غموض جارنا

بارت 26

غموض جارنا

الكاتبة يمامة

اندي

جنت گاعدة ارتب بكتبي لان كلش متخربطات واكو بعضهن ما احتاجهن اريد اذبهن

فجأة شفت دفتر مذكراتي بيناتهن وگع عالگاع نزلت شلتة وفتحتحتة جان كلش قديم والتراب ماليه

بس لفت انتباهي من شفت ورقة وگعت منه عالگاع شلتها وفتحتها ايدي گامن يرجفن واني اقري المكتوب حسيت النفس ضاك عندي رجعت اقراها واعيد بيها

جانت الرسالة الي انطاها الي وليد قبل حوالي سنتين جنت بوقتها بعدني ما طايقتة بس قريتها حسيت كل الذكريات رجعت علي بالي شلون تعرفت على وليد وغزل وايامنا من نرجع سوية جانت احلى ايام بحياتي ما بيها اي مشاكل ولا شاغلة بالي باي شي جان وليد افضل صديق بحياتي كلش مشتاقتلتة صار اشهر ما ضايفتة ولا سامعة صوتة

بقيت الكتب بمكانهن واتوجهت لجربايتي گعدت عليها صافنة عالحايط مزاجي انگلب 180 درجة من شفت هالرسالة احس صار مالي خلك لاي شي ولو بس واحد يلزمني راح ابجي

لزمت الموبايل وصرت اگلب بالانستغرام صار كم يوم من نزلتة  بس ما احسة حلو مثل وصف البنات

جنت اگلب بالفيديوهات بملل جان اكثر الاشخاص المتابعتهم ستورياتهم بس هم وغم وكل واحد مصمم على اغنية جانت كلماتها كلش حزينة

رحت عاليوتيوب بحثت عليها طلع اسمها اصيح ومن سمع صوتي جانت جديد من نازلة

شغلتها وگعدت اسمعها وكل ما تخلص ارجع اعيدها بحيث ما حسيت الا واني جاي ابجي وبس صوت شهگاتي ينسمع اتعجبت من نفسي اني شوكت صرت هيج حساسة اني من جدي اتوفى الله يرحمة ما بجيت عليه وهسة جاي ابجي بسبب كلمات اغنية جانت كلماتها وكانها توصف حالي بهاللحظة

انفتح الباب ودخلت زهراء والصدمة ملت ملامحها من شافت وضعي ما جنت مهتمة الها

وحتى مادري شوكت من جت گعدت يمي وصارت تبجي وياي جنت فاصلة كامل ما حسيت الا على صرخة زهراء من ملت الغرفة

بسرعة گمزت من مكاني من الصدمة والرعب واتجهت الها گعدت گدامها وگتلها بخوف: زهراء زهراء شكو شبيج

عفست ملامح بالم وگالت: ولج اندي يمكن راح اولد

باوعتلها بصدمة ما اعرف شاسوي

رجعت صرخت بقوة وگالت: ولج گومي صيحي ماما او امجد

هزيت راسي باستعجال وگتلها: اي رايحة رايحة

طلعت من الغرفة اركض شفت بطريقي امجد وهو طالع من غرفتة جان يلبس بتشيرتة وشعرة مخربط

صرخت وگتلة أمجد زهراء راح تولد

طلع بركض لغرفتها وهو يگول روحي شغلي السيارة

نزلت اركض شفت ماما وبابا عالدرگ والخوف مالي وجوهم گتلهم زهراء يمكن راح تولد وكملت ركضي