غموض جارنا

بارت 27

غموض جارنا

الكاتبة يمامة

أرينا

اتوجه عالقنفة گعد عليها واشرلي بايدة على رجلة مشيت بتوتر ورحت اتمددت عالقنفة وحطيت راسي على رجلة

صار يلعب بشعري وبس صوت تنهيداتة مسموعة واني صافنة عالحايط بدون اي ردة فعل

بقينا هيج حوالي عشر دقايق الا من كسر السكوت وبدة يحجي بصوت مليان قهر وحزن وكانة يجبر نفسة عالحجي

_راح ابديلج من تزوجو امي وابوية

جان ابوية شخص مطرود من اهلة وما عندة اي احد باختصار مگطوع من شجرة بسبب سوالفة الموزينة ولان وين ما يروح يسوي مشكلة جان يشتغل يم واحد يتاجر بالمخدرات وجان وياه واحد يوزع مخدرات يعني اثنينهم يشتغلون سوة بهالشغلة وهالشخص جان حماد نفسة

المهم مدري شلون تعرف على امي وتزوجو لان امي هم مثلة جان ما عدها اهل ويمكن اصلا ما جانت عراقية بس دخلت العراق لان هم جانت وياهم بتجارة المخدرات ما ردت ابحث بهالموضوع لان ما يهمني المهم ورا ما تزوجو بدة ابوية يدمن عالمخدرات بس امي جانت مبتعدة ومالها شغل بي

انولدت اني واستمرت هيج الايام متشابهة جان عندي اخت اكبر مني بتسع سنوات اسمها فاطمة واخ اكبر مني بثلاث سنوات اسمة احمد

جانو اهلي ما مهتمين بينا بس باختي فاطمة جانت وكانة بس هي بنتهم بحيث امي ما فديوم رفعت صوتها عليها وطلباتها كلها مجابة عكسنا انا واخوي احمد جان ابوية شوكت ما يرجع عالبيت فاقد على نفسة بسبب المخدرات جان يشبعنة كتل جانت فاطمة تخاف علينا وما تخلي يضربنا بس امي جانت تجي تاهذها بعيد منة وما تخليها تتقرب فجان احمد ياخذ اكثر الكتل والضرب علمود يحميني ما جنة نعرف سبب هالضرب بس جان دائما من يضربنا يگول انتو السبب وانتو السبب ما جنة نعرف احنا السبب بشنو

مرت الايام والسنوات صار عمري سبع سنوات جنت دائما اگول لاخوية احمد بابا ولاختي فاطمة ماما علموني على هالشي من واني صغير علمود لا احس بالنقص صح احمد جان عمرة عشر سنوات بس حسيتة كبر بسرعة اسرع من عمرة بسبب معاملة اهلي ومشاكلهم

وبيوم جنت توا راجع من المدرسة جنت صف اول ابتدائي گعدت بالحوش انتظر احمد وفاطمة شوكت يرجعون جنة كل واحد بمدرسة مادري شنو السبب بس ابوية راد هالشي

مرت ربع ساعة واحمد رجع بس فاطمة ما رجعت احمد كلش قلق عليها وصار كل شوية راح وراجع ينتظرها شوكت ترجع

مرت نص ساعة وهي هم ما رجعت عاد احمد راح يركض على مدرستها بس الصدمة من گال المدرسة حالين صار ساعة وما بيها اي طالب

رجع ابوية وامي للبيت ومن احمد گاللهم فاطمة ماكو امي راسا گامت تبجي وتلطم وصارت بس تهلس بشعرها بطريقة تخلي الواحد يخاف من يشوفها وبابا راسا تحول وجهة للون الاصفر وطلع يركض من البيت