جار الضبع

بارت (35)

#جار_الضبع

بارت (35) بقلم يـاسـة

........................

جُمان-- حرام عليكم أني ما أذيتكم ليش هيج تأذوني يعني انتَ جاي مناك لهنا وفاضحني وخربت حياتي وشوهت سمعتي وتالي تگول ما اگدر
اتخطئ اخوي اذا ما گدرت تتخطى شعدك جايني شعندك رجعت  دخلت الحياتي

مُلهم -- جان كل توقعي من أشوفج انسى بس
ما اگدريت اصلاً تعبت اكثر

--اطلع من حياتي گوم من وجهي مُلهم گوم الله ياخذك مثل ما اخذ اخوك

--والقران احبج وما انام ليلي تعبت من فراكج بس

--بس شنو هاا بس شنو لك ما شايفه هيج واحد أناني بعمري كله يعني لا انطيك ولا اخلي رحمه الله تنزل عليك

--ما اتحمل اشوفج تصيرين الغيري من جديد

--وناوي تخليني مثل بيت الوقف لا تاخذني ولا احد غيرك ياخذني ههه بس فهمني الياا مرحله وصلت بأنانيتك

--انطيني مجال ارجع اتواصل وياج ونتجاوز هاي المشكلة سوه

--ما اريد اشوف وجهك مُلهم اطلع بررره

ما رد عليه گام طلع من الغرفه ورجعت امي دخلت يمي ما فتحت اي موضوع وياي لحد ما خلص المغذي وكتب النه الدكتور خروج صعدت الغرفتي گبل بس خليت راسي علي المخده نمت من التعب والقهر مرت كم يوم ما شفت مُلهم بعد ولا حجه وياي بعدين سمعت أمي وأجوان يحجون بيناتهم راجع للعراق وجعني گلبي من سمعت بيه راجع وانقهرت على نفسي

من بعد كل شي سواه والبهذله البهذلنياها رجع للعراق يعني اجه بس هجم حياتي وراح لعد وين الحب وين التضحية واني الغبيه صار سنين ابجي عليه تالي شنو حصلت من البجي والطم
كلشي ما حصلت بس الدمار والخذلان صحتي راحت عمري راح مستقبلي مجهول شنو أشوف بعد

وانت يا بدان ما اعرف ادعيلك ادعي عليك بس اللي اعرف هسه انتَ يم اعدل العادلين واخذت جزاتك ما اگدر احچي شي اكثر ولا اگدر اطالب بعداله اكثر من العداله الاهيه متأكدة ربي راح ياخذ حقي منك بس ميخالف راح اسامحك  الخاطر الگعده الگعدتها وياك صح ماكو گعده بيها خير ولا شفت راحه وياك بس ما اگدر گلبي ما ينطيني ما ابريك الذمه وصيت عليه ابريك روح مبري الذمه انتَ والديك خسرتني هواي بس اكو رب هو اليعوض خسارتي هو اليجبر كسري

وهسه يله كافي يا جُمان ذبي حملج على الي خلقج وطلعيهم من حياتج محد يستاهلج ولا احد يحبج حتى ساري من الاول جنت صريحه وياه ودگلي صدره تالي باول مشكلة طفر وهو من الاصل جان طافر الخاطر امه اني وياه من الاول  جمعتنا غلط وامه ما ترديني لو شنو يصير مراح نكمل  صح ما جنت رايده أذيتك بس بعد ما بيدي شي حظك و حظي الخلانه بهذا الموقف

من اليوم انعل ابوهم كلهم وطز بيهم وبالدنيا
صار لازم اشمر شكو شي اذاني وتعبني و كل الماضي وراه ظهري أني بنت اليوم ما يهمني احد ولا راح توگف حياتي علي احد الراح الله وياه كافي العشته قبل