غموض جارنا

بارت 23 والخير ( الجزء الاول)

غموض جارنا

الكاتبة يمامة

أرينا

سحبوني وراهم واني ما ادري شمنظرني ما جان عندي غير الدعاء بهاي اللحظة ياربي احميني ولا تخليهم يأذوني

دخلوني للسيارة وبسرعة ساقو بدون ما ادري وين راح نروح عالاقل من جابوني جانو ما رابطين عيوني بس هسة كلش تصعب الوضع جنت اسمعهم يحجون بس ما گدرت اركز وياهم من الخوف

مر وقت هواي وهم بعدهم يسوقون رجعت راسي ليورة احس رگبت انكسرت بس فجأة وگفت السيارة سمعتهم نزلو وظلو يحجون ورا كم دقيقة انفتح الباب وسحبوني بقوة

حسيت ايد انحطت على وجهي ونزعتني الوصلة المحطوطة على عيوني شفتة رائد واگف گدامي ولازم بيدة مسدس

بس شفتة راسا دموعي نزلن حسيت اطرافي تجمدت من الخوف ما مصدگة هاي هي هيج راح اموت ربي اغفرلي كل ذنوبي وسامحني على كل تقسير بحقك ياربي احفظ آدم وحسوني وكل اهلي جنت اتمنى اشوفهم بهاي اللحظة بس يمكن ما مكتوبلي هالشي

وجه المسدس وسحب اقسام غمضت عيوني وتشاهدت بس فجأة سمعت صوت محمد وهو يگول: رائد لا اتخبل تعال اصعد خلينة نروح

ضحك بقوة وگال: خلينا نلعب شوية شكو ورانا حتى ما حصلنا منها اي معلومة وكلال سويناه راح عالخالي بلاش

اتقرب محمد سحبة من ايدة وگال بعصبية رائد امشي بسرعة مو وقت هاي السوالف التافهة ومن البداية كل السويناه غلط لانتصرفنا بدون اذن الريس

دفعة باتجاه السيارة وصعدة ليگدام بس قبل ما يدخل باوعلي باسف وهز راسة

ركب السيارة وراحو واني بقيت وحدي بهالمكان باوعت عالمكان ما جان بي اي شي عبارة عن طريق محافظات بس شارع والباقي صحراء

نزلت على ركبي ابجي بضعف حايرة شاسوي وشلون راح ارجع للبيت او يمكن راح ابقى هنا واموت ياربي ساعدني ما عندي غيرك

سمعت صوت جاي من بعيد رفعت راسي بتوتر باوعت بكل الاتجاهات ما لگيت اي احد

رجع الصوت تكرر بس هالمرة جان اقرب قلصت عيوني وشفت شي جاي يمشي باتجاهي بس ما جان واضح

بدة شوية شوية يتقرب لما وضحت الصورة گلبي وگع بين رجلي من شفت جلب لونة بني جاي يمشي باتجاهي وامبين بري

گمزت بسرعة من مكاني وجسمي كلة يرجف صرت ارجع ليورة شوية شوية وهو يتقدم

بلعت ريگي ونزعت شالي ذبيتة بالگاع لان جان يعيقني وگلت يارب وطگيتها ركضة باقوى سرعة عندي اياها

التفتت ليورة لگيت الجلب بعدة يلحگني بس هالمرة سرع ركضتة واني حاولت اركض اسرع

ركضت هواي بس الجلب احسة كل ثانية يقرب مني حسيت نفسي كلش ضاق وگلبي گام يوجعني