جار الضبع

السابع (37)

جار الضبع
(37 الأخير الجزء الأول)
بقلم يــاسـة

............

جُمان -- وصلت الأهلي لا أحچي شي ولا وأگدر أشوف أحد وهو نفس الشيء حيل تعبان وبس يباوع إلي قبل لا أدخل البيت أهلي حاول يحچي وياي سديت إذناتي رافضة أسمع أله

مُلهم -- جُمان الله يخليج بس سمعيني والله أني غلطان وندمان قسماً بالله ما عاد أعيدها جُمان لا تعملين بيها هيج والله أموت بعدج أعرف ماكو مُبرر العملتي بس والله جنت سكران راح أتركج ترتاحين هينا فترة وبعدها قرري لا تموتيني وراج

ما رديت عليه ولا باوعت أله نزلت للبيت أستقبلتني أمي سلمت عليها سلام عادي وصعدت الغرفتي
حتى قهري ما أگدر أحچي الج حتى و وجعي ما أريد أشاركج بيه كُلشي صار بيه أنتِ سببه

صعدت للغرفه وهو بقى جوى ما أعرف شنو حجى وياهم ولا شلون برر موقفة وحتى ما أعرف شوكت راح أمي وأجوان شگد حاولن وياي بس حتى أحچي شنو صاير ويانا وليش هذا حالي وليش أجيت ما رديت عليهن

يوم بعد يوم وأني ساكته ومنظر الآثار إللي بي ما تروح من بالي أحس طاقتي خلصت وصحتي بدأت تضيع مني طول هاي الأيام هو يتوسل ويراسل ولحد الآن ما راجع للعراق باقي بالفندق گاعد
بالكي أقتنع وأرجع أله كُل ظنه سهلة الشغلة وراح أتقبلها بـ هاي السهولة

مر فوگ الأسبوعين وهو ما مال ولا تاركني إذا ما يخابر يجي إذا ما أجى يدز رسايل يتوسل ويعتذر
آخر شيء خلصت فترة الأقامة مالته ورجع
هنا دخلت بحاله نفسية صعبة أنعزلت أنعزال تام
عن العالم نزلت برنامج أسمه واتباد وبديت أتابع بي قصص

گمت أنهزم من الحقيقة مالتي الهذا العالم ليل نهار عيوني بالتليفون ومندمجة ويا قصص الناس
من گمت أشوف المصايب الموجودة عند الناس
أحمد ربي على مصايبي صدُگ إللي يشوف مصيبه الناس تهون عليه مصيبه

مر الشهر والشهرين وأني بعدني منقرفة منه وكارهته ما أگدر أتقبله كُل ما أذكر معاملته إللي ودخلتي عليه وهو بـ هذا المنظر أحقد عليه أكثر
هنا بدأت سنة دراسية جديدة وبلشت أداوم
الحمد للَّه عاد من طلع على حقيقته قبل العام الداسي زين ما راح عليه وخسرت سنة جديدة من عمري عاد همّ متعودين أخسر سنوات دراسية
بـ سببهم

بأشرت بالدوام وبدأت تتحسن حالتي لأن رجعت
التقي بـ زميلات الدراسة ونص نهاري يخلص بالدوام رجع مُلهم أجى مرة ثانية وحاول وياي لكن ما حصل نتيجة وبيوم طلعت للدوام الصبح أول ما فتحت الباب أريد أطلع السيارة لگيت مُلهم مكتف واگف مقابيل الباب درت وجهي منه ورجعت أريد أدخل أجى وراي لزم إيدي

مُلهم -- أوگفي شوية

جُمان -- شكو من الصباحيات وخر إيدك

-- كافي والله ندمت وأكلت طن هواء غلطت وأعترف بـ غلطي ما يغتفر بس والله ما أگدر بدونج