زواج متقف

bart 198

الفـصـــل الثـاني:ما خــلف الأقــعنة🩸🫦
               ___________________
                       𝑩𝒚  𝑺𝒂 𝒓𝒊 𝒕𝒂

      ⚫𝑩 𝒂 𝒓 𝒕  198

                دار دراغــــــــــــــون

من الكوزينة كانت ريحة الغدا تعطعط...فداخلها واقفة حسناء طيب فالمسمن...و بقربها طبلة دايرين عليها سميحة و ساريتا كايقطعو فالمسمن...و غارقين فالجماعة و صوت ضحكاتهم تسمع منين و منين...

حسناء:سمعتي جدة داكشي لي وقع لديك العروسة المزرقة لي زرقاتها ساريتا فالحمام داك النهار...

سميحة:اييه أ بنيتي ..قاليك أ لالة جا واحد خطبها و فنفس النهار فسخ الخطوبة...حينت حݣا ما حݣا ولات زرقة ليلة عرسها و سحبها جنية...

ساريتا:[بحلقات فيها]أ لا ما تقوليهاش حتى بالضحك...

سميحة:غا تيقي تيقي...[كمشات عينيها فيها]شتي فعايلك أ بنيتي فين كايوصلو لواحد...ما رتاحيتي حتى طلقتي سمك يا اللفيفيعة...

ساريتا:[كاتقطع و تاكل فالمسمن]لواه أ عݣوزتي...أنا ماشي خايبة ندير فبنادم هاكا...غا العصبية عماتني و خلاتني نغلط فالخلطة...

حسناء:[بطنز كاضحك]راه بقات أ مرات بابا فالنية...و نيتك ما صفيتيهاش فديك الوقيتة و نتي جامعة العيالات حب و تبن...

ساريتا:[هززات بكتافها]شخصيتي هاكة دايرة ا بنتي...ما غانبدلهاش على ود البنادم...

سميحة:[غمزات حسناء]غا شوفي و كان واش بدلها ليك ولدي أرغد ولا باقة هي هي...

حسناء:و زيدك حتى البحر...حق مولانا و تشوفيها بارح تا تمرغي فاللرض بالضحك...كي كاتنقز ملي تشوف شي كشكوشة جايا..و تخلي صندالتها تماك و تهرب...

ساريتا:[حطات يدها على حنكها تضحك]و ماشي لخاطري اش غاندير...تي الخايبة هي لا شافني أرغد هربانة هكاك...هاديك هي المصيبة....

حسناء:[تلفتات لعند جداتها]شتي شتي ما تغريش أ جدة بهضورتها و زعامتها...ديها غا البحر يحدهم ليها...

سميحة:[شافت فساريتا باستغراب]و زعما ماشي من عوايدك...ياك موالفة غا تنزلي لعندنا لكازا تمشي معانا للبحر و نعومو جميع...أشنو وقع ليك دبا؟...

ساريتا:[تنهدات بآلم كاتشوف فيها]بسباب داك النهار لي عمرو يتنسا ليا ولات عندي فوبيا من المواج...

سميحة:[قوصات حواجبها]عاوديلي اش وقع...اينا نهار هادا أ بنتي...

ساريتا:[سهات لبعيد]نهار عرفت أعز صحبتي نجلاء طلعات لفعة خبيثة طول هاد السنوات كارهاني...[بلا ما تحس نزلات دمعة حارة من عينها]خليت الحزن يعميني و ما بان ليا غا البحر قدامي...دخلت ليه و ما عقت براسي حتى بديت نغرق...[نزلو دموعها]بديت نغرق و شفت الموت قدام عيني و انا كانتنفس اخر انفاسي...

سلات حسناء من طياب المسمن...و جات لعندها وقفات وراها معنقاها كاتمسح على ظهرها...و سميحة تمسح ليها دموعها يسكتو فيها...

حسناء:ما ديريش فبالك...ربي يخلصها و مزال غا دور السمطة و يطرا ليها لي طرا ليك...

سميحة:ما تنزليش دموعك أ بنتي...ما تستاهلش ديك الكلبة تهبطي دمعة عليها و لا توقفي حياتك على قبلها...[قرصاتها حتى قفزات]دبا غا لي دار ليك شي حاجة تنوضي ديري حد لحياتك و لا...

ساريتا:[مسحات دموعها]جاتني قاصحة أ خالتي سميحة...قاصحة بزاف...مازال ما بريت من فراق واليديا بسباب هروبي...و زواجي بدراغون لي كان مبزز عليا...و هادشي لي عرفت على نجلاء فيض الكاس...

حسناء:[عنقاتها كاطبطب عليها...بقات فيها]شششش صافي بلا ما تحرقي عينيك على قبلها...ما تستاهل لا تجبدي سميتها و لا تعطيها قيمة...عتابريها صفحة و تطوات فحياتك...فكري غا فالحوايج الزوينة دبا...فبابا و فالپيپي...

سميحة:[بتاسمات ليها كارزة على يدها]و حتي فالمفاجأة لي محضر ليك دراغون اليوم...