لهيب عشقك محرم

Part 13

كاتبة :: Samira rd

التافت عاطيهم بضهر خارج من لقصر .. بقات جوديا متبعاه بعينيه حتى خرج.. التافتت ناحية غيث لي كان كيشوف فنفس لبلاصة لي كان كيشوف فيها

جوديا : [ سرطت ريقها واول مرة اتنطق بيها ] شكرا
غيث: [اوما براسو بإيجاب نطق بهدوء ] حاولي لبلاصة لي يكون فيها خويها

قاطع حديتهم رنة تيليفون غيث جبد تيليفون لقا نمرة غيثة طالعة ماتسناهاش تكمل حديتها التافتت طالع لدروج مخليها واقفة فبلاصتها

جوديا : [ تنهدت حاطة يدها على شعرها ] امتى نتهنا من هاد لعداب

تفكرت اروى لي خلاتها كتبكي طلعت لبيت اروى لقات اسماء معنقاها كتمشي وتجي بيها محاولة تسكتها ولكن محاولتها بائت بالفشل .. بسرعة تمشات ناحيتها واخداها من عند اسماء حطاتها فوق صدرها كطبطب على ضهرها بحنان كتمشي وتجي بيها فالبيت

جوديا :[ بصوت خافت بنبرة حنونة] صافي الحبيبة.. ماتبكيش

بقات كتشوف فيها اسماء وتشوف فأروى مادازش لوقت بزاف وكانت ساكتة ونعست.. حطتها فبلاصتها وخرجت هي واسماء سادة باب لبيت

اسماء: [ كطلع وتنزل فيها رافعة حاجبها] شنو دايرة لخويا حتى كيدير ليك هكا ؟
جوديا: [ التافتت ليها عاقدة حواجبها نطقت ببرود] سيري سوليه هو
اسماء [ كانت غاتمشي وقفتها بكلامها] كنصحك ماتلعبيش معاه.. لعبو خايب ويقدر يفنيك

قاطعهم مجيئ غيث لي داز من قدامهم كيف لبرق عقدت جوديا حواجبها باستغراب من ملامحو لي مبدلين تبعاتو بعينيها حتى نزل من دروج تنهدت والتافتت ناحية اسماء خنزرت فيها وهبطت لتحت كانت كتمشا بخطوات بطيئة ناحية لباب كتشوف في قطرات شتا خفيفة جو بارد وهي كتقفقف بالبرد ماعندهاش شي حوايج من غير هادو وماتقدرش تطلب حوايج من عند شي واحد.. خرجت من باب لقصر كانو مجموعة من كارد واقفين برا .. كتمشا جنب لقصر فبلاصة مضرگة على شتا بان ليها فوتاي تمشات ناحيتو جالسة حطت رجل على رجل مرجعة ضهرها لور مربعة يديها كتشوف امامها بشرود تنهدت بتعب كل تفكيرها فين هي ماماها وشنو كدير بقات ساعات وهي تم جالسة وشتا كطيح وسماء خادت لون اسود فيقها من شرودها صوت فران طموبيل التافتت كتشوف شكون لي وقف بهاد طريقة حل لباب وخرج صقر لي غير التافت جاو عينيه فعينيها ضور عينيه على ليكارد كيبانو ليه كاملين حادرين ريوسهم عض داخل فمو....

زير على يدي حتى بانو عروقها لغضب بدا يضهر على ملامحه.. بخطوات بطيئة ناحيتها كيتمشا كل خطوة كتعبر على لغضب لي فالداخل ديالو وقف امامها شادها من كتفهو موقفها جارها وهي وراه كتحاول تحيد يدو من كتفها لي وعتاتها داخل بيها لقصر دافعها حتى كانت غاطيح شدت فراسها

صقر :[ بغا يبخ دم بالاعصاب نطق بصوت مرتفع غاضب] قلت ليك ماتعتبيش باب لقصر
جوديا : [ كانت كتمسد في كتفها عاقدة حواجبها هزت فيه عينيها ناطقة] انت بسيكوباطي مريض وخاصك شي طبيب نفساني على هاد جعرة لي فيك
صقر: [ بخطوات سريعة كان وصل عندها شادها من كفها بقوة حتى دمعو عينيها من ألم نطق تحت سنانو] هاد لمريض هو لي غادي يدفنك تحت لارض
جوديا: [ خشات فيه ضفارها فيدو بقوة حتى خلاو لاطراس طلق منها نطقت بغل] الله ياخد فيك الحق اشماتة
غيثة: [ باستغراب نازلة من دروج] شنو واقع هنا

شاف فيهم صقر وطلع لبيتو التافتت غيثة ناحية جوديا لي كانت مغمضة عينيها من لألم لي في فكها تمشات ناحيتها جارة ليها كرسي

غيثة: [ بهدوء] اجي جلسي [ جرت كرسي لي حداها جالسة امامها نطقت كتشوف فيها ] وعتك

ماجوبتهاش جوديا هزت راسها بإيجاب شدت يدها كطبطب عليها

غيثة: [ سكتت لحضة ونطقت بهدوء] ولدي عصبي بزاف .. حاولي تبعدي منو شوية
جوديا: [ نترت منها واقفة ناطقة بغضب] واش لي ناض يقول ليا هو عصبي نبعد منو .. انا مامقرباش ليه هو لي كيقلب عليا مرض

زفرت بغضب عطاتها بضهر طلعت فدروج غادة لبيتها حلات لباب وخبطاتو بجهد جلست امام سرير فوق الارض جامعة رجليها عندها حاطة راسها فوق يديها مغمضة عينيها.. صدرها كيطلع وينزل بالاعصاب جوديا معروف عليها لبرود كفاش كيقدرو يعصبوها... كلامهم مستفز حست بالبرودة طالعة معاها من الارض تنهدت وقفت محيدة حوايجها كتمشا على صباع رجليها تجاه لحمام دوشت بالما سخون حست بعضامها ترخاو لبست بينوار وفوطة فشعرها وخرجت.. التافتت ناحية لبالكو بان ليها دنيا مضلمة تمشات ناحيتو حالاه حست بنسيم لهوا ضرب فبشرتها حتى خلاها تغمض عويناتها كانت شتا ودنيا فازگة بقات تواني وهي واقفة في لبالكو حتى حست بالبرد ودخلت ساداه ضلمت لبيت وتخشات في فراشها ماجاهاش نعاس بقات تقلب فبلاصتها حتى داتها عينها..

*بواني دالباب تحل بشوي داخل منو غير خيالو لمگضر لي كيبان سدو بشوية بلاما يدير صوت.. بخطوات بطيئة وتابتة اتجاهها تمشا.. صوت طقطقة صباطو كيتسمعو كيف عقارب ساعة .. كتبان ليه ناعسة والغطا هربان عليها.. كانت ناعسة وماحساش بشنو داير بيها .. وقف امامها جلس قفازي هز يدو بهدوء كيدوز على بشرتها وشعرها.. ماكنتش حاسة بكترة تعب .. تنهد وهو متبت عينيه على ملامحها.. بقا دقائق وهو على نفس لوضعية غير كيشوف فيها بدون ملل ولا كلل وقف جار لغطل مغطيها مزيان فجأة حلت عينيها.. شعلت ضو بسرعة جالسة تبتت عينيها عليه عاقدة حواجبها باستغراب من شنو كيدير فبيتها

جوديا: [ رفعت حاجبها بتساءل] غيث؟ [ حك بالقاع ديال لابهم بين حجبانو كيلولب فعينيه] شنو كدير هنا؟
غيث :[ تبت عينيه عليها نطق بنبرة رجولية] جيت نعيط عليك باش تعشاي.. ولكن شفتك ناعسة ومابغيتش نقطع عليك نعاسك
جوديا: [ حكت عينيها حمرين بنعاس نطقت بتعب ] شكرا.. ماكانش عليك تعدب راسك.. مافياش جوع

مرة مرة عينو كتهرب ليها كيحاول يخفي نضراتو امامها تنهد وخرج.. بقات تابعاه بعينيها حتى خرج.. التافتت ناحية ساعة لي كانت جنبها لقاتها 10 دليل .. تنهدت شافت فراسها مزال لابسة بينوار .. وماعندها حتى بيجامة تلبسها رجعت راسها لور مغمضة عينيها دقائق قليلة وتحل لباب التافتت ناحيتو كتشوف في غيث داخل وفيدو بلاطو فيه لماكلة عقدت حواجبها باستغراب اش هاد لاهتمام لمفاجئ .. هي عرفت بلي راه حنين وضريف ولكن ماشي لدرجة يجيب ليها لماكلة حتى لعندها.. تقادات فجلستها مغطية راسها.. تمشا ناحيتها حاط بلاطو فوق لفراش

جوديا :[ شافت فلبلاطو ورجعت شافت فيه ] علاش عدبتي راسك
غيث: [ بهدوء ] ماشي مشكل [ شاف شنو لابسة عقد حواجبو] علاش لابسة غير لبينوار والبرد؟
جوديا : [ كتاكل ] ماعنديش حوايج

نفا براسو بلا حول.. خرج مخليها تاكل على خاطرها مادازش وقت بزاف وكان داخل وفيدو بيجامة قطنية سخونة حطها فوق لفراش

غيث :[ بصوت رجولي] لبسي هادي .. غدا ونجيب ليك اخرين
جوديا : [ عقدت حواجبها باستغراب نطقت بتساءل] علاش كدير معايا هكا ؟
غيث: [عاطيها ابتسامة حنونة ] من بعد وتعرفي.. بدلي ونعسي... يتبع