جار الضبع

بارت (30)

#جار_الضبع

بارت (30) بقلم يـاسـة

حسافه اطيح دمعه الشخص ما يسوى
التگلب عشرته وتلگاها مو حلوة
حسافة اضيع اسنينك بحب أنسان
لا خلاله قيمه ولا عرف يهوى

            🌿🍃🌿🍃🌿🍃

خلص كُلشي الضرب الاهانه الاعتداء الجوع التجاوزتات داعش كلهم خلصت منهم ما اصدگ ياربي دخيل أسمك شگد كريم هذا هو يعني بعد ماكو بدان ماكو خوف منه راح أنام مثل البشر
و اگعد مثل البشر ياربي دخيلك ما اصدگ
بس خاف هم  يجي وراي و ياخذني .. أمي
و إخواني حاظنيني ويبجون رادو يدخلوني
جوه وگفت ما دخلت باوعت الـمُلهم كُلش تعبان شلون يرجع ومنو يگول ما يوگع بيدهم اكيد هسه بدان عرف اني انهزمت ومُلهم هو اللي مهزمني

مُلهم--انه اترخص

جُمان--وين تروح يموتونك

--اهلي ناطريني والموت بيد الله مو بيدهم

--ابقى ارتاح شويه عاد 

--ما اگدر التأخير مو بصالحي عينج على نفسج
وأبريني الذمه ما اعرف شنهو راح يصير وياي بطريق الرجعه

--انتَ إلي تبريني الذمه أذيتك بــ أقرب الناس الك

--ما زعلت منج بيوم من الأيام شايفتلج أب يزعل من بنتو

--تعبتك وياي

--تمونين الـمهم خلصتي والباقي كلو سهل

-- زين بس اكل شي مماكل صار يومين ونص
لا تروح تتخربط

--ما اشتهي يلا روحي جوه ارتاحي

حچه هيج وعيونه تحولت حمر وشكله تغير حسيته اختنگ ما يريد يعوفني دخلتني أجوان جوه وأمي بقت وگفه يمه دخلت للبيت  واني ميته من الجي وراه تكول اليوم ودعت أبوي شكد أذيته وشكد تعب وتمرض بسببي بس ما تركني ولا أذني واول ما احتاجيته ما تردد للحظه وحده بـمساعدتي ودعته وأني ما أعرف راح يوصل بسلامه لو لا زين هم راح اشوفه لو هاي اخر مره نتشاوف ؟

اباوع على البيت حيل زغير مو مثل بيوتنا إللي
بـ الانبار هذه الطرمه مالته مترين ما ادري ثلاث مترات والغرف زغيرة تصميمهم غرفه بداخل غرفه والمطبخ بنهايه البيت وبظهره ترك
وفارغ مابيه اثاث بس بلازمه معلكه وثلاجه
وطباغ منضدي أبيض وسنك و ملابسهم باقيات
بــ الجنط دخلت أمي ورانا بس گالت شلونج انهاريت من الـبچي اخذتني بحظنها وبقت تبچي وياي ساعه كامله ابچي لحد ما تعبت واجتني الـنوبه

بقيت يومين كاملات بس ابچي ما اعرف اذا وصل لو بعده تعداهم بسلامه لو قتلو شلون راح يتواجه ويا بدان وأني اعرف شنو بدان وشنو سوالفه
الـبيت خنگه وإحسه مابيه هواء اصعد بالسطح ارفع راسي للسماء وابقى اناجي ربي بدموعي
أمي وضعها المادي كُلش تعبان ما جانت محسبه تگعد بغداد اجت بس تسوي الـجوازات والـجناسي وصارت الأحداث انجبرت تبقي اسبوع بــ الـفندق ومن شافت الـوضع صعب عليها مخابره مُلهم
ومُلهم متصل بواحد من أصدقائه مدبريلها هذا البيت بهاي الـمنطقه الـشعبية إللي عرفته اول شهرين ابو الـبيت مماخذ منهم أيجار الـخاطر صديق مُلهم لان يعرفه وبيوم الـجابني من باقي يم أمي بــ الـباب منطيها فلوس حتى تاخذني للدكتور
واليوم من الـصبح أمي راحت للسوك يصير قريب علينه اشترتلي كم قطعه ملابس للبيت وملابس طلعه حتى اروح بيهم للدكتور