،وطلعو
نسرين،،،،اعرف انتو متقصرون بس هذا الشي علمود شهد حتئ تنسئ اشويه واتغير جو
سامر،،،،ماشي
شهد،،،،دخلو اثنينهم وسامر كال طالع هسه اجي وراح
وعرفته يدفن ابني وكلت النسرين حضري ملابسي وحضرت كم قطعه وكتلها يله انروح
نسرين،،،،خل يجي سامر
شهد،،،،شي أكيد يقبل اروح مو اخذتي الموافقه منه
نسرين،،،اي
شهد،،،،لعد يله ونزلنه امبدله واستغربو من تصرفي بس كلت اريد اروح الأهلي ومحد عارض ولا احد حجه شي
وطلعنه ويمشي علئ كيف بل سياره بس احساسي ما اعرف شنو وما اعرف شنو افكر وماحسيت لان وصلنه وسلمن عليه البنات زوجات اخواني وصعدت فوك ومشه اليوم خلص وسامر يتصل وما اجاوبه ما اعرف ليش هيج اسوي وتحجي عليه
نسرين،،،،سامر شعليه ليش متحجين وياا
شهد،،،،مااعرف شنو اريده بس اعرف اريد اطلع حركت كلبي وشي خانكني وكتلها صعب عليج من تخسرين شي غالي عليج وقطعه من روحج نسرين اريد ابني فدوه اريده ليش مات ليش يعني مايحبني وعافني ليش مو دا اخذ علاج والله ماتركت ولا حبايه والله حتئ من اصخن احس اعضامي متكسرات بس اكوم وأحارب الخاطر ابني حتئ مايتضرر اطب اسبح وابرد جسمي علموده اريده اريد اشوفه ليش يحرموني من شوفت ابني ليش الله يخليج كوليلهم اريد اشوفه
نسرين،،،،حبيبتي مايصير اتشوفي لان بعده كلش اصغير مايبين منه شي يادوب 4 اشهر
شهد،،،،هذا ابني قطعه مني حتئ لو عمره 4 اشهر
بس احسه كامل واحس ابنبضات گلبه ابداخل احشائي والله احس عليه الله يخليج كولي السامر ماخلاني اشوف ابني اخذه ودفنه اعرف بيه هوه دفنه بدون مايكول حتئ مايخليني اشوفه ومشت ايام وهذا حالي بس ابغرفتي كاعده ابد ماطلعت
شهد،،،كاعده ابغرفتي ابيت أهلي ابجي علئ ابني صارله شهر من مات مافد يوم نسيته اتئذيت كلش عليه اتمنيته اشوفه بيدي واتمنيت الاعبه وأناغيله وانفتحت الباب ودخل سامر
شهد،،،،كمت ابجي ليش اجيت ليش ومنوكلك اصلن اريد اشوفك
سامر،،،،،شهد اعيوني موكافي بجي ترئ مايصير هيج هذا أمر الله مانكدر نعترض ربج هوه الرزاق الكريم
كم دوب متحجين ويايا وكم دووب بس تبجين
شهد،،،،ماريدك لان انته حرمتني من ابني كله ابسببك انته اي انته من ازوجتك بس ضيم وقهر شفت منك حتئ ابحمل ابني مافرحت بيه من قهرك حتئ ماكملت فرحتي بيه بس قهر منك واحرك ابنفسي علمودك وتالي اشحصلت منك ابسببك فقدت ابني
سامر،،،،اعرف بيج مو ابوعيج وداتحجين هيج بس هم عاذرج هذا ابنج بس اتصور نسيتي هذا هم ابني اني هم فقدته بس ماسويت مثلج ما عارضت علئ حكم ربج الحمد الله الله يعوضنه
شهد،،،،امممم ماريدك روح هيج هنت عليك وتحرمني من شوفت ابني ماكلت اشلون احرمها مافكرت بيه
سامر،،،،والله موقصدي احرمج بس مايصير والله مايصير اتشوفين ابنج ميت وهوه عباره عن قطعت دم بعده ماكملان بعده اصغير كلش وميصير اتشوفي لان امي كالت ميصير اتشوفه لان يضل ابنفسج وانتي تتعبين
شهد،،،،هذا عذر لو شنو
سامر،،،،شهد كافي ميصير هيج تعبتي وتعبتيني وياج
صارلج شهر يم اهلج كافي رجعي ويايا وكملي حياتج وربج يرزقنه
شهد،،،،سامر
سامر،،،،عيونه
شهد،،،،ماريدك أسفه اريد منك بس أتعوفني ابحالي

ولتحرموني من تعليقاتكم الحلوه واشكركم علئ

تعبيركم بل كلام والحماس الضاهر عدكم

وطبعآ تعليقاتكم كلش فرحتني وبيها ضحكتني

والله علئ حماسكم وأريدكم هسه صوتو وعلقو

حتئ تصعد الروايه وان شاء الله بس اختم

هاي الروايه ابدي انزللكم روايه جديده

واريد هذا حماسكم يبقه ويايا

وشنو رئيكم بل بارت وشنو رئيكم ابوضع شهد

شنو اتحبون اتكولون ألها

شنو رئيكم ابتصرف سامر

من ماخله شهد اتشوف ابنها

وهذا بارت للمتحمسين للروايه وتعليقاتهم

شجعتني اكتب اليوم يا احلي متابعين

لتنسون تابعوني وصوتو وعلقو حتئ تصعد الروايه

للحكايه بقيه

لتحكمون ع الروايه من بدايتها

لتنسون التصويت⭐ والتعليقات🌹