سميحة:[زيرات على يدها ناطقة بنبرة جادة]قلبي ما قاصحش أ بنتي...و لكن تعاملي معاك قبل سبابو هو الفعلة لي درتي...ما فكرتي فينا و ما فكرتي فوالديك ...هزيتي راسك و مشيتي...
ساريتا:[كاتهضر و تعبر بيديها]كانقسم ليك أ خالتي سميحة...كانقسم ليك حتى ندمت...ندمت و تمنيت ما نرتاكبش داك الغلط...كان عليا نتشجع و نقول كولشي لدراغون و ما نهربش...
سميحة:اوا على السلامة ملي عرفتي غلطك أ بنتي...و ندمتي عليه...[قربات ليها شوية منبهاها بشوفاتها]نتي غلطتي و لكن كانصحك ما تعاوديهاش...باش ما نوريكش انا وجهي لاخور و نحرر عليك العيشة....
ساريتا مسحات دموعها...و سكتات شحال كاتشوف فيها و ناضت من بلاصتها...طالعة لبيتها خلات سميحة حاطا صبعها على خدها كاتفكر فردة فعلها ملي قالت كلامها...
حتى ناضت دافعة الكرسي معصبة ملي ستاوعبات اشنو طاري...بحالا فهمات معنى صمتها و شوفاتها...مشات طلعات كاتجري لعندها و الغدايد شدوها...
حلات الباب على وسعو كاتقلب عليها بعينيها و تعيط...
سميحة:ياك أ بنت فضيلة...ياك الكلبة ناوية على الشر...هااا؟...[كاتقلب هنا و لهيه حتى سمعات صوت جاي من الحمام]اليوم نوريك غا صبري...
حلات الباب و سكتات منزلة حواجبها باستغراب و قلق...قربات لجيهتها و هي ݣالسة على الأرض كاتلهث...و حاطا يد فوق بطنها مغمضة عينيها...تحنات لمستواها كاتفحصها بنظراتها و شك كبير فداخلها من حالتها...
سميحة:نتي بخير؟!...
ساريتا:[كتافات تحرك راسها بصمت]
سميحة:هاد الحالة ديالك هاد الأيام معاجبانيش لا انا لا ولدي دراغون...[سكتات للحظة]نتي حاملة؟!...[شداتها من كتافها مزيرة عليها]هضري بصراحة و وياك تكذبي فوجهي يا هاد البنت...
ساريتا بلعات ريقها...حارت فداخلها تقول ولا ما تقولش ليها...خافت غير تقولها لدراغون و تصدق واحلا...
شافتها سميحة ساكتة و بحالا بدات تفهم و تأكد من كلامها...حطات صبعانها على فمها مصدومة و شويا بشويا بدات الضحكة ترسم على وجهها...
سميحة:[مزال ما متيقا]هي دبا أنا غانولي جدة للمرة الرابعة؟!...[شافت فيها ساريتا باستسلام و حركات راسها بالايجاب...]الحمد لله...الحمد لله لي ربي طول ليا فالعمر حتى وصل هاد النهار لي نسمع فيه هاد الخبار...[شافت فيها ناطقة بتساؤل]بلاتي بلاتي كيفاش عرفتي نتي بهاد الحمل؟!..
ساريتا:[وقفات بصعوبة ناطقة بنبرة جادة]أنا ما متأكداش...و لكن هادشي ما بغيتوش يوصل دراغون...
سميحة:[ميقات فيها]هاك هاك على ما توصلوش...مال داك لي فكرشك ولا تما بالبلوتوث ولا؟...
ساريتا:[دورات عينيها كاترمشهم دغيا]ماشي الوقت المناسب دبا...و زايدون مازال ما تأكدت يقدرو يكون غا اعراض لاغيݣل...
سميحة:ما قلتي عيب...حتى دبا غا دوزي تلبسي عليك و نمشيو عند الطبيبة تشوفك و نتأكدو جميع...
ساريتا:[خرجات عينيها]ك..كيفاش؟!...و أرغد؟!...[نطقات بقلة حيلة]أكيد ما غايخلينيش نعتبها...
سميحة:يا ودي ياودي تي فين مشاو هاد التحريميات لي معروفة بيهم فالداور عندكم...هاا؟...ولا صافي تقاداو ليك...
ساريتا:[قلبات عينيها بملل]دبا حتى إلى درت عقلي مشكيلة!!!...[علات حاجب كاتشوف فيها]أجي و حتى نتي بخبيزتك أ خالتي سميحة...قنعيه نتي بطريقتك نشوفو حنة يديك...
سميحة:تسحابي غا أجي و قنعيه..ما علينا سيري نتي لبسي عليك ...أنا غانتكلف...
حركات ساريتا راسها بواخا و دازت من حداها كادعي من قلبها يكون غلط فالموضوع...و الحمل مكاينش...
BẠN ĐANG ĐỌC
زواج متقف
Lãng mạnقصة أحداثها كادور فحي شعبي معروف فمدينة الدار بيضاء...غانعيشو بعض من احداثها فأخطر حي من أحياء الدار البيضاء ...و لهو حي مولاي رشيد...حاكمو بزناز فالخمسينيات...مجرم و تاجر فالمخدرات رتاكب جرائم كثيرة و دخل الحبس مرات عديدة ...حتى ولا معروف بين الحبا...