عواصف الديار

العاصفه الرابعـة والعشرون

#عواصف الديار 🔥

بقلمَي زهراء الساعدي

جميلاتي لاتنسون التصويت والتعليق بين الفقرات
+ متابعه لحسابي 💋
______________

مشكله من تريد تبچي بس دمعتك تعترض
مشكله من الدنيا توكف ولعمُر يركض ركض
مشكله من تريد تنسى وذكرياتك تنتفض

وصلت يمها دگيت عليها بيدي
غوشت عيُوني وطاح راسي بالگاع
دگات گلبي بطأت وجسمي نمل .. صرت انضح عرق
وصلت نهايتي بعد ما اگدر هاهيه
اتشاهدت وسبلت عيُوني  ...

فتحت عيني و وعيت علىٰ نفسي من حسيت بقطرات الماي
تنقط علىٰ وجهي .. تمتمت بتعب
- وين اني

- رجعتي للغرفه اني يمچ حبيبتي

سمعت صوتها وابتسمت
رجعت غفيت بدون لا أحس .. فقت ثاني مره
من بعد إيام حسب ما گالتلي
جسمي كُله خدران ورجلي اليسرىٰ منتهيه ما اگدر احركها
صرخت بحرگه
- اريددد حبايه

- اششش ارجعي نامي اسكتي

- راح اموتتتتت

طلعت بدون لاترد شوي ودخلت ممرضه
خلت مغذي .. باوعتلها اتوسل
- طلعيني منا راح اموت هذول خاطفيني

باوعتلي بطرف عينها
- اريد حبايه تعرفين الحبايه الينطونها الي ؟ جيبلي منها

عافتني وطلعت تخبلت
شلعت الكانونه ضلت ايدي تنزف دم ما اهتميت
لان ما احس بيها .. كُلشي ماحس غير بروحي الجاي تنهش بيه
گعدت الطم وابچي واصرخ اضرب بالباب اريد ازعجهم
باوعت لفخذي نزف ... رجعت للجربايه انحب فتحت الضماد شهكت من شفت عمق الجرح

رجعت لفيتها بخوف قشعرت من المنظر
تمدددت ودمعتي علىٰ خدي .. غمضت عيُوني وهالمره ماغفيت
رجعت مثل قبل اريد اغفىٰ ما اكدر اريد انام وعقلي يوكف عن التفكير ما اكدر

مرت أيام علىٰ هذا حالي
تدخل الممرضه تضربني ابر وتطلع .. واني ادك والطم واصرخ علىٰ الحبايه
من بعد تعذيبي النفسي وتعبي الجسدي دخل سامر عليه ابتسمت
صرت افرح من يدخلي حتىٰ لو يريد مني طلب انفذه
بس اهم شي جايبلي حبايه