Unicode
ဒေးက ဆေးရုံမှာသုံးရက်လောက်နေပြီးမှ ဆင်းခွင့်ရခဲ့သည် ။
ထိုသုံးရက်လုံး လွင်ပြင်က ဒိုင်ခံလူနာစောင့်အဖြစ်ရှိနေပေးပြီး ဒေးမိဘတွေက မနက်တစ်ခေါက် ညနေတစ်ခေါက်လာကြည့်ပေးကြသည် ။
လွင်ပြင်တို့ပဲခူးပြန်မည့်အစီအစဉ်လဲ ဒေးအခုလိုဖြစ်သွားသည်ကြောင့် အလိုလိုဖျက်လိုက်ရတော့သည် ။
"မင်း မိဘတွေကို လွမ်းနေတာမလား?"
ဒေးက အားနာဟန်နဲ့ ဆိုလာတော့ လွင်ပြင့်မှာ သူစိတ်သက်သာရာရစေဖို့လှည့်ပတ်ပြောရသေး၏ ။
မဟုတ်ရင်တောင် ဒီတစ်လလုံး ဘယ်မှမသွားဘဲအိမ်မှာပဲနားတော့မည်ဆိုသည့်ဒေးကို လွင်ပြင်ဒီတိုင်းမထားရက်နိုင်ခဲ့ပါ ။
တစ်ယောက်တည်းရှိသည်ဆိုပြီး ပေပေတေတေနေနေရင် ပိုဆိုးဦးမည် ။
"မင်းသာ အေးဆေးနားပြီး အားပြည့်အောင်လုပ် ။ Final ပြီးရင် အကြာကြီးကျောင်းပိတ်ထားဦးမှာ ။ အဲ့တော့မှ တူတူပြန်ကြတာပေါ့"
လွင်ပြင့်မိဘတွေကိုယ်တိုင်က ဒေး ဆေးရုံတက်ရမှန်းသိတော့ ဒီတစ်လပဲခူးကိုပြန်မလာခိုင်းတော့ချေ ။ "နေမကောင်းတဲ့သူငယ်ချင်းဘေးမှာ အဖော်နေပေးလိုက်ဦး" ဟုပြောလာခါမှ ဒေးက စိတ်သက်သာရာရသွားဟန် ။
"လွင်ပြင်"
"အင်း"
"ငါတို့ တစ်လပိတ်တာ ကားမောင်းသင်ထားကြမလား?"
ကုတင်ပေါ်မှာကျောမှီရင်းပျင်းလာပုံရတဲ့ဒေးက သူ့ဘာသာသူအစီအစဉ်တွေဆွဲနေခဲ့သည် ။
ဒီသုံးရက်အတွင်း နေ့ရောညရောဒေးနဲ့အတူရှိနေပေးရတာကြောင့် နေမကောင်းရင်စကားပိုပြောတတ်သည့် ဒေးအမူအကျင့်အချို့ကို လွင်ပြင်အကျင့်ရနေပြီ ။
"ငါ့မွေးနေ့ရောက်တော့မှာဆိုတော့ မွေးနေ့လက်ဆောင်အနေနဲ့ကားတစ်စီးတောင်းလိုက်မယ် ။ မဟုတ်ရင်တောင် ငါ့ကိုသီးသန့်ကားဝယ်ပေးမယ်လုပ်နေကြတာဆိုတော့ တစ်လက်စတည်းတောင်းလိုက်တော့မယ်"
"ဘယ်သူသင်ပေးမှာလဲ?"
"ကမာရွတ်မှာနေတဲ့ငါ့ဦးလေးတစ်ယောက်ရှိတယ် ။ သူ့ကိုသင်ခိုင်းလို့ရတယ်"
YOU ARE READING
ငါ့ကိုမချစ်ဘူး ..
General Fictionအိပ်မက်ရှည်ကြီးတစ်ခုမက်တယ် ။ ကျောခိုင်းထားတဲ့နောက်ကျောပြင်တစ်ခုကို ငါက တစ်ဖက်သတ် ဖက်တွယ်ဖို့ကြိုးစားနေခဲ့တာတဲ့ ။ ဟင့်အင်း.. မင်းငါ့ကိုမချစ်ဘူး ။ မကိုဋ်ဒေးမောင် x လွင်ပြင်ကကြိုး
