جار الضبع

بارت (24)

#جار_الضبع

بارت (24)بقلم يـاسـة

لم يبق عندي ما اقولة
تعب الكلام من الكلام 

لا يتعضن عيوني واعضهن
طفن فگدن حواس الهن واعضهن
اصابع ما بگن عندي واعضهن
وحركتك بلشت بعكوس أديه

             🌿🍃🌿🍃🌿🍃🌿

حامل  إي حامل من منو من بدان هه اكيد هذا الحمل  هو اقوى عقاب ممكن أمر بيه بعمري كله
يعني هسه أني اجيبه للدنيا ويصير مثل الياس بالسنه مره يبوسه يصير مثل الياس ليل ونهار خايف من صوت العرك بين أمه وأبو يعني أجيبه للدنيا وابو يتاجر بالممنوعات مستحيل إلي جاي اسمعه يارب دخيلك انظلمت هواي مابيه بعد دخيلك يا الاهي ساعدني

رجعت الدكتورة المكانها واني بقيت على نومتي ما مستوعبه الموضوع ولا اريد استوعبه من الأساس
زين مُلهم شلون راح يتقبل الوضع ما كافي كل شويه هابطته هبطه ماكافي العذاب إلي جاي يعيشه بسببي اجه هسه أكمل عليه بهذا الخبر

نور اجت عليه سحبتني من ايدي وباستني فرحانه
سندتني حتى اگعد كتبت الدكتورة العلاج وبقت توصي بيه بس ما انتبهت على إي  كلمه من كلامها ولا ركزت بيه عقلي ما گام يستقبل إي كلام
طلعنه من الدكتورة بدان جان واگف بصف سيارته منتجي عليها ويتصفح بالتليفون نور ضحكت أول ما شافته وسرعت بخطواتها حتى تبشره

نور--جيب البشارة

بدان--شكو

--حرمتك حامل

--لا بربج

--والله

-- لا يا الله صدك جُمان

حچه هيج وحضني حيل بنص الشارع الفرحة الهو بيها گطعت گلبي اللي يشوف فرحته يگول هذا اول طفل اله من بعد أنتظار سنين لزمني من أيدي وصعدني بالسيارة وركض يجيب العلاج دقايق ورجع جايب علاگه العلاج والدنيا ما سايعه فرحته  طول الطريق مشغل أغاني ومعلي المسجل كل علوه ويغني وياه فرحان

سندت راسي على الجام وغمضت عيوني ما اگدر ابچيروگفت الغصه بحنجرتي إي جُمان راح تصيرن أم ومن منو من بدان اللي علمج على الادمان إلي ما رحم ضعفج بدان الايده والضربه بدان اللي اغتصبج وهددج بـ أختج حتى توافقين عليه
لا يغرج منظره وهو فرحان فتحي عيونج زين واذكري اذا مره وحده منعتيه منج شلون يتخبل عليج وشلون يتفنن بعذابج ياربي گلبي راح يوگف ياربي دخيلك عيني على ما بلاني

وصلنه للبيت اول ما دخلنه جان مُلهم گاعد بالصاله ومقابيلة صينيه زغيرة بيها عصير وفاكهة
وباجي وعمو وبتول منجمعين كلهم سوه
حچت باجي بس شافتنه

راجحة--بشرو شنهو گالت الكم الطبيبة

بدان --الحلوة حامل

هو گال هيج واني متت بمكاني الله يساعد گلبك مُلهم شلون دگاته هسه رفعت عيني عليه منزل راسه ما اگدرت اشوف ملامحه شلونها و باجي گامت باستني وگعدتني يمها عمو تبارك النه وبتول راحت الغرفته سريع وسدت الباب بكل قوته
عيوني عليه وگلبي يتگطع على حاله اباوعله
ايده على رگبته ويمسد عليها بحركات سريعة  اختنك ثواني وگام ساند نفسه على عكازته رجع للغرفه بس دخل صار صوت كسر قوي بداخل الغرفه كلهم ركضو عليه يشوفون شنو هذا اللي نكسر و أني بقيت بمكاني ما عندي قوة بعد انتهيت خلص اسمعهم يسألونه شكو وشلون أنكسر الميز بالمقابل هو ساكت ما يرد بدان من شافه ميرد اجه عليه سريع لزمني من أيدي وگومني قوي