لهيب عشقك محرم

Part 24

كاتبة :: Samira rd

جوديا: [ تبتت عينيها عليه نطقت بنبرة هادئة] دافع ايخليك تبغي تقتلني ؟

مهاب: [ اومى راسو بإيجاب ] خاصك تنساي گاع داكشي لي طرا في ديبو

جوديا: [ عينيها مفيكسيين على عينيه بنبرة خافتة نطقت ] داكشي تمحا من لعقل ولكن باقين اتارو

مهاب [ سكت تواني ونطق وهو مزال متبت عينو عليها بنفس نبرة] اتارو انا لي انداويهم [ تنحنح ونطق ] غادة ترجعي تقراي

جوديا :[ رفعت حاجبها باستغراب ] شنو لي خلاك تبغي تخليني نرجع نقرا

مهاب :[ بلل ريقو ونطق ] ضريتيني فراسي ونتي كل مرة كتهضري على مستقبلك قلنا نعطيوك فرصة .. باش تأكدي بلي راه ماعندكش مستقبل

جوديا: [ عضت على شفايفها مبتاسمة متبتة عينيها عليه] كنتمنى هاد لهضرة تبقا عاقل عليها

مهاب :[ اوما براسو بإيجاب مبتاسم بنفس لابتسامة] اي حاجة دازت على هاد راس ماكتنساش

بقاو دقائق هوما جالسين ساكتين فجأة تسمع صوت لقرطاس ماتحبسش بسرعة وقفو بجوج وعيونهم على بعضياتهم عقد حواجبو باستغراب من هاد صوت فهاد ليل .. سرطت ريقها وهي كتشوف في مهاب حاط يدو على سلاح وراه تمشا ناحية لكارد لي كانو حتى هوما خرجو يقلبو خارج لقصر .. بقا دقائق وهو كيهضر مع لكارد حتى التافتت ناحيتا بخطوات بطيئة تمشا وقف امامها

جوديا : [ رافعة حاجبها باستغراب] شنو هادشي؟

مهاب : مزال ماعرفنا من انا بلاصة جاي.. صافي غير سيري طلعي لبيتك

اومات راسها بإيجاب ودخلت لقصر طالعة لبيتها اما هو كان واقف فبلاصتو حتى جا عندو لكارد كيجري وقف امامو ماد ليه يدو.. نزل مهاب عينو كيشوف فوق يدو قرطاسة خادها من عندو ومشا لكارد

مهاب [ متبتها امامو مصغر عينو كيقلب فيعا نطق ببرود] كانتمنى مايكونش داكشي لي فبالي..

خشاها فجيبو وطلع لبيتو حتى هو

*اصبحنا واصبح الملك لله

لتحت فصالة كانو مجموعين على طابلة لفطور كامللين طابلة لي كانت عامرة بكل ماكتشتهي لانفس.. كانت جالسة جوديا ومجلسة فوقها اروى كتوكلها جنبها كانت اسماء وامامها كان غيت ومهاب.. غيثة مترأسة طبلة

غيثة: [ ربعت يديها فوق طابلة نطقت بجدية ] لبارح عاود ليا غيث بلي جوديا اترجع تقرا .. حتى انا راني تقبلت فنفس لجامعة لي اتقرا فيها اسماء [ التافتت ناحية مهاب] داكشي علاش امهاب بغيتك تقيدها فنفس لكلية

مهاب: [ رفع حاجبو نطق بهدوء] غيث غادي يقيدها انا عندي شي شغل

غيثة: [ نطقت بجدية ] بغيتك انت لي تقيدها.. غيث محتاجاه

اوما براسو بإيجاب بلاما ينطق وعينو متبتها على اروى لي كانت كضحك مع جوديا وتلعب بشعرها .. ما عرفش كفاش غادي تولف اروى غياب جوديا من بعد ما ولفتها معاها